ދޮގު ޚަބަރުފަތުރައި، މީހުންގެ ޒާތީ މައުލޫމާތު އާއްމުނުކުރުމަށް ޚުތުބާގައި ގޮވާލައިފި
27 އޯގަސްޓު 2021 | ހުކުރު 08:06ނޫސްވެރިންނާއި، މީޑިއާތަކުގައި މަސައްކަތް ކުރާ ފަރާތްތަކުން އަދާ ކުރަންޖެހޭ ޒިންމާ މިއަދު ވަރަށް ބޮޑު
އިސްލާމީ މަރުކަޒުގައި ހުކުރު ނަމާދު ކުރުމަށް ޖަމާއަތް ހަދައިގެން،
ދޮގު ޚަބަރުފަތުރައި، މީހުންގެ އިއްޒަތާއި އަބުރު ނަގާލުމަކީ މުސްލިމުންގެ ސިފައެއް ނޫން ކަމަށާއި، މީހުންގެ ޒާތީ މައުލޫމާތު އާއްމުނުކުރުމަށް ހުކުރު ޚުތުބާގައި ގޮވާލައިފިއެވެ.
"ޚަބަރު ފެތުރުމުގައި ޝަރުއީ ހަމަތައް" މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ މުޖުތަމައުގެ ކޮންމެ ފަރުދަކު ވެސް މުޖުތަމައުގެ މަސްލަހަތާއި، އެއްބައިވަންތަކަން ދަމަހައްޓަން މަސައްކަތް ކުރަންޖެހޭ ކަމަށެވެ. ޚުތުބާގައި ބުނީ މިއަދުގެ ދުނިޔެވަނީ ހުޅުވާލެވިފައި ކަމަށާއި، ސޯޝަލް މީޑިޔާ އާއި ޚަބަރު ފަތުރާ ވަސީލަތްތައް މެދުވެރިކޮށް ކިތަންމެ ދުރުގައި ހިނގާކަމެއް ވެސް ކުޑަކުޑަ އިރުކޮޅެއްގެ ތެރޭގައި މީސްތަކުންނާ ހަމައަށް އަންނަ ކަމަށެވެ. ދުނިޔެ މިގޮތަށް ބަދަލުވެފައިވާއިރު، ދޮގު ޚަބަރުތަކާއި، ދޮގު ވާހަކަތައް ފެތުރުމުގެ ނުރައްކާތެރިކަން އިންތިހާއަށް ބޮޑުވެފައިވާ ކަމަށް ޚުތުބާގައި ބުނެފައިވެއެވެ.
ކީރިތި ގުރްއާނުގައި ދޮގު ޚަބަރުތަކާއި، ދޮގު ވާހަކަތައް ފެތުރުމުގެ ނުބައިކަމާއި، މިފަދަ ވާހަކަތައް ގަބޫލުކުރުމުގެ ސަބަބުން އިންސާނާއަށް ކުރިމަތިލާން ޖެހުނު މުސީބާތްތަކުގެ ވާހަކަތައް ބަޔާންކުރައްވާފައިވާކަން ފާހަގަކޮށް ޚުތުބާގައި ބުނީ އެކަމުން އިބްރަތް ހާސިލްކުރަން ޖެހޭ ކަމަށެވެ. އަދި އެކަންތައްތަކުގެ މަތިން ހަނދާންކޮށް އެފަދަ ކަންކަމުން ރައްކާތެރިވާން ޖެހޭ ކަމަށެވެ. ޚުތުބާގައި ބުނީ ނޫސްވެރިންނާއި، މީޑިއާތަކުގައި މަސައްކަތް ކުރާ ފަރާތްތަކުން އަދާ ކުރަންޖެހޭ ޒިންމާ މިއަދު ވަރަށް ބޮޑު ކަމަށާއި، ނޫސްވެރިންނާއި ޚަބަރުތައް ގެނެސްދޭ ފަރާތްތަކުން އަދާ ކުރަމުންދަނީ ވަރަށް ބޮޑު ދީނީ އަދި ގައުމީ ވާޖިބެއް ކަމަށެވެ. އެމީހުން އެ އުފުލަނީ، އެއްވެސް އޮޅުވާލުމެއް ނެތި، ކަމުގެ ހަގީގަތާ އެއްގޮތަށް، މީސްތަކުންނަށް ސައްހަ ޚަބަރާއި، ތެދު މައުލޫމާތު ފޯރުކޮށްދީ،، މަގު ދެއްކުމުގެ ޒިންމާ ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ އިންސާނާ ދައްކާ ވާހަކަ އާއި، އެހެން މީހުންނަށް ފޯރުކޮށްދޭ މައުލޫމާތު ބިނާ ކުރަންޖެހޭނީ ޝަރުއީ ހަމަތަކުގެ މައްޗަށް ކަމަށާއި، އެހެން މީހުންނަށް ފޯރުކޮށްދޭ ޚަބަރާއި، މައުލޫމާތުވާން ޖެހޭނީ ތެދު ހަގީގަތަށް ކަމަށެވެ. އޭގައި އޮޅުވާލުމެއް ދޮގު ވާހަކައެއް ހިމެނިގެން ނުވާނެ ކަމަށާއި، ވަގު އެކައުންޓު ހަދައި، މީސްތަކުން ތިމާ އަކީ ކާކުކަން ނޭނގޭ ގޮތަށް އޮޅުވާލައިގެން މީސްތަކުންގެ އަބުރު ގެއްލޭ ފަދަ ވާހަކަތައް އާއްމު ކުރާ މީހުން މީސްތަކުންނަށް އޮޅުވާލިކަމުގައި ވިޔަސް، މާތް ﷲ އެކަންކަން މޮޅަށް ދެނެވޮޑިގެންވާ ކަން ދަނެ، އެ ކަލާނގެއަށް ބިރުވެތިވާން ޖެހޭ ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ ތެދެއް ދޮގެއް ބެލުމެއް ނެތި، މީޑީޔާ އިން ފެންނަހާ އެއްޗަކަށް ލައިކުކޮށް، ޝެއާ ކުރުމާއި ރީޓުވީޓު ކުރުމަކީ ވަރަށް ނުރައްކާތެރި ނަތީޖާއެއް ނުކުމެދާނެ ކަމެއް ކަމަށާއި، ފޯރުކޮށްދޭ ޚަބަރެއްގެ ސަބަބުން އެއްވެސް މީހެއްގެ އަބުރާއި، ކަރާމާތަށް ގެއްލުމެއް ލިބިގެން ނުވާނެ ކަމަށެވެ. މުޖުތަމައުގެ ތެރޭގައި ހިނގާ ތަފާތު ކަންކަމުގެ މައުލޫމާތާއި، ޚަބަރުތައް އެހެން މީހުންނަށް އަންގައިދީ، ފޯރުކޮށްދިނުމަކީ، ވަރަށް މުހިއްމު ކަމެއް ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ ތިމާ ފަތުރާ ޚަބަރަކުން އެއްވެސް މީހެއްގެ އިއްޒަތާއި، އަބުރަށް އުނިކަމެއް އައިސްގެން ނުވާނެ ކަމަށާއި، އެއްވެސް މީހެއްގެ ޒާތީ ކަންކަމުގެ މައުލޫމާތު އާއްމުކޮށް ހާމަކޮށްގެން ނުވާނެ ކަމަށެވެ. ޚުތުބާގައި ބުނީ މީހުންގެ އަމިއްލަ ޒާތީ ކަންކަމުގެ ވާހަކަ ދައްކައި، ފާޑުކިއުމުން މުޖުތަމައުގައި އަދާވާތްތެރިކަން އުފެދޭނެ ކަމަށާއި، މުޖުތަމައުގެ އެއްބައިވަންތަކަން ގެއްލި، މުޖުތަމައުގައި ފިތުނަ ފަސާދަ އިތުރުވާނެ ކަމަށެވެ. ނަމަވެސް އަނިޔާވެރިންނާއި، ބިދުއަވެރިންނާއި ފާޅުގައި މުންކަރާތްތަކަށް އަރައިގަންނަ މީހުންގެ ވާހަކަ ޝަރްއީ މަޖްލިސްތަކުގައި ދެއްކިދާނެކަން ޚުތުބާގައި ފާހަގަކޮށްފައިވެއެވެ.
މީގެ އިތުރުން ޚުތުބާގައި ބުނީ ހަދަހަދައިގެން ދޮގު ވާހަކަތައް ދައްކައި، މީހުންގެ އިއްޒަތާއި އަބުރު ނަގާލުމަކީ މުސްލިމުންގެ ސިފައެއް ނޫން ކަމަށާއި، އިއްޒަތަކީ ވަކި މީހަކަށް، ނުވަތަ ވަކި ބަޔަކަށް ދެއްވާފައިވާ އެއްޗެއް ނޫން ކަމަށެވެ. އެންމެ މޮޅު މީހާއިން ފެށިގެން އެންމެ ނިކަމެތި މީހާއާ ހަމައަށް ކޮންމެ މީހަކަށް ވެސް އަބުރާއި އިއްޒަތް ލިބިގެންވާ ކަމަށާއި، މުއްސަނދިންނާއި ބާރުވެރިން އެބައިމީހުންގެ އަބުރާއި އިއްޒަތް ރައްކާތެރިކުރުމަށް އެދޭ ފަދައިން އަނެކުންގެއަބުރާއި އިއްޒަތް ރައްކާތެރި ކުރުމަށް ވެސް ޚުތުބާގައި ގޮވާލާފައިވެއެވެ.
ޚުތުބާގައި ބުނީ މި މުޖުތަމައުގެ ތެރޭގައި ވެސް ތަފާތު ވަސީލަތްތައް ބޭނުންކޮށްގެން ތަފާތު ޚަބަރުތަކާއި މައުލޫމާތު ފޯރުކޮށް ފޯރުކޮށްދެމުންދާ ކަމަށެވެ. ނަމަވެސް ބައެއް ފަހަރު، ބައެއް މީޑިއާތަކުން އިސްލާމީ ރިވެތި އަހުލާގާއި ދިވެހިންގެ ރީތި އާދަކާދައާ ޚިލާފު މަންޒަރުތަކާއި ޚަބަރުތައް ގެނެސްދެމުންދާ ކަމަށެވެ. އަދި މިކަމުގެ ސަބަބުން މުޖުތަމައުގެ އަހުލާގީ ފޭރާން ވީދިގެންދާ ކަމަށާއި، ޒުވާނުންގެ އުޅުމާއި ސުލޫކަށް ނުރަނގަޅު އަސަރުތަކެއް ކުރަމުންދާ ކަމަށެވެ.
ޚުތުބާގައި ބުނީ ދޮގު ޚަބަރު ފަތުރާ މީހާއަކީ، އޭނާގެ ޠަބީޢަތުގައި، ދޭތެރެ ޖެއްސުމާއި، ދެބައޮޑުވުމުގެ ނުބައި ސިފަ އަށަގެންފައިވާ މީހެއް ކަމަށެވެ. އެއީ ފަރުދުންނާއި މުޖްތަމައުގެ މަސްލަހަތު ނަގާލަން މަސައްކަތް ކުރާ މީހެއް ކަމަށާއި، އިސްލާމް ދީނުގައި މިކަންކަން ވަރަށް ބޮޑަށް ނަހީ ކުރައްވާފައިވާ ކަމަށެވެ. އޭގެ ސަބަބުން މުޖްތަމައުގެ އެކުވެރިކަމާއި އެއްބަނޑު އެއްބަފާކަން ގެއްލި ފިތުނަ އުފެދުމަށް މަގު ފަހިވާ ކަމަށާއި، އެއީ ގައުމުގެ ވަޙްދަތު ނަގާލުން ކަމަށް ޚުތުބާގައި ބުނެފައިވެއެވެ.
