ޕްރެޝަރު ކުކަރެއްގައި ބޯ ތާށިވި ކުޑަ ކުއްޖަކު އިންޑިއާގެ ޑޮކްޓަރުން ސަލާމަތްކޮށްފިއެވެ.
ކުޑަ ކުއްޖެއްގެ ބޮލުގައި ތާށިވި ޕްރެޝަރު ކުކަރު އެކުއްޖާގެ ބޮލުގައި ތާށިވީ ކިހިނެއް ކަމެއް ނޭނގޭކަމަށް އެ ކުއްޖާގެ މައިންބަފައިން ވަނީ ބުނެފައެވެ. އަދި ކުއްޖާގެ ބޮލުގައި ޕްރެޝަރު ކުކަރު ތާށިވުމުން އޭތި ނެގުމުގެ މަސައްކަތް ކުރި ކަމަށާއި އުޅެއުޅެ ވެސް ބޮލުން ނުނެއްޓިގެން ދަރިފުޅު ގޮވައިގެން ހޮސްޕިޓަލަށް ދިޔަކަމަށް ކުއްޖާގެ މައިންބަފައިން މައުލޫމާތުދެއެވެ.
ބޮލުގައި ޕްރެޝަރު ކުކަރު ތާށިވި ކުއްޖާ ގެންގޮސްފައި ވަނީ އިންޑިއާގެ އެސްއެމް ޗެރިޓަބަލް ހޮސްޕިޓަލަށެވެ. ކުއްޖާ ހޮސްޕިޓަލަށް ގެންދިއުމާއެކު ޑޮކްޓަރުން ހައިރާންވި ނަމަވެސް ވީހާވެސް އަވަހަށް އެކުއްޖާގެ ބޮލުން ޕްރެޝަރު ކުކަރު ނެގުމުގެ މަސައްކަތް ޑޮކްޓަރުން ފެށިއެވެ.
ޑޮކްޓަރުން މައުލޫމާތުދޭ ގޮތުގައި މައިންބަފައިން އަމިއްލައަށް ޕްރެޝަރު ކުކަރު ނަގަން މަސައްކަތްކުރުމުގެ ތެރޭގައި ކުއްޖާގެ ބޮލަށް ކޮންމެވެސް ވަރެއްގެ އަނިޔާތަކެއް ވަނީ ލިބިފައެވެ. އެހެން ކަމުން ޕްރެޝަރު ކުކަރު ނެގުމުގެ ކުރިން އެ އަނިޔާތަކަށް ވަނީ ފަރުވާދީފައެވެ. އަދި ކުއްޖާއަށް އިތުރު އަނިޔާތަކެއް ނުދީ އެކުއްޖާގެ ބޮލުން ކުކަރު ނަގާފައި ވަނީ ގްލައިޑަރ މެޝިނަކުން ކުކަރު ކަފާލައިގެންނެވެ.
ރިޕޯޓުތައް ބުނާގޮތުން އެކުއްޖާ މިހާރު ވަނީ ފަރުވާ ނިންމުމަށް ފަހު އެކުއްޖާގެ ބެލެނިވެރިންނާ ހަވާލުކޮށްފައެވެ.
