ސިޔާސީ މަސައްކަތް ފުޅާކުރުމަށް ޝިދާތާ އެމްއެންޕީއަށް!

ކުރީގެ ޖެންޑާ މިނިސްޓަރު ޝިދާތާ ޝަރީފު އަދި އަދާލަތު ޕާޓީގެ ޚާރިޖީ ގުޅުންތަކާ ބެހޭ ކޮމެޓީގެ ރައީސް އެ ޕާޓީން ވަކިވެވަޑައިގެން މޯލްޑިވްސް ނެޝަނަލް ޕާޓީއާ ގުޅިވަޑައިގެންފިއެވެ.

އަދާލަތު ޕާޓީން ވަކިވިކަން ރަސްމީކޮށް ހާމަކުރައްވައި ޝިދާތާ ނެރުނު ނޫސްބަޔާނެއްގައި ވިދާޅުވީ އަދާލަތު ޕާޓީއާއެކު ގިނަ ތަޖުރިބާތަކެއް ކުރެވިފައިވާ ކަމަށާއި ސިޔާސީ ޝަހްސިއްޔަތު ބިނާކުރުމަށް އެޕާޓީން އަދާކުރި ދައުރު ދުވަހަކު ވެސް ދުރަށް ނުދާނެ ކަމަށެވެ. މިއަދު އާދެވިފައިވާ ހިސާބުން ސިޔާސީ އިތުރު ހަރުފަތަކާ ހަމައަށް ދިޔުމަށްޓަކައި ފިޔަވަޅުތަކެއް އަަޅަންޖެހޭނެކަމަށް ޤަބޫލުކުރެވޭ ކަމަށް ޝިދާތާ ވިދާޅުވިއެވެ. އެހެންކަމުން މިވަގުތުގެ ހާލަތަށް ބަލައި ސިޔާސީ ގޮތުން މަސައްކަތް އިތުރަށް ފުޅާކޮށް، އާ މިސްރާބަކުން ހިނގަން ޖެހޭ ކަމަށް ބެލޭވެ ކަމަށެވެ.

ސިޔާސީ ހަޔާތުގައި އަލަށް ފަށާ ދަތުރުން ރައްޔިތުންގެ ހައްޤުގައި ފުޅާ ދާއިރާއެއްގެ އިތުރު މަސައްކަތްތަކެއް ކުރެވިގެންދާނެ ކަމަށް އުންމީދު ކުރައްވާ ކަަމަށާއި ރައްޔިތުން އެދޭފަދަ މިސްރާބަކަށް ޤައުމުގެ ކަންކަން ގެންދިޔުމަށް ކުރެވޭ މަސައްކަތްތަށް ބޮޅެއް އިތުރުވެގެން ދިޔަ ކަަމަށް ވެސް ޝިދާތާ ވިދާޅުވިއެވެ. އަދި އަދާލަތުޕާޓީއާ ދުރަށްދާން ނިންމި ނިންމުމަކީ އެއްވެސް މީހަކަށް ހިތް ބުރަކަމެއް އޮވެގެން ނިންނި ނިންމުމެއް ނޫންކަމަށް ޝިދާތާ ފާހަގަކުރެއްވިއެވެ.

ޝިދާތާ އިތުރަށް ވިދާޅުވީ ސިޔާސީ ގޮތުން ކަޑައްތުކުރި ގޮންޖެހުންތަކާއި ހިތްނުތަނަވަސްކަން އެއީ ލިބުނު މުހިންމު ތަޖުރިބާއެއް ކަަމަށާއި އެކަންތަކުން އާ ހިތްވަރެއް ލިބުން ނޫންކަމެއް ނުވާ ކަަމަށެވެ.

އަދަލާތު ޕާޓީއަށް 16 އަހަރު ވެފައިވާއިރު، ޝިދާތާއަކީ އެޕާޓީ ފެށުނީއްސުރެ ޕާޓީގެ އެކި މަގާމުތައް ފުރުއްވާފައިވާ ބޭފުޅެކެވެ. އެގޮތުން އަދާލަތު ޕާޓީގެ އައު އެކްޝަން ޕްލޭނެއް އެކުލަވާލަން ނިންމައި އެކަމަށް ނެގި ޚާއްސަ ކޮމެޓީގައި ވެސް ޝިދާތާ ހިމެނިވަޑައިގަންނަވައެވެ.

މި އަހަރު ފެބްރުއަރީ މަހުގެ 06 ވަނަ ދުވަހު ޖެންޑާ މިނިސްޓަރު ކަމުގެ މަގާމުން ޝިދާތާ އިސްތިއުފާ ދެއްވީ ކުޑަކުދިންނަށް ޖިންސީ ގޯނާ ކުރުމާއި ޖިންސީ އަނިޔާ ކުރުމުގެ މައްސަލަތައް އިންތިހާއަށް އިތުރުވެ، އަދި ޖެންޑަރ މިނިސްޓްރީގެ އިހުމާލުގެ ގިނަ މައްސަލަތަކެއް ފެންމަތިވެ، ޝިދާތާއަށް ގިނަ ބަޔެއްގެ ފާޑުކިއުން އަމާޒުވެފައި ވަނިކޮށެވެ. އަދި މަގާމުން އިސްތިއުފާ ދެއްވީ އެ ކަމަނާގެ އިތުބާރު ނެތްކަމުގެ މައްސަލައެއް މަޖިލީހަށް ހުށަހެޅުމަށް އެމްޑީޕީ ޕާލިމެންޓްރީ ގުރޫޕުން ނިންމާފައިވަނިކޮށެވެ.