ހުޅުމާލެ ޖަލުގައި ގައިދީއަކު ނިޔާވުމާ ގުޅިގެން މަޖިލީހަށް ކުއްލި މައްސަލައެއް
14 ސެޕްޓެމްބަރު 2021 | އަންގާރަ 04:31ހުޅުމާލެ ޖަލުގައި 3 އަހަރުގެ ޖަލު ހުކުމެއް ތަންފީޒު ކުރަމުން ދަނިކޮށް ނިޔާވެފައިވަނީ، ގދ. ވާދޫ ޖަަނަވަރީގެ، މުހައްމަދު އަސްލަމް
އާދަމް ޝަރީފް - މަޑުއްވަރި ދާއިރާ މެމްބަރު
ހުޅުމާލެ ޖަލުގައި ގައިދީއަކު ކުއްލި ގޮތަކަށް ނިޔާވުމާ ގުޅިގެން މަޖިލީހަށް ކުއްލި މައްސަލައެއް ވައްދައިފިއެވެ.
މި މައްސަލަ މަޖިލީހަށް ވެއްދީ މަޑުއްވަރީ ދާއިރާގެ މެމްބަރު އާދަމް ޝަރީފްއެވެ. ކުއްލި މައްސަލައިގައި ބުނެފައިވަނީ ހުޅުމާލެ ޖަލުގައި ހުކުމް ތަންފީޒު ކުރަމުން ދިޔަ ގައިދީއަކު ކުއްލި ގޮތަކަށް ނިޔާވެފައިވާ ކަމާއި، މައްސަލައިގައި ކަމާބެހޭ ފަރާތްތަކުން އިހުމާލުވެފައިވާ ކަމަށާއި، އާއިލާގެ ފަރާތުންކުރާ ތުހުމަތުތައް ތަހުގީގުކޮށްދިނުމަށް ގޮވާލާކަމަށެވެ.
ހުޅުމާލެ ޖަލުގައި 3 އަހަރުގެ ޖަލު ހުކުމެއް ތަންފީޒު ކުރަމުން ދަނިކޮށް ނިޔާވެފައިވަނީ، ގދ. ވާދޫ ޖަަނަވަރީގެ، މުހައްމަދު އަސްލަމެވެ.
މައްސަލައިގައި ބުނެފައިވަނީ، އަސްްލަމް ނިޔާވިކަން ކަރެކްޝަންގެ ފަރާތުން އާއިލާއަށް ސިއްރުކުރުމަށް މަސައްކަތް ކޮށްފައިވާ ކަމަށާއި، ބަލިވެގެން ހޮސްޕިޓަލަށް ގެންދިޔައީ 5 ޖެހިއިރު ކަމަށެވެ. އެހެންނަަމަވެސް އާއިލާއަށް އެ މައުލޫމާތު ހިއްސާކޮށްފައިނުވާ ކަމަށާއި، ނިޔާވި ޚަބަރުގެ މައުލޫމާތު ވެސް އާއިލާއަށް ލިބުނީ އެހެން މީހެއްގެ ފަރާތުން ކަމަށް ބުނެފައިވެއެވެ. އެވަގުތު ހޮސްޕިޓަލަށް ގޮސް އާއިލާގެ ފަރާތުން ކަރެކްޝަންގެ އޮފިސަރުންނާ ސުވާލުކުރުމުން، އަސްލަމް ފަރުވާ ހޯދަމުންދާކަމަށް ބުނެ އޮޅުވާލަން މަސައްކަތްކުރި ކަމަށާއި، އަސްލަމް ބާއްވާފައި އޮތް ކޮޓަރިއަށް އާއިލާއިން ވަންއިރު ނިޔާވެފައިވާކަމަށް ކުއްލި މައްސަލައިގައި ބުނެފައިވެއެވެ.
އަސްލަމް ބަލިވެ ހާލުދެރަވިކަން އިމަރޖެންސި ނަމްބަރަށް ގުޅައި އަންގާފައި ނުވުން އެއީ އިހުމާލެއް ކަމަށާއި، މިނިވަން ތަހުގީގެއް ހިންގައި ފިޔަވަޅު އެޅުމަށް ކުއްލި މައްސަލައިގައި ބުނެފައިވެއެވެ.
މުހައްމަދު އަސްލަމް ހުޅުމާލެ ހޮސްޕިޓަލަށް ގެންދިއުމާ ގުޅިގެން ކަރެކްޝަންސްއިން ވަނީ ވަގުތުން އެކަން އިންސްޕެކްޓަރ އޮފް ކަރެކްޝަނަލް ސަރވިސް، މޯލްޑިވްސް ޕޮލިސް ސަރވިސް އަދި ހިއުމަން ރައިޓްސް ކޮމިޝަން އޮފް ދަ މޯލްޑިވްސް އަށް އަންގާފައި ކަމަށް ވެސް ކަރެކްޝަންސްއިން ބުނެއެވެ.
