އއ. ވެލިފިނޮޅު އިތުރަށް ތަރައްގީ ކުރުމުގެ މަޝްރޫއުގެ ބައެއް މަސައްކަތްތައް ވަގުތީ ގޮތުން މަޑު ޖައްސާލުމަށް އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ) އިން އަންގައިފިއެވެ.

އީޕީއޭއިން ބުނީ ވެލިގަނޑު އައިލެންޑް ރިޒޯޓުގައި ކުރިއަށްގެންދާ މަސައްކަތްތަކުގެ ސަބަބުން ރިޒޯޓުގެ ފަޅުން ބޭރަށް ކިސަޑު ދަތުރުކޮށް، ކައިރީގައިވާ ފަރުތަކަށް އަސަރު ފޯރާފައިވާކަމުގެ ޝަކުވާތައް ލިބިފައިވާ ކަމަށެވެ. ކިސަޑުގެ އަސަރު ކުޑަކުރުމަށް އިތުރު ފިޔަވަޅުތައް އެޅުމަށާއި، މަޝްރޫއުގެ ބައެއް މަސައްކަތްތައް ވަގުތީ ގޮތުން މަޑުޖައްސާލުމަށް އަންގާފައިވާ ކަމަށް އީޕީއޭއިން ބުނެއެވެ.

އީޕީއޭއިން ބުނީ ސަރުކާރުގެ ކަމާއި ގުޅުންހުރި ފަރާތްތަކާއެކު، މިމައްސަލަ ބަލަމުން އަންނަ ކަމަށެވެ.

ކްރައުން ކޮމްޕެނީ މޯލްޑިވްސްގެ ފަރާތުން ހިންގާ ވެލިގަނޑު އައިލޭންޑް ރިސޯޓު އޮންނަ ފަޅުތެރެއިން ބޮޑުސަރަހައްދެއް ހިއްކަމުން ގެންދާ މައްސަލައެއް ފެންމަތިވެފައިވާއިރު، އއ.އަތޮޅު ކައުންސިލުން ވަނީ އެކަމާއި ގުޅިގެން ކަންބޮޑުވުން ފާޅުކޮށްފައެވެ.

ކައުންސިލުން ނެރެފައިވާ ނޫސްބަޔާނުގައި ބުނެފައިވަނީ މީގެ ކުރިން ޒަރޫރީ އެކިއެކި ބޭނުންތަކަށާއި، ވިޔަފާރި އުސޫލުން ގިނަ އަދަދަކަށް (އެއްވެސް މެޝިނަރީއެއް ބޭނުން ނުކޮށް) މަޑިވަރު ފަޅުތެރިން ވެލިނެގުމުގެ ސަބަބުން، އެ ފަޅުތެރޭގައި ހުރި ފިނޮޅުތައް ގިރައި، ގުދުރަތީ ގޮތުން ބޮޑެތި ގެއްލުންތަކެއް ލިބެމުންދާތީ، އެފަދަ ބޭނުންތަކަށް ވެލިނެގުމަށް އެހެން ސަރަހައްދެއް ކަނޑައަޅައި ދިނުމަށް 30 އޮކްޓޯބަރ 2019 ގައި ރަސްދޫ ކައުންސިލުން އެދިފައިވާތީ 05 ނޮވެމްބަރ 2019 ގައި އެހެން ސަރަހައްދެއް ކަނޑައަޅައި އީޕީއޭއިން އެކަން ކައުންސިލަށް އަންގާފައިވާ ކަމަށެވެ.

ކައުންސިލުން ބުނީ މަޑިވަރު ފަޅުގެ ބޮޑުބަޔަކީ އީޕީއޭ އިން ހިމާޔަތްކޮށްފައިވާ ސަރައްދަކަށްވާއިރު ފަޅުގެ އެއްކޮޅުން ގިނައަދަދަކަށް ވެލިނަގަމުންދާތީ ފަޅުތެރޭގައި ހުރި ކުދި ފިނޮޅުތައް ނެތިދިއުމާ، އަދި އެ ފަޅާ ގުޅިފައިހުރި ފީނުމަށް ޚާއްސަ ތަންތަނާ، އަދި ފަރާ ކައިރީގައިހުރި ޑައިވިންގ ސްޕޮޓްތައް ކިސަޑުވެލި އެޅި އެތަންތަނަށް ބޮޑެތި ގެއްލުންތަކެއް ލިބި ގުދުރަތީ ދިރުންތައް ނެތެމުންދާތީ، ގެސްޓް ހައުސްތައް ހިންގާ ފަރާތްތަކާއި، އާއްމު ރައްޔިތުން ކޮންމެ ދުވަހަކު އެ ސަރަހައްދު ހިމާޔަތްކުރުމަށް ގޮވާލައި އިހުތިޖާޖު ކުރަމުންދާ ކަމަށެވެ.

ތިމާވެއްޓަށާއި، އެ ސަރަހައްދުގެ ގުދުރަތީ ދިރުންތަކަށް ނޭދެވޭ އަސަރުކުރުމާއި، ފަތުރުވެރިކަމަށް ބޮޑެތި ގެއްލުންތަކެއް ދިމާވާނެތީ، އެ ސަރަހައްދުގައި ވަގުތީގޮތުން މަސައްކަތް ހުއްޓާލާފައިވީ ނަމަވެސް އިތުރަށް އެ މަސައްކަތް ކުރިއަށް ނުގެންގޮސް ހުއްޓުވައި ދާއިމީ ހައްލެއް ހޯދައިދިނުމަށް ސަރުކާރުގައި އެދުމަށް ކައުންސިލުން ވަނީ ނިންމާފައެވެ.