މުސާރަ ނުނަގައިފިނަމަ ދިރިއުޅެވޭނެ ގޮތެއް ނޯންނާނެ: ރައީސް ނަޝީދު
5 ސެޕްޓެމްބަރު 2021 | އާދީއްތަ 09:01މިހާލަތު ކުރިމަތިވީ އަމިއްލައަށް ކުރިކަމަކުން ނޫން
ރައްޔިތުން މަޖިލީހުގައި ބޭއްވި ނޫސްވެރިންގެ ބައްދަލުވުމުގައި ރައީސް މުހައްމަދު ނަޝީދު ވާހަކަފުޅު ދައްކަވަނީ
މުސާރަ ނުނަގައިފިނަމަ ދިރިއުޅެވޭނެ ގޮތެއް ނޯންނާނެ ކަމަށް ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
އާދިއްތަ ދުވަހު އިނގިރޭސިވިލާތުގައި ހުންނަވައި ވަރޗުއަލްކޮށް ބޭއްވި ނޫސްވެރިންގެ ބައްދަލުވުމުގައި ރައީސް ނަޝީދު ވިދާޅުވީ, މުސާރަ ނަގާ ކަމަށާއި، މިހާލަތު އެމަނިކުފާނަށް ކުރިމަތިވީ އަމިއްލައަށް ކުރި ކަމަކުން ނޫން ކަމަށެވެ. އަދި ހަމަލާއަށްފަހު ދުނިޔޭގައި ހުންނެވީ މާތްﷲގެ އިރާދަފުޅާއެކު ނަސީބު ރަނގަޅުކަމުން ކަމަށް އެމަނިކުފާނު ވިދާޅުވިއެވެ.
ރައީސް ނަޝީދު ވިދާޅުވީ މަޖިލިސްގެ ރައީސެއްގެ މުސާރައަށް ކޮމިޓީ އެލަވަންސް ނުލިބޭ ކަމަށެވެ. އެހެންކަމުން އާންމު މެމްބަރެއްގެ މުސާރައަށްވުރެ ކުޑަކަން ފާހަގަކުރެއްވިއެވެ.
ރައްޔިތުންގެ މަޖިލީހުގެ ރައީސަށް މުސާރަ އާއި އިނާޔަތުގެ ގޮތުގައި ލިބިވަޑައިގަންނަވަނީ 73125 ރުފިޔާއެވެ. އަދި ކޮވިޑް-19 ގެ ހާލަތާ ގުޅިގެން މަރޗް މަހުން ފެށިގެން މުސާރައިގެ 20 އިންސައްތަ އުނިކުރުމާ ގުޅިގެން މިހާރު މަހެއްގެ މައްޗަށް ލިބިވަޑައިގަންނަވަނީ 62500 ރުފިޔާ އެވެ.
އޭގެ އިތުރުން ރައީސުލްޖުމްހޫރިއްޔާކަން ކޮށްފައިވާ ފަރާތްތަކަށް ރައްކާތެރިކަމާއި އިނާޔަތް ދިނުމުގެ ގާނޫނުގައިވާ ގޮތުން، ކުރީގެ ރައީސަކަށް ދޭ މާލީ އިނާޔަތާއި އެކޮމޮޑޭޝަން އެލަވަންސް އަދި އޮފީސް ހިންގުމުގެ ޚަރަދުގެ ގޮތުގައި އެމަނިކުފާނަށް 172،000 ރުފިޔާ ލިބިވަޑައިގަންނަވާނެ އެވެ.
ކުރީގެ ރައީސުންނަށް މާލީ އިނާޔަތުގެ ގޮތުގައި މަހަކު 75،000 ރުފިޔާ، އެކޮމޮޑޭޝަންގެ ގޮތުގައި 10،000 ރުފިޔާ އަދި އޮފީސް ހިންގުމަށް 87،000 ރުފިޔާ ލިބިވަޑައިގަންނަވައެވެ.
މަޖިލީހުގެ އިދާރާ އިން މީގެ ކުރިން ބުނެފައިވަނީ ކުރީ ރައީސުންގެ އިނާޔަތްތަކުގެ ގޮތުގައި ލިބިވަޑައިގަންނަވާ މާލީ އިނާޔަތްތަކާއި އެކޮމޮޑޭޝަން އުނިކުރުމަށް ރައީސް ނަޝީދު ވަނީ އެދިވަައިގެންފައެވެ. އެހެން ކަމުން މިހާރު އެމަނިކުފާނު ނަންގަވަނީ ހަމައެކަނި އޮފީސް ހިންގުމަށް 87،000 ރުފިޔާ އަދި ސެކިއުރިޓީ އެވެ.
