ކެއިންބުއިމުގައި އިސްރާފުކުރުމަކީ އިންސާނާއަށް ވަރަށް ބޮޑެތި ގެއްލުންތަކެއް ލިބިދާނެ ކަމެއް: ޚުތުބާ
10 ސެޕްޓެމްބަރު 2021 | ހުކުރު 08:07އިސްރާފުކުރުމުގެ ސަބަބުން އޭނާއަށް އެތައް ބަލިތަކެއް ޖެހިދާނެ
އިސްލާމީ މަރުކަޒުގައި ހުކުރު ނަމާދުކޮށް ނިމިގެން މީހުންތައް ގެއަށް ދަނީ،
ކެއިންބުއިމުގައި އިސްރާފު ކުރުމަކީ އިންސާނާއަށް ވަރަށް ބޮޑެތި ގެއްލުންތަކެއް ލިބިދާނެ ކަމެއް ކަމަށް ހުކުރު ޚުތުބާގައި ބުނެފިއެވެ.
"ކެއިންބުއިމުގެ އިސްލާމީ އަދަބުތައް" މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ އިސްލާމް ދީން އަބަދުވެސް ގޮވައިލަނީ، އިސްރާފުނުކުރުމަށް ކަމަށާއި، ކެއިންބުއިމުގައި އިސްރާފުކުރުމަކީ އިންސާނާއަށް ވަރަށް ބޮޑެތި ގެއްލުންތަކެއް ލިބިދާނެ ކަމެއް ކަމަށެވެ. އެކަމުގެ ސަބަބުން އޭނާއަށް އެތައް ބަލިތަކެއް ޖެހިދާނެ ކަމެއް ކަމަށާއި، އެއީ އޭނާގެ ދުޅަހެޔޮކަން ނަގައިލާފާނެ ކަމެއް ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ މި ޒަމާނަށް ބަލާ އިރު ކައިވެނީގެ ވަލީމާތަކާއި ތަފާތު މުނާސަބަތުތަކުގައި ބާއްވާ ޕާޓީތަކުން އިސްރާފުގެ ކުލަތައް ފެންނަ ކަމަށާއި، މިއީ ދީނީގޮތުން ބަލާ އިރު އެއްގޮތަކަށް ވެސް ރަނގަޅު ކަމެއް ނޫން ކަމަށެވެ. އެއީ މާތް ﷲ ދެއްވި މުދަލުން ކުރެވޭ އިސްރާފެއްކަން ފާހަގަކޮށް ޚުތުބާގައި ބުނީ ގިނަބަޔަކު ވަލީމާތައް ބާއްވަނީ ސުންނަތް ގާއިމުކުރުމުގެ ގޮތުން ނޫން ކަމަށެވެ. އެކަކަށްވުރެ އަނެކަކު މޮޅުކަމާއި، މުއްސަންދިކަމާއި ފޯރުންތެރިކަން ދެއްކުމަށްޓަކައި ބާއްވާ ވަލީމާތަކުގެ ނަތީޖާއަކީ ތިމާ ދަރަނިވެރިވުން ކަމަށެވެ.
ކީރިތި ރަސޫލާ ދެއްވާފައިވާ އިރުޝާދުތަކަށް އަލިއަޅުއްވާލައްވައި ޚުތުބާގައި ބުނީ ކޮޅަށްހުރެ ނުކެއުމާއި، ފެން ބޯއިރު ލަސްލަހުން އެތިއެތި ފޮދުން ދަމާލައިގެން ބުއިން ހިމެނޭ ކަމަށެވެ. ދިޔާ އެއްޗެހި ބޯ އިރު، ބުއިން އެންމެ ރަނގަޅީ ތިން ނޭވާއިން ކަމަށާއި، ފުރަތަމަ ފަހަރު ބޯ އިރު ބިސްމި ކިއުމަށް ޚުތުބާގައި ބުނެފައިވެއެވެ. އަދި ނިންމާލަމުން މާތް ﷲއަށް ހަމްދުކުރުމަށް ވަނީ ނަސޭހަތްތެރިވެފައެވެ.
ޑޮކްޓަރުންނާ ހަވާލާދެއްވައި ޚުތުބާގައި ބުނީ ހެނދުނުގެ ނާސްތާއަކީ، ހަށިގަނޑަށް ވަރަށް ބޭނުންތެރި އެއްޗެއް ކަމަށެވެ. މަސައްކަތަށް ދިއުމުގެ ކުރިން ހަށިގަނޑަށް ފައިދާ ހުރި ކާނާހިމެނޭ ގޮތަށް، ސައި ބުއިމުން އިންސާނާގެ ހަށިގަނޑަށާއި، ސިކުނޑިއަށް ތާޒާކަން ލިބިގެންދާނެ ކަމަށެވެ. ކެއުމާއި ބުއިމުގެ އިސްލާމީ އަދަބުތަކަށް ބަލާ އިރު، މަޤުޞަދަކަށް ވާންޖެހޭނީ، މާތް ﷲއަށް ކިޔަމަންގަތުމާއި، ތިމާގެ ވާޖިބުތަކާއި، މަސައްކަތްތައް ކުރުމަށް ބޭނުންވާ ހަކަތަ އާއި، ވާގިވެރިކަން ހޯދުމުގެ ނިޔަތުގައި ކެއުމާއި ބުއިން ކަމަށް ޚުތުބާގައި ބުނެފައިވެއެވެ.
