ރެކޯޑެއް ހެދުމަށް ރާއްޖޭގެ އުތުރުން ދެކުނަށް ޖެޓްސްކީ ދަތުރެއް

ދުނިޔޭގެ ފަތުރުވެރިކަމުގެ ދުވަހާ ގުޅުވައިގެން ހއ. ތުރާކުނުން ފެށިގެން އައްޑޫ ސިޓީގެ އެންމެ ދެކުނަށް "ޖެޓްސްކީ ޓުއަރ 2021" ގެ ނަމުގައި ޖެޓްސްކީ ދަތުރެއް ފަށަން ނިންމައިފިއެވެ.

މޯލްޑިވްސް ވޯޓަރ ސްޕޯޓްސް އާއި އައްޑޫ ސިޓީ ކައުންސިލް ގުޅިގެން ކުރިއަށް ގެންދާ މި ހަރަކާތް އިފްތިތާހު ކުރުމަށް ހޮނިހިރު ދުވަހު ހުޅުމާލޭ ވޯޓަރ ސްޕޯޓްސް ސަރަހައްދުގައި ވަނީ ޚާއްސަ ރަސްމިއްޔާތެއް ބާއްވާފައެވެ.

މި ހަރަކާތް އިފްތިތާހު ކޮށްދެއްވީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑައިރެކްޓަރ، ސުހެއިލް އަހުމަދާއި ޑެޕިއުޓީ މެނޭޖިން ޑިރެކްޓަރ، އަހްމަދް އާތިފެވެ. އުތުރުން ދެކުނަށް ފަށަން ނިންމާފައިވާ މި ހަރަކާތް ކުރިއަށްދަނީ ސެޕްޓެމްބަރ މަހު 22ން 27ގެ ނިޔަލަށެވެ. މި ދަތުރުގެ ތެރެއިން 20 މަންޒިލަށް ދަތުރުކުރާއިރު 4 ރަށެއްގައި މަޑުކުރާނެއެވެ.

ރާއްޖެއެމްވީއަށް މައުލޫމާތު ދެމުން މި އިވެންޓް އިންތިޒާމު ކުރާ ފަރާތުން ބުނީ މި ދަތުރު ފެށިގެން ގޮސް ނިމެންދެން ތަޖުރިބާ ލިބިފައި ހުރި 6 މީހުން ދަތުރުގައި ބައިވެރިވާނެ ކަމަށެވެ. އަދި ޖެޓްސްކީ ދުއްވާ އިތުުރު މީހުން ވެސް ދަތުރުގައި ބައިވެރިވާއިރު އޭގެ ތެރެއިން ބައެއް މީހުން ދަތުރުގެ މެދުތެރެއިން ވެސް ބައިވެރިވާނެ ކަމަށެވެ. މި ހަރަކާތް ކުރިއަށްދާނީ ރައްކާތެރިކަމުގެ ގޮތުން އަޅަން ޖެހޭ ހުރިހާ ފިޔަވަޅުތައް އަޅައިގެން ކަމަށާއި ދަތުރުގެ ސަލާމަތީ ކަންތައްތައް ބެލެހެއްޓުމަށް އެމްއެންޑީއެފުން ހަރަކާތްތެރިވާނެ ކަމަށް ވެސް މި އިވެންޓް އިންތިޒާމު ކުރާ ފަރާތުން ބުންޏެވެ.

އިވެންޓް އިންތިޒާމު ކުރާ ފަރާތުން އިތުރަށް ބުނީ ދުނިޔޭގެ ފަތުރުވެރިކަމުގެ ދުވަހާ ގުޅުވައިގެން މި ހަރަކާތް ހިންގާއިރު އެހެން މަޤްޞަދެއް ވެސް މީގައި އެކުލެވިގެންވާ ކަމަށެވެ. އެގޮތުން ރާއްޖޭގައި ރިކޯޑެއް ހެދުމަކީ އަނެއް އަމާޒު ކަމަށާއި ވަރަށް ބޮޑެތި ގޮންޖެހުންތަކާ ދިމާވާނެ ކަމަށް ވެސް ވަނީ ބުނެފައެވެ.

ރާއްޖޭގެ މިފަދަ ތަފާތު މުބާރާތްތައް ބޭއްވެން ޖެހޭނެކަން ފާހަގަކޮށް އިވެންޓް އިންތިޒާމު ކުރާ ފަރާތުން ބުނީ މި ހަރަކާތަކީ ފަތުރުވެރިކަމާއި ވޯޓަރ ސްޕޯސްޓްސްއާ އޮތް ގުޅުން ހާމަކޮށްދިނުމަށް ވެސް ކުރިއަށް ގެންދާ ހަރަކާތެއް ކަމަށެވެ.

މޫދު ކުޅިވަރު ޕްރޮމޯޓް ކުރުމަކީ އެންމެ އިސްކަންދޭ އެއް ކަންތައް ކަމަށް މޯލްޑިވްސް ވޯޓަރ ސްޕޯޓްސް ވަނީ ބުނެފައެވެ.