އައްޑޫ ސިޓީގައި ހާލަތު ގޯސްވެ، އެކްޓިވް ކޭސްތަކުގެ އަދަދު 216ށް
ބަލި ކޮންޓްރޯލް ކުރުމަށް މިހާރު ވަނީ އިތުރު ފިޔަވަޅުތަކެއް އަޅާފައި
އައްޑޫ ސިޓީ،
އައްޑޫ ސިޓީގައި ކޮވިޑް-19ގެ ހާލަތު ގޯސްވެ އިތުރު 37 މީހަކު ޕޮޒިޓިވްވެއްޖެއެވެ.
އައްޑޫ އިކުއެޓޯރިއަލް ހޮސްޕިޓަލުން އެންމެ ފަހުން އާންމުކުރި މައުލޫމާތުތަކުން ދައްކާގޮތުގައި ހޯމަ ދުވަހުގެ އިރުއޮއްސި 6:00ން އަންގާރަ ދުވަހުގެ އިރުއޮއްސި 6:00ށް 243 ސާމްޕަލެއް ނަގާފައިވެއެވެ. އޭގެ ތެރެއިން 37 ސާމްޕަލެއް ޕޮޒިޓިވްވެފައިވެއެވެ. އެއާއެކު ޖުމްލަ ޕޮޒިޓިވްވި އަދަދު ވަނީ 915ށް އަރާފައެވެ. އަދި 696 މީހުން ބަލިން ރަނގަޅުވެފައިވެއެވެ.
216 އެކްޓިވް ކޭސް ހިމޭނޭއިރު އެއީ މަރަދޫއިން 106 މީހުން، ހިތަދޫއިން 53 މީހުން، މަރަދޫ-ފޭދޫއިން 24 މީހުން، ފޭދޫއިން 22 މީހުން، ގަމުން އެކަކު، ހުޅުދޫއިން އެކަކު، އަދި މީދޫއިން އެކަކު ކަމަށް ތަފާސްހިސާބުތަކުން ދައްކައެވެ.
އައްޑޫ އިކުއެޓޯރިއަލް ހޮސްޕިޓަލުން ބުނީ އެ ސިޓީގައި މިވަގުތު އޮތް އެކްޓިވް ކޭސްތަކުގެ ޑައިރެކްޓު ކޮންޓެކްޓުންގެ ގޮތުގައި 612 މީހަކު ފާހަގަކުރެވިފައިވާ ކަމަށާއި، 3 މީހަކަށް ހޮސްޕިޓަލްގައި ފަރުވާ ދެމުންދާ ކަމަށެވެ. އަދި ބަލީގައި 3 މީހަކު ނިޔާވެފައިވެއެވެ.
އައްޑޫ އިކުއެޓޯރިއަލް ހޮސްޕިޓަލުން ބުނީ ސާމްޕަލް ނެގުމުގެ މަސައްކަތްތަކަށް ޚާއްސަ ސަމާލުކަމެއްދީގެން ކުރަމުން ގެންދާ ކަމަށެވެ. އެގޮތުން މިހާތަނަށް 17432 ސާމްޕަލެއް ނަގާފައިވާ ކަމަށާއި، މި މަސައްކަތުގައި އާއްމު ރައްޔިތުންގެ ފަރާތުން ވަރަށް ބޮޑު އެއްބާރުލުމެއް ލިބޭ ކަމަށެވެ. އަދި ބަލީގެ އަލާމާތެއް ފެނިއްޖެނަމަ ލަސްނުކޮށް ޓެސްޓުކުރުމަށް އިލްތިމާސްކޮށްފައިވެއެވެ.
އައްޑޫ ސިޓީން ކޮވިޑް-19ގެ ހާލަތު ގޯސްވެފައިމިވަނީ 21 ޖުލައި 2021 ގައި މޮނިޓަރިންގެ ހާލަތު އުވާލައި، އައު އުސޫލުތަކަށް އަމަލުކުރަން ފެށިފަހުންނެވެ. ނަމަވެސް 28 އޮގަސްޓް 2021 ގައި ބަލި ކޮންޓްރޯލް ކުރުމުގެ ގޮތުން މިހާރު ވަނީ ހަރުކަށި ފިޔަވަޅުތަކެއް އަޅާފައެވެ. ކައުންސިލުން ބުނީ ބަލި ކޮންޓްރޯލް ކުރުމަށް އިތުރު ފިޔަވަޅުތަކެއް އެޅީ ރައްޔިތުންގެ ރައްކާތެރިކަމަށްޓަކައި ކަމަށެވެ.
އެގޮތުން އާއްމުކޮށް ބާއްވާ އެއްވުންތަކާއި ޕާޓީތައް ބޭއްވުން 02 ހަފްތާއަށް މެދުކަނޑާލައި، ހިތަދޫ، މަރަދޫ، މަރަދޫފޭދޫ އަދި ފޭދޫގެ ސްކޫލްތައް 02 ހަފްތާއަށް ވަނީ ބަންދުކޮށްފައެވެ. އަދި މިނިސްޓްރީ އޮފް އެޑިއުކޭޝަނުން އަންގާ ގޮތެއްގެ މަތިން ގްރޭޑް 9 އަކުން މަތީގެ ގްރޭޑްތަކުގެ ކިޔެވުން ރައްކާތެރިކަމުގެ ފިޔަވަޅުތަކާއެކު ކުރިއަށް ގެންދިއުމަށް ކައުންސިލުން ވަނީ ނިންމާފައެވެ.
ރޭގަނޑު 9:00ން ފަތިހު 04:00ށް ކާފިއު ހިންގަން ފަށާފައިވާއިރު، ކޮންމެހެން ބޭރަށް ދާންޖެހޭނަމަ އައްޑޫ އީ.އޯ.ސީގެ ހުއްދައާއެކު ބޭރަށްދިއުމަށް ކައުންސިލުން އެދިފައިވެއެވެ. މީގެ އިތުރުން ކައުންސިލުން ބުނީ ގާޑިޔާ، ހޮޓާ ކެފޭ، ރެސްޓޯރެންޓް ފަދަ ކާބޯތަކެތީގެ ޚިދުމަތްދޭ ތަންތަނުން ރޭގަނޑު 9:00ން ހުޅުވައިގެން ޚިދުމަތް ދިން ނަމަވެސް 12:00ށްއާ ހަމައަށް ޑެލިވަރީގެ ޚިދުމަތް ދެވޭ ގޮތަށް ނިންމާފައިވާ ކަމަށެވެ. އަދި ފިހާރަތަކުން ރޭގަނޑު 9:00ށް ހުޅުވައިގެން ހިދުމަތްދިނުމާއި އަދި 10:00ށް ޑެލިވަރީގެ ޚިދުމަތްދެވޭނެ ކަމަށެވެ.
އައްޑޫ ސިޓީން ފުރާ އެންމެންގެ ޕީސީއާރް ނެގެޓިވް ނަތީޖާއަކާއެކު ފުރުމުގެ ހުއްދަ ދިނުމާއި ޒަރޫރީ ބޭނުމަށް ދަތުރުކުރާ އެންމެހައި ފަރާތްތައް އެޅިފައިވާ އެންމެހައި ފިޔަވަޅުތަކާ އެއްގޮތަށް އަމަލު ކުރުމަށް އިލްތިމާސްކޮށްފައިއެވެ. މޮނިޓަރިންގ ހާލަތުގައި އައްޑޫއިން ދަތުރުކުރެވޭނީ އައްޑޫ އީ، އޯ.ސީގެ ހުއްދަ ލިބިގެން ކަމަށް ކައުންސިލުން ބުނެއެވެ.
