އިންސާނުންނަކީ ތަފާތު އެކި ކަންތައްތަކަށް ޝައުގުވެރިކަން ހުންނަ ބައެކެވެ. އެއްބައި މީހުން އެ ހުންނަ ޝައުގުވެރިކަމާއެކު އެކަމެއްގައި ކުރިއަށްދެއެވެ.
އެކި މީހުން ޝައުގުވެރިކަން އުފެދެނީ އެކި ކަންކަމަށެވެ. އެކަކު ކެއްކުމަށް ޝައުގުވެރިވާއިރު އަނެކަކު ޑައިވް ކުރުމާއި ކުރެހުމާއި މަސްވެރިކަމަށް ވެސް ޝައުގުވެރިކަން ހުރެދާނެއެވެ. ދުނިޔޭގެ އެކި ކަންކޮޅުތަކަށް ނަޒަރު ހިންގާލިޔަސް މިކަން އޮތީ މިހެންނެވެ.
ސިޔާސީ ދާއިރާގައި ހަރަކާތްތެރިވާ މީހެއް ނަމަ އެމީހާގެ އެ ސީރިއަސް ސިފަ ނޫން އެހެން ސިފައެއް ނުވަތަ ޝައުގުވެރިވާ އެހެންކަމެއް އެނގެން ވަރަށް ގިނަ މީހުން ބޭނުންވާނެއެވެ. ދުނިޔޭގެ އެކި ކަންކޮޅުތަކުގައި ވެސް މިފަދައިން ފާހަގަކޮށްލެވޭ ބޭފުޅުން އެބަތިއްބެވިއެވެ.
އެގޮތުން އެމެރިކާގެ ކުރީގެ ރައީސް ބަރަކް އޮބާމާ އަކީ ވަރަށް މޮޅު ލަވަ ކިޔުއްވާ ބޭފުޅެކެވެ. ޖޯޖް ބުޝް އަކީ ވަރަށް ރީތިކޮށް ކުރައްސަވާ ބޭފުޅެކެވެ. ރަޝިޔާގެ ރައީސް ލަޑީމިއާ ޕުޓިންނަކީ މަސްވެރިކަމަށް ޝައުގުވެރިކަން ހުންނަ ބޭފުޅެކެވެ. މިގޮތަށް އެތައް ބަޔެއްގެ ނަން ކީދާނެއެވެ.
ރާއްޖެއަށް ބަލާނަމަ ރާއްޖޭގެ ކުރީގެ ރައީސް މައުމޫން އަބްދުލްގައްޔޫމަކީ ވަރަށް ރީތިކޮށް އަރަބި ބޮޑު އަކުރު ލިޔުއްވާ ބޭފުޅެކެވެ. މިހާރުގެ ރައީސް އިބްރާހިމް މުހައްމަދު ސާލިހަކީ ސިޔާސީ ކަންކަމުގެ އިތުރަށް ތަފާތު ހުނަރުތައް ހުރި ބޭފުޅެކެވެ. މިގޮތުން މޮޅަށް ވޮލީ ކުޅުއްވުމުގެ އިތުރުން ފޮޓޯ ނެންގެވުމަކީ ރައީސްގެ އާދަޔާ ޚިލާފު ހުނަރުތަކުގެ ތެރޭގައި ފާހަގަކުރެވޭ ކަންތައްތަކެވެ.
ދެން އޮތީ އާއިލީ ދިރިއުޅުއްވުމުގެ ވާހަކައެވެ. ރައީސް ކަމަށް ވަޑައިގަތުމުގެ ކުރިން ރާއްޖެޓީވީގެ ޕްރޮގްރާމެއްގައި ވާހަކަ ދައްކަވަމުން އެކަމަށް ވަނީ އަލިއަޅުއްވާލައްވާފައެވެ. އާއިލީ ދިރިއުޅުއްވުމާއި ސާދާ މިޒާޖާއި އާދަތަކުގެ ވާހަކަ ދެއްކެވިއިރު އަމިއްލަފުޅު ކަންކަން އަމިއްލަފުޅަށް ކުރައްވަމޭ ވިދާޅުވިއެވެ. މިގޮތުން ކެެއްކުމުގެ ހުނަރު ރަނގަޅު ފެންވަރަކަށް ހުންނަކަން ހާމަކުރެއްވުމުގެ ގޮތުން ރޮށި ވަށްކޮށް ދަމަން އެނގިވަޑައިގަންނަވާ ކަމަށާއި ވަރަށް މީރުކޮށް ކުކުޅު ރިހަ ކައްކަން އެނގިވަޑައިގަންނަވާ ކަމަށް ވެސް ވިދާޅުވިއެވެ.
އިދިކޮޅު ފަރާތްތަކަށް މި ވާހަކަތައް ވެގެންދިޔައީ ހަޖަމް ކުރަން ތަންކޮޅެއް އުނދަގޫ ވާހަކަތަކަށެވެ. ރައީސް ސާލިހަށް ވަށްކޮށް ރޮށި ދަމަން އެނގިވަޑައިގަންނަވާ ކަމަށް ވިދާޅުވުމުން އެކަމަށް ވަރަށް ބޮޑަށް އިދިކޮޅުން ވަނީ ފާޑު ކިޔާފައެވެ. އަދި އެއީ ވަރަށް ދަށު ދަރަޖައިގެ ކަމެއް ގޮތަށް ވަނީ ސިފަކޮށްފައެވެ.
އެހެންނަމަވެސް ގަބޫލު ކުރަންވީ ހަގީގަތަކީ މީހަކަށް ވަށްކޮށް ރޮށި ދަމަން އެނގުމާއި މީރުކޮށް ރިހަގަނޑެއް ކައްކާލަން އެނގުމަކީ މޮޅު ކަމެއް ކަމެވެ. އެކަމަށް މަލާމާތް ކުރާނަމަ އެ މަލާމަތް ފުރަތަމަ ރައްދުވަނީ ތިމާގެ މަންމައަށެވެ. ދެން ދައްތަ އަށެވެ. އަންހެން ކޮއްކޮ އަށެވެ. ދެން ތިމާގެ އަނބިމީހާއަށެވެ. ބައެއް ފަހަރު ޚުދު ތިމާއަށެވެ. އެންމެ ފަހުން ގޮސް ތިމާގެ އަންހެން ދަރިފުޅަށެވެ.
އެއަށްވުރެ އިތުރަށް ބުނާނަމަ ކެއްކުމުގެ ބުރަ ވަޒީފާ އަދާކުރާ ހުރިހާ ޝެފުންނަށެވެ. މިޒަމާނުގައި ފިރިހެނުންނަށް ކައްކަން އެނގުމަކީ ސަޅި ކަމެކެވެ. ރާއްޖޭގައި ކުރިއަރަމުން އަންނަ ކަލިނަރީގެ މި ދާއިރާއަށް ބަލާލިޔަސް މި ދާއިރާގައި އުޅޭ ފިރިހެނުންގެ އަދަދު އަންނަނީ އިތުރުވަމުންނެވެ.
މި ދާއިރާ އަކީ މިހާރު އެންމެ މުސާރަ ބޮޑު ދާއިރާއަށްވާއިރު މިއީ ވަރަށް ރަނގަޅު މުސްތަގުބަލެއް އޮތް ދާއިރާއެކެވެ. މިހާރު ގިނަ އަންހެނުންނަށް ކަމުދަނީ ވެސް ކައްކަން އެނގޭ، ވަށްކޮށް ރޮށި ދަމަން އެނގޭ، ބަދިގޭގައި ވެސް އެހީތެރިވެދެވޭނެ ފަދަ ފިރިހެނުންނެވެ.
