ރ އަލިފުށީ އެއަރޕޯޓް އެޅުމުގެ މަސައްކަތް ފެށޭނީ ކިހާ ހިސާބަކުތޯ ސާފުކުރުމަށް އިނގުރައިދޫ ދާއިރާގެ މެމްބަރ ޙަސަން އަޙުމަދު މިނިސްޓަރ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމްއާ ސުވާލުކުރުމަށް ހުށަހަޅުއްވައިފިއެވެ.
ބުދަ ދުވަހުގެ ޖަލްސާގައި ލިޔުމުން ޖަވާބު ހޯދާގޮތަށް އިނގުރައިދޫ ދާއިރާގެ މެމްބަރ ވަނީ ދެ ވަޒީރަކަށް ހަތަރު ސުވާލުކުރައްވާފައެވެ. އޭގެތެރެއިން ޕްލޭނިންގ މިނިސްޓަރ އަސްލަމާ ދެން މެމްބަރު ކުރައްވާފައިވާ ސުވާލުގައި ވަނީ ރ އަލިފުށީގެ ބިން ހިއްކުމުގެ މަސައްކަތް ފެށޭނެ ތާރީޚަކީ ކޮބައިތޯއާއި ހިއްކަން ކަނޑައަޅާފައިވާ ބޮޑު މިނަކީ ކޮބައިތޯއެވެ. ތިން ވަނަ ސުވާލަކަށް ކުރައްވާފައިވާ ސުވާލަކީ އަލިފުށީގެ މަގުތައް ހެދުމުގެ މަސައްކަތް ފެއްޓުމަށް ނިންމާފައިވާ ތާރީޚަކީ ކޮބައިތޯއެވެ.
އިނގުރައިދޫ ދާއިރާގެ މެމްބަރ ވަނީ މިނިސްޓަރ އޮފް ހެލްތު އަޙުމަދު ނަސީމާވެސް ލިޔުމުން ޖަވާބު ހޯއްދެވުމަށް ސުވާލުކުރައްވާފައެވެ. އެގޮތުން ކުރައްވާ ސުވާލަކީ ރ އަލިފުށީގައި އެޅުމަށް ހަމަޖެހިފައިވާ ހޮސްޕިޓަލް ޑިޒައިންކޮށް ނިމި އެހޮސްޕިޓަލް އެޅުމުގެ މަސައްކަތް ފެށޭނެ ތާރީޚަކީ ކޮބައިތޯއެވެ.
މި ހަތަރު ސުވާލުގެ ޖަވާބުވެސް ޖަލްސާގައި އިއްވާނެއެވެ.
ސުވާލުގެ އިތުރުން ބުދަ ދުވަހުގެ ޖަލްސާއަށް ވަނީ މާފަންނު މެދު ދާއިރާގެ މެމްބަރ އިބްރާހީމް ރަޝީދު ހުށަހަޅުއްވާ މައްސަލައެއް އެޖެންޑާކޮށްފައެވެ. އަދި ނުނިމިހުރި މައްސަލަތަކުގެ ތެރެއިން ދެ ބިލަކަށް ބަހުސްކުރުމަށް އެޖެންޑާކޮށްފައިވެއެވެ. އެއީ ސަރުކާރުގެ ފަރާތުން، ދިއްދޫ ދާއިރާ ގެ މެންބަރު ޢަބްދުالله ވަޙީދު ހުށަހަޅުއްވާފައިވާ އިލެކްޓްރޯނިކް މުއާމަލާތްތަކާ ބެހޭ ބިލުގެ ބަހުސާއި ސަރުކާރުގެ ފަރާތުން، މަނަދޫ ދާއިރާގެ މެންބަރު އަޙްމަދު ހާރޫން ހުށަހަޅުއްވާފައިވާ ، ކާބޯތަކެތީގެ ރައްކާތެރިކަމުގެ ބިލުގެ ބަހުސް ކުރިއަށް ގެންދެވުމެވެ.
މީގެއިތުުރުން ކޮމިޓީތަކުން ހުށަހަޅާ ކަންކަމުގެ ތެރެއިން ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް 8 ވަނަ އިސްލާހު ގެނައުމުގެ ގާނޫނު ފާސްވުމާއެކު ކައުންސިލްތަކުގެ މެމްބަރުންގެ މުސާރަޔާއި އިނާޔަތްތައް މުރާޖާކޮށް އެމައްސަލަ މާލިއްޔަތު ކޮމިޓީން ދިރާސާކޮށް ނިންމިގޮތުގެ ރިޕޯޓަށް އިސްލާހު ހުށަހެޅުމުގެ ރިޕޯޓް ވަނީ އެޖެންޑާކޮށްފައެވެ.