ސާވޭގެ ކުރިން އުރުނު ބޯޓު ފުރަން ބޭނުންވާނަމަ 100 މިލިއަން ރުފިޔާގެ ޑިޕޮޒިޓެއް ނަގާނަން: އީޕީއޭ

އީޕީއެއިން ހަދަންޖެހޭ ސާވޭތައް ހެދުމުގެ ކުރިން ފަރަށް އެރި ބޯޓު ފުރަން ބޭނުންވާނަމަ ޑިޕޮޒޮޓެއްގެ ގޮތުގައި 100 މިލިއަން ރުފިޔާ ނަގާނެ ކަމަށް އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ)ގެ ޑިރެކްޓަރ ޖެނެރަލް އިބްރާހިމް ނައީމް ވިދާޅުވެއްޖެއެވެ.

ޕެނަމާގެ އާގު ބޯޓެއް ކ. ރަސްފަރީ ހުޅަނގު ފަރާތު ފަރަށް އެރީ މިމަހުގެ 19 ވަނަ ދުވަހުއެވެ. އަދިވެސް މި ބޯޓު ފުން ކުރުމުގެ މަސައްކަތް ކުރަމުންދާއިރު، ބޯޓު ފުންކުރެވުނުހާ އަވަހަކަށް ފަރަށް ލިބުނު ގެއްލުން ބަލާނެ ކަމަށް އީޕީއޭއިން މީގެ ކުރިން ބުނެފައިވެއެވެ.

މިކަމާއި ގުޅިގެން ރާއްޖެއެމްވީއާ ވާހަކަދައްކަވަމުން އީޕީއޭގެ ޑިރެކްޓަރ ޖެނެރަލް އިބްރާހިމް ނައީމް ވިދާޅުވީ ބޯޓު ފުން ނުކުރެވެނީސް ސާވޭގެ މަސައްކަތެއް ނުފެށޭނެ ކަމަށެވެ. އެހެންކަމުން ބޯޓު ފުންކޮށް، ސާވޭކޮށް ނުނިމެނީސް ބޯޓު ފުރަން އެދޭނަމަ 100 މިލިއަން ރުފިޔާ ޑިޕޮޒިޓުގެ ގޮތުގައި ދައްކަންޖެހޭނެ ކަމަށް ނައީމް ވިދާޅުވިއެވެ.

ނައީމް ވިދާޅުވީ ސާވޭއަށް ތައްޔާރުވުމަށް ކުރަންޖެހޭ ކަންކަން މިހާރުވެސް ކުރަމުންދާ ކަމަށެވެ. އެގޮތުން ފަރަށް ލިބިފައިވަނީ ކިހާ ބޮޑު ގެއްލުމެއްތޯ ފަރުގެ މަތިން ބަލާފައިވާ ކަމަށް ނައީމް ވިދާޅުވިއެވެ. މޫދު އަޑިއަށް ގޮސްގެން ބެލޭނީ ބޯޓު ފުންކުރެވުނީމަ ކަމަށް ވިދާޅުވިއެވެ. މިހާތަނަށް ބެލި ބެލުމުން ވަރަށް ބޮޑު ގެއްލުމެއް ފަރަށް ލިބިފައިވާކަން ފާހަގަކުރެވުނު ކަމަށް ނައީމް ވަނީ ވިދާޅުވެފައެވެ.

ނައީމް ވިދާޅުވީ ކ. ރަސްފަރި ފަރަކީ ހިމާޔަތްކޮށްފައިވާ ފަރަކަށް ވުމާއި، ފަރަށް ލިބުނު ގެއްލުމާއި ގުޅިގެން ވަރަށް ބޮޑު އަދަދަކުން ޖޫރިމަނާ ކުރާނެ ކަމަށް ބެލެވޭ ކަމަށެވެ. އެހެންނަމަވެސް ޖޫރިމަނާކުރާނެ ވަރެއް އަދި ކަނޑަނާޅާ ކަމަށް ނައީމް ވަނީ ވިދާޅުވެފައެވެ.

ބޯޓު ފުންކުރުމުގެ މަސައްކަތް ކުރަމުންދާއިރު، ބޯޓު އޮތީ އެއްކޮށް ފަރަށް ލައްވެފައެވެ. މި ސަރަހައްދުގައި އެމްއެންޑީއެފާއި، އަދިވެސް އެހެނިހެން ފަރާތްތަކުން ގެންދަނީ ހަރަކާތްތެރިވަމުންނެވެ. ފަރަށް އެރި ބޯޓުގެ މައުލޫމާތު ހިއްސާކުރުމަށް ކަމާ ގުޅުންހުރި މުއައްސަސާތަކުން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ޓްރާންސްޕޯޓް އޮތޯރިޓީގެ ޑެޕިއުޓީ ޑިރެކްޓަރ ޖެނެރަލް ކެޕްޓަން ޢާދިލް ރަޝީދު ވިދާޅުވީ ބޯޓު ފުންކުރުމުގެ މަސައްކަތް ސެޕްޓެމްބަރު 1ގައި ފަށައި، 2 ދުވަސްތެރޭ ނިންމާލެވޭނެ ކަމަށެވެ.

ބޯޓު ފުންކުރުމުގެ މަސައްކަތް ފެށުމުގެ ކުރިން ބޯޓުގައި ރައްކާކޮށްފައިހުރި 1،226 ޓަނުގެ ތެޔޮ މަތީ ޓޭންކުތަކަށް ބަދަލުކުރުމުގެ މަސައްކަތް ކުރަމުންދާކަމަށް ވިދާޅުވިއެވެ. ބޯޓު ފަޅައިގެންދާ ހާލަތެއްގައިވެސް މޫދަށް ތެޔޮ ލީކުނުވާނީ އޭރުން ކަމަށް އާދިލް ވަނީ ވިދާޅުވެފައެވެ.

މި ހާދިސާ ހިނގާފައިވަނީ ބޯޓުގެ އިންޖީނުގެ ޔުނިޓު ތިނެއްގެ ހޫނުމިން މަތިވުމުން އިންޖީނު ނިއްވާލުމުގެ ސަބަބުން އުޅަނދު އޮޔާ ގޮސްގެން ކަމަށް މިހާތަނަށް ހޯދުނު ހޯދުންތަކުން ދައްކައެވެ. އަދި އުޅަނދު ފަރަށް އެރުމުން ސަލާމަތްކުރުމަށް އުޅަނދުގެ ކެޕްޓަން ކުރަންޖެހޭ ކަންކަން ކޮށްފައެއް ނުވެއެވެ. މިފަދަ މައްސަލައެއް ދިމާވިކަން އަންގާފައިނުވާއިރު، ކެޕްޓަންގެ ހައިސިއްޔަތުން އަޅަންޖެހޭ ފިޔަވަޅުތައް އަޅާފައި ނުވާކަން ފާހަގަވެފައިވެއެވެ. ވަކިން ޚާއްސަކޮށް ނަގިލިލުން ފަދަ ކަމެއްވެސް ކޮށްފައިނުވެއެވެ. އެހީއަށްވެސް އެދިފައިނުވާކަމަށް ކަމާބެހޭ ފަރާތްތަކުން މައުލޫމާތުދެއެވެ.