ބޯޓު ފުންކުރެވުނުހާ އަވަހަށް ކ. ރަސްފަރި ހުޅަނގު ފަރާތު ފަރަށް ލިބުނު ގެއްލުން ބަލާނެ ކަމަށް އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ) އިން ބުނެފިއެވެ.

ޕެނަމާއަށް ނިސްބަތްވާ 190 މީޓަރުގެ ކާގޯ ބޯޓު ފަރަށް އެރީ މިމަހުގެ 19ވީ ބުރާސްފަތި ދުވަހު މެންދުރު 12:48 ހާއިރުވެ.

ރާއްޖެއެމްވީއަށް އީޕީއޭގެ ޑިރެކްޓާ ޖެނެރަލް އިބްރާހިމް ނައީމް ވިދާޅުވީ ބޯޓު ފުން ނުކުރެވެނީސް ފަރަށް ލިބިފައިވަނީ ކިހައި ބޮޑު ގެއްލުމެއް ކަމެއް ނޭނގޭނެ ކަމަށާއި، ފުން ކުރެވުނުހާ އަވަހަކަށް ފަރަށް ލިބިފައިވާ ގެއްލުންތައް ބަލާނެ ކަމަށެވެ. އަދި ފަރަށް ލިބުނު ގެއްލުންތައް ބަލައި، އިތުރަށް ކުރަން ޖެހޭ މަސައްކަތްތައް ކުރާނެ ކަމަށް ނައީމް ވިދާޅުވިއެވެ.

ބޯޓު ފުންކުރުމުގެ މަސައްކަތް ކުރަމުންދާއިރު، ބޯޓު އޮތީ އެއްކޮށް ފަރަށް ލައްވެފައެވެ. އެމްއެންޑީއެފުން ބުނީ އެ ސަރަހައްދުގައި ކޯސްޓްގާޑުގެ އިތުރުން ކަމާގުޅުންހުރި ފަރާތްތަކުން ހަރަކާތްތެރިވަމުން ދާ ކަމަށެވެ. މި ހާދިސާގައި ލިބިފައިވާ ގެއްލުމުގެ މައުލޫމާތު އެމްއެންޑީއެފުން އަދި ހާމަކޮށްފައެއް ނުވެއެވެ.

މިފަދަ ހާދިސާތައް ދޭތެރެ ދޭތެރެއިން ކުރިމަތިވަމުން ދާއިރު، ފަރަށް ލިބުނު ގެއްލުމުގެ ބަދަލު ހޯދުމަށް ބޮޑެތި އަދަދުތަކުން ޖޫރިމަނާކޮށްފައިވެއެވެ.