މަސްތުވާތަކެތީގެ ތެރެއަށް ދަރިން ގެންދިޔުމަށް އަވަދިނެތި ބަޔަކު މަސައްކަތް ކުރަމުންދޭ: ޚުތުބާ
އެކުވެރި، ބަދަހި ގުޅުމެއް ކުދިންނާއެކު ގާއިމް ކުރަން ޖެހޭ
އިސްލާމީ މަރުކަޒުގައި ހުކުރު ނަމާދު ކުރުމަށް ޖަމާއަތް ހަދައިގެން
މަސްތުވާތަކެތީގެ ތެރެއަށް ދަރިން ގެންދިޔުމަށް މަސައްކަތްކުރާ ބަޔަކު، އަވަދިނެތި މަސައްކަތް ކުރަމުންދާ ކަމަށާއި، ދަރިންގެ ތަރުބިއްޔަތާމެދު މިހާރަށްވުރެ ބޮޑަށް ސަމާލުވާން ޖެހޭ ކަމަށް ހުކުރު ޚުތުބާގައި ބުނެފިއެވެ.
"މަސްތުގެ ވަބާއިން މުޖުތަމައު ސަލާމަތް ކުރަމާ" މި މައުޟޫއަށް ރާއްޖޭގެ އެކިކަންކޮޅުތަކުން އިއްވި ހުކުރު ޚުތުބާގައި ބުނީ ދަރިންގެ ތަރުބިޔަތާމެދު މިހާރަށްވުރެ ބޮޑަށް ސަމާލުވާން ޖެހޭ ކަމަށާއި، ވަކިން ޚާއްސަކޮށް ފުރާވަރުގެ އުމުރުފުރާގެ ކުދިންނާމެދު ސަމާލުވާން ޖެހޭ ކަމަށެވެ. އަދި މަސްތުވާތަކެތީގެ ވިޔަފާރިކުރާ ފަރާތްތަކުން ފުރާވަރުގެ ކުދިން ބޭނުން ކުރަމުންދާ ކަމަށެވެ.
ޚުތުބާގައި ބުނީ ވަކިން ޚާއްސަކޮށް އޮންލައިން ބައެއް ގޭމްތަކާއި، ސޯޝަލްމީޑިއާގެ ޕްލެޓްފޯމް ފޯމްތަކުގައި، އެކުދިން ބޭނުން ކުރުމަށް ޝިކާރަކުރުމަށް މަޅިފަތި ޖަހައިގެން ޝިކާރަވެރިން އަބަދުވެސް ތިބޭ ކަމަށެވެ. އެހެންކަމުން އެކުދިންނަށް އިންޓަނެޓް ރައްކާތެރި ގޮތުގައި ބޭނުންކުރަން ދަސްކޮށްދީ، އެކަމަށް ފަހި މާހައުލަކާއި، އެކަމަށްފަހު، އެކުވެރި، ބަދަހި ގުޅުމެއް އެކުދިންނާއެކު ގާއިމް ކުރަން ޖެހޭ ކަމަށް ޚުތުބާގައި ބުނެފައިވެއެވެ. އަދި މުއައްސަސާތަކުގެ މަސްއޫލުވެރިން ވެސް މިނުރައްކާތެރި ވަބާއިން މުޅި ގައުމު ސަލާމަތްކުރުމަށް ތެދުވުމަށް ޚުތުބާގައި ގޮވާލާފައިވެއެވެ.
ޚުތުބާގައި ބުނީ މީސްތަކުންނަށް ފައިދާހުރި ރަނގަޅު އެންމެހައި ތަކެތި ﷲ ޙަލާލު ކުރެއްވި ކަމަށާއި، ގެއްލުންހުރި ނުބައި އެންމެހައި ތަކެތި ޙަރާމް ކުރެއްވި ކަމަށެވެ. އެންމެހައި މަހުލޫގުންގެ ތެރެއިން އެންމެ މާތްކުރައްވައި، މަތިވެރި ކުރައްވާފައިވަނީ އިންސާނާކަން ފާހަގަކޮށް ޚުތުބާގައި ބުނީ އެއީ އޭނާއަށް މާތް ﷲ ދެއްވި ބުއްދިއާއި ވިސްނުމުގެ ސަބަބުން ކަމަށާއި، އިންސާނާއަށް ބުއްދި ދެއްވާފައިވަނީ ވިސްނައި ފިކުރު ކުރުމަށްޓަކައި ކަމަށެވެ. ޚުތުބާގައި ބުނީ މާތް ﷲ އަންގަވާފައިވާ ގޮތަށް ހެޔޮގޮތުގައި ބުއްދީގެ ބޭނުން ހެއުގޮތުގައި ނުހިފާ މީހާގެ ދަރަޖަ ﷲ ގެ ޙަޟްރަތުގައި ޖަނަވާރުންގެ ދަރަޖައަށްވުރެ ވެސް ދަށުދަރަޖައަށް ވެއްޓިގެން ދާކަން ކީރިތި ގުރުއާނުގައި ﷲ ބަޔާންކުރައްވާފައިވާ ކަމަށެވެ.
ޚުތުބާގައި ބުނީ މިއަދު މި މުޖުތަމައުގައި، މަސްތުވާ ތަކެތީގެ ވަބާގެ ޝިކާރައަކަށް ވެފައިވާ މީހަކު ނުވަތަ ޒުވާނަކުނެތް އާއިލާއެއް މަދު ކަމަށާއި، މަސްތުވާ ތަކެތީގެ ވިޔަފާރި ކުރާ ތަންތަން ހިންގުމާއި، ބޭނުންކުރުމަށް ޚާއްސަ ކެފޭތައް ސިއްރިޔާތުގައި ހިންގުމަކީ، މިއަދު ފެންނަން އޮތް ހިތްދަތި ހަގީގަތެއް ކަމަށެވެ. މައިންބަފައިންނާއި، އަނބިދަރިންގެ ކަރުނަ ފޮހެދީ ކާއެތިކޮޅު ފޯރުކޮށްދޭން ޖެހޭ އަތްތަކުން ކާއެތިކޮޅަށް ހޭދަކުރަން އޮންނަ ލާރިކޮޅު އަންދައި އަޅިއަށް ހަދާލައި، ހިފާގެންގުޅޭ ސާމާނުން ފެށިގެން ހަރުމުދާތައް ވިއްކައި ހުސްކުރާ ކަމަށް ޚުތުބާގައި ބުނެފައިވެއެވެ. ޚުތުބާގައި ބުނީ އަނބިދަރިން ހިމާޔަތް ކުރަންޖެހޭ އަތްތަކުން އެބައިމީހުންނަށް އަނިޔާއާއި ގޯނާކުރުމުގައި ހައްދުފަހަނަޅައި ގޮސް މުޖުތަމައުގައި ހިނގާގެވެށި އަނިޔާގެ ގިނަ މައްސަލަތަކުގައި މަސްތުވާ ތަކެތީގެ ބޮޑު ދައުރެއް އޮންނަ ކަމަށެވެ. އަދި މާރާމާރީ އާއި މީހުން މެރުމާއި، ވައްކަމާއި، އެހެނިހެން އެތައް މައްސަލަތަކެއް ގިނަ ފަހަރަށް ގުޅިފައިވަނީ ސީދާ މަސްތުވާ ތަކެއްޗާ ކަމަށެވެ.
މީގެ އިތުރުން ޚުތުބާގައި ބުނީ މި މުޖުތަމައުގައި މަސްތުވާތަކެތީގެ އަވާގައި ޖެހިގެން ދަނީ، ހަމައެކަނި، ވަޒީފާއެއް ނެތި މަގުމަތީގައި ތިބި ޒުވާނުން އެކަނި ނޫން ކަމަށާއި، އެއާ ޚިލާފަށްވަރަށް ރަނގަޅު ވަޒީފާތަކުގައި ތިބޭ، ކިޔަވައިގެން ތިބި މޮޅެތި ބައެއް ޒުވާނުން ވެސް މިއަދު މިވަބާގެ ޝިކާރައަކަށް ވެގެންދާ ކަމަށެވެ. މިއީ ބަޔަކު މީހުންގެ އަމިއްލަ މަންފާއަށްޓަކައި، އެކުދިން ޝިކާރަކޮށް، އެ ކުދިން މީގެ ތެރެއަށް ވައްދައިގެން ހިންގާ ބޮޑު ޖަރީމާއެއް ކަމަށް ޚުތުބާގައި ބުނެފައިވެއެވެ.
މަސްތުވާތަކެތި ވިޔަފާރިކުރާ މީހުންނަށް އިޝާރާތްކޮށް ޚުތުބާގައި ބުނީ މުޅި ހަޔާތް ބިނާ ކުރަނީ ހަރާމް ވިޔަފާރިއެއްގެ މައްޗަށް ކަމަށާއި، މަސްތުވާތަކެތީގެ ވިޔަފާރިން ލިބޭ ފައިސާއަކީ ކަނޑައެޅިގެން ހަރާމްވެގެންވާ އެއްޗެއް ކަމަށެވެ. އެއީ ނުބައިކަން ބޮޑު އަމަލެއް ކަމަށާއި، މަސްތުވާތަކެތީގެ ހަރާމް ވިޔަފާރި ދޫކޮށް، ތެދުވެރި ތައުބާއަކުން ތައުބާވުމަށް ޚުތުބާގައި ގޮވާލާފައިވެއެވެ.
ޚުތުބާގައި ބުނީ މަސްތުވާ ކޮންމެ އެއްޗަކީ އޭގެ ސަބަބުން އެ ބޭނުންކުރާމީހާ ހަމަބުއްދިން އެއްކިބާ ކޮށްލާ އެއްޗެއް ކަމަށާއި، ނަތީޖާއެއްގެ ގޮތުން، ސިކުނޑިން ފޮނުވާ ނުރަނގަޅު މެސެޖުތަކެއްގެ ސަބަބުން އަމިއްލަ ނަފްސުގެ ކޮންޓްރޯލު ގެއްލިގެންދޭ ކަމަށެވެ. އަމިއްލަ ނަފްސަށް ގެއްލުން ދިނުމާއި، އަމިއްލައަށް މަރުވުން ފަދަ ހިތާމަވެރި ކަންތައްތަކަށް މަގުފަހި ވެގެން ދާ ކަމަށާއި، އިސްލާމް ދީނުގައި މަސްތުވާ ހުރިހާ ބާވަތެއް ހަރާމް ކުރައްވާފައިވަނީ އެއިން ލިބޭ ގެއްލުމުން މުޖުތަމައާއި އަފްރާދުން ސަލާމަތް ކޮށްދިނުމަށް ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ މިވަބާގެ ޝިކާރައަކަށް ވެފައިވާ މީހުންނަކީ އެހީތެރިކަން ބޭނުންވާ ބައެއް ކަމަށާއި، މިމުޖުތަމައުގައި ސަލާމަތުން ތިބި މީހުން، އެމީހުންނަށް އެހީތެރި ނުވެއްޖެނަމަ އެ ވަބާއިން ސަލާމަތްވެވޭނެ ގޮތެއް ނޯންނާނެ ކަމަށެވެ. އަދި މި ވަބާގެ ޝިކާރައަކަށްވެ، މަގުމައްޗާއި އެކި ތަންތަނުން މަސްތުވެފައިވާ މީހުން ފެންނައިރު، އެމީހުންގެ ވީޑިއޯ ނަގައި ސޯޝަލް މީޑިއާގައި އާއްމު ކުރާ މަންޒަރަކީ ހިތްދަތި ހިތާމަވެރި މަންޒަރެއް ކަމަށާއި، މިކަމުގެ ސަބަބުން އެޒުވާނުން މުޖުތަމައުގެ ކުރިމަތީގައި އިތުރަށް ލަދުވެތިވާންޖެހި، ހެޔޮ މަގަށް އައުމަށް ހުރަހަކަށް ވެގެން ދާ ކަމަށް ޚުތުބާގައި ބުނެފައިވެއެވެ. އެހެންކަމުން މިފަދަ އަމަލުތަކުން ދުރު ވެސް ޚުތުބާގައި ނަސޭހަތްތެރިވެފައިވެއެވެ.
