އާދިއްތަ ދުވަހު ކާބުލް ހިފުމަށްފަހު އަފްޣާނިސްތާނުގެ ވެރިކަމަށް އައިސްފައިވާ ޠާލިބާނުން، އިންޑިޔާ އާއެކު މުދާ އިމްޕޯޓްކުރުމާއި އެކްސްޕޯޓް ކުރުން ހުއްޓާލާފައިވާކަމަށް އިންޑިޔާއިން ބުނެފިއެވެ.
ޓައިމްސް އޮފް އިންޑިޔާއިން ރިޕޯޓްކޮށްފައިވާ ގޮތުގައި ފެޑެރޭޝަން އޮފް އިންޑިއަން އެކްސްޕޯޓް އޮގަނައިޒޭޝަން (އެފްއައިއީއޯ)ގެ ޑިރެކްޓަރ ޖެނެރަލް ޑރ. އަޖޭ ސަހާއީ ވިދާޅުވެފައިވަނީ ޠާލިބާނުން ވަނީ ޕާކިސްތާނު މަގުން މުދާ ގެންދިޔުން ހުއްޓާލާފައި ކަމަށެވެ. އެހެންކަމުން އިންޑިޔާއަށް މުދާ އެތެރެކުރުން ވެސް ހުއްޓާލާފައިވާ ކަމަށް އަޖޭ ވިދާޅުވިއެވެ.
އަފްޣާނިސްތާނުގެ މަޝްރަހު ގާތުން ބަލަމުން އަންނަކަމަށާއި މިހާރަށް ބަލާއިރު ޠާލިބާނުން ވަނީ ޕާކިސްތާނު މަގުން ކާގޯ އައުން ހުއްޓާލާފައިކަމަށް އަޖޭ ވިދާޅުވިއެވެ. އަފްޣާނިސްތާނު މަގުން މުދާ ގެންނަނީ ޕާކިސްތާނަށް މަޑުކުރުމަށްފަހު ކަމަށް އަޖޭ ވިދާޅުވިއެވެ. އެހެންކަމުން އިމްޕޯޓް މިވަނީ ހުއްޓިފައިކަމަށް އަޖޭ ވިދާޅުވިއެވެ.
އިންޑިޔާ އާއި އަފްޣާނިސްތާނަކީ އެތައް ޒަމާންތަކެއް ވަންދެން ވިޔަފާރީގެ ގުޅުންތައް ބާއްވަމުން އައި ދެގައުމެވެ. އިންޑިޔާއިން ވަނީ އަފްޣާނިސްތާނުގެ އެތައް ވިޔަފާރިއެއްގައި އިންވެސްޓްކޮށްފައެވެ.
އަހަރުމެންނަކީ ވިޔަފާރީގެ ކަންކަމުގައި އަފްޣާނިސްތާނުގެ އެންމެ ބޮޑު ބައިވެރިޔާ. އަހަރުމެން މިއަހަރު އެކަނިވެސް 835 މިލިއަން ޑޮލަރުގެ މުދާ އަފްޣާނިސްތާނަށް އެކްސްޕޯޓްކޮށްފައިވާނެ. އަފްޣާނިސްތާނުން އަހަރުމެން އެތެރެކުރަން 510 މިލިއަން ޑޮލަރުގެ މުދާ. މީގެއިތުރުން އެކިކަހަލަ ވިޔަފާރިތައް އަހަރުމެން އަފްޣާނިސްތާނުގައި އިންވެސްޓްކޮށްގެން މިއަންނަނީ ކުރިޔަށް ގެންދަމުން. އެގޮތުން 3 ބިލިއަން ޑޮލަރު އިންވެސްޓްކޮށްފައިވާއިރު 400ށް ވުރެ ގިނަ ޕްރޮޖެކްސްޓްތައް މިއަންނަނީ ހިންގަމުން. އޭގެތެރެއިން ބައެއް ޕްރޮޖެކްޓްތަކަކީ މިހާރުވެސް ހިންގަމުންދާ ޕްރޮޖެކްޓްތައް.ޑިރެކްޓަރ ޖެނެރަލް ޑރ. އަޖޭ ސަހާއީ / އެފްއައިއީއޯ
އިންޑިޔާއިން މިހާރު އަފްޣާނިސްތާނަށް ގެންދާ މުދަލުގެ ތެރޭގައި ބޭހުގެ ސާމާނާއި، ސައި، ކޮފީ އަދި ހަކުރުފަދަ ބާވަތްތައް ހިމެނެއެވެ. އަފްޣާނިސްތާނުން އިންޑިޔާއަށް އެތެރެކުރާ މުދަލުގެ ތެރޭގައި ބޮޑަށް ހިމެނެނީ ހިކި މޭވާގެ ބާވަތްތަކެވެ. މީގެއިތުރުން ކޮންމެސްވަރަކަށް ފިޔާ ވެސް އެތެރެކުރާކަމަށް އަޖޭ ވިދާޅުވިއެވެ.
އަޖޭ ވިދާޅުވީ، ބަދަލުވަމުންދާ އަފްޣާނިސްތާނުގެ މަޝްރަހާއެކު ވެސް އިންޑިޔާއިން އުންމީދުކުރަނީ ކުރިއެކޭ އެއްގޮތަށް ދެގައުމުގެ ދެމެދުގައި ވިޔަފާރީގެ ގުޅުން އޮންނާނެ ކަމަށެވެ.
ވަރަށް އަވަހަށް އަފްޣާނިސްތާނުގެ މިހާރުގެ ސަރުކާރަށް ވެސް ވިޔަފާރިތައް ކުރިޔަށްގެންދިޔުމަކީ މުހިންމު ކަމެއްކަން ވިސްނޭނެކަމާމެދު ޝައްކެއް ނުކުރަން. އައު ސަރުކާރަށް ސިޔާސީ ގޮތުން އެމީހުން ބަލައިގަތުމަކީ މުހިންމު ކަމަކަށްވާއިރު އެކަމުގައި އިންޑިޔާއަކީ މުހިންމު ދައުރެއް އަދާކުރެވޭނެ ގައުމެއް.ޑިރެކްޓަރ ޖެނެރަލް ޑރ. އަޖޭ ސަހާއީ / އެފްއައިއީއޯ
ފެޑެރޭޝަން އޮފް އިންޑިޔާ އެކްސްޕޯޓް އޯގަނައިޒޭޝަނުން ވަނީ ކުރިޔަށް އޮތްތަނުގައި އިންޑިޔާގައި ހިކި މޭވާގެ ބާވަތްތަކުގެ އަގު މައްޗަށް ހިނގައިދާނެކަމަށް އަންދާޒާކޮށްފައެވެ. ހިކި މޭވާގެ 85 އިންސައްތަ އިންޑިޔާއަށް އެތެރެކުރަނީ އަފްޣާނިސްތާނުންނެވެ.
