އެމްޑީޕީގެ އެތެރޭގެ އިންތިޚާބުގައި ވާދަކުރުމުގެ ޝަރުތު ފުރިހަމަ ނުވާކަން ނިންމާފައިވާ ނިންމުން އަލުން މުރާޖަޢާކޮށްދެއްވައި, ޕާޓީން ކަނޑައަޅާފައިވާ އުޞޫލުތަކާ އެއްގޮތަށް އެމްޑީޕީގެ, ދާއިރާތަކުގެ އިންތިޚާބުގައި ވާދަކުރެއްވުމުގެ ފުރުސަތު ހަމަޖައްސަވައި ދެއްވުމަށް އަކްރަމް ކަމާލުއްދީން އެމްޑީޕީގައި އެދިވަޑައިގެންފިއެވެ.

ހޯމަ ދުވަހު އެމްޑީޕީން އަކްރަމަށް ފޮނުވި ސިޓީގައި ބުނެފައިވަނީ މި އަހަރުގެ އެޕްރީލް 24ގައި ހުޅުވާލި, ދާއިރާތަކުގެ އިންތިޚާބަށް ކުރިމަތިލެއްވި ކެންޑިޑޭޓުންގެ ތެރެއިން, ޤައުމީ ހިންގާ ކޮމިޓީގެ ނިންމުމާ އެއްގޮތަށް ޝަރުތު ހަމަވާ ބޭފުޅުން ބެލުމަށް، ކަމާ ގުޅުންހުރި އިދާރާތަކަށް ފޮނުވުމުން އޭގެ ތެރެއިން އަކްރަމްގެ މައްސަލައެއް ބަލަމުން އަންނަ ކަމަށް އޭސީސީން ބުނެފައިވާ ކަމަށެވެ. އެހެންކަމުން ޝަރުތު ހަމަނުވާކަމަށް ބަލައި އިންތިޚާބުގައި ވާދަކުރެއްވުމުގެ ފުރުސަތު އަކްރަމަށް ނާރުވަން ނިންމާފައިވާ ކަމަށެވެ.

އަކްރަމަށް އިންތިޚާބުގައި ވާދަކުރެއްވުމުގެ ފުރުސަތު ނާރުވަން ނިންމިއިރު، އޭސީސީން އަކްރަމްގެ މައްސަލައެއް ބަލަމުން ނުދާކަމަށް އެ ކޮމިޝަނުން އަކްރަމަށް ވަނީ އަންގާފައެވެ.

އެމްޑީޕީގެ ޗެއަރޕާރސަން ޙަސަން ލަޠީފަށް އެޑްރެސް ކުރައްވައި، އަންގާރަ ދުވަހު އަކްރަމްގެ ފަރާތުން ފޮނުވި ސީޓީގައި މައިގަނޑު 10 ކަމެއް ފާހަގަކޮށްފައިވެއެވެ. އަކްރަމް ވިދާޅުވެފައިވަނީ، ޕާޓީގެ ދާއިރާތަކުގެ އިންތިޚާބުގައި ވާދަކުރައްވާ ފަރާތްތަކުގެ ޝަރުތުތައް ޕާޓީގެ އެއްވެސް ގަވާއިދެއްގައި ބަޔާންކޮށްފައި ނުވާކަމަަށެވެ.

އަކްރަމް ވިދާޅުވެފައިވަނީ، ޤައުމީ ހިންގާ ކޮމިޓީން ނިންމާފައިވާ ނިންމުން ތަކުގައި ބަޔާން ކޮށްފައިވާ، "ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީ"އާއި މަރު ކޮމިޝަނުން ނެރުނު އެއްވެސް ރިޕޯޓެއްގައި، ކުށެއް ކުރިކަމަށް ނުވަތަ ކުށެއް ކުރުމުގައި ބައިވެރިވެފައިވާ ކަމަށް ބަޔާންކޮށްފައެއް ނުވާކަމަށެވެ. އަދި ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީ އިން ރައްޔިތުންގެ މަޖިލީހަށް ފޮނުވާފައިވާ, އެމްއެމްޕީއާރުސީ މައްސަލައާ ގުޅޭ ލިސްޓުގައިވާގައިވާ ގޮތުން އެކޮމިޝަނުން ވަނީ އަކްރަމްގެ މައްޗަށް ޖިނާއިީ ދަޢުވާ ނުކުރުމަށް ނިންމައި މައްސަލަ ކުލޯޒް ކޮށްފައިކަމަށެވެ.

ޝަރުތު ފުރިހަމަނުވާކަމަށް ނިންމާފައިވަނީ އެންޓި-ކޮރަޕްޝަން ކޮމިޝަން (އޭސީސީ)ގައި މައްސަލައެއް ވާކަމަށް އަންގާފައިވާތީ ކަމަށް ބަޔާންކޮށްފައި ވީނަމަވެސް 24 އޭޕްރީލް 2021ގައި ބޭއްވުނު ޕާޓީގެޤައުމީ ހިންގާ ކޮމިޓީގެ ބައްދަލުވުމުގައި ނިންމާފައިވާ ނިންމުމަށް ރިއާޔަތްކުރާއިރު އޭސީސީން މައްސަލައެއް ހުށަހެޅިފައި އޮތުމަކީ ނުވަތަ މައްސަލައެއް ބަލަމުންދިއުމަކީ ޝަރުތު ފުރިހަމަނުވާނެ ސަބަބެއް ނޫންކަމަށް އަކްރަމް ވިދާޅުވެފައިވެއެވެ. އަކްރަމް ވިދާޅުވީ، އެސީސީން ބަލަމުންދާ ނުވަތަ ބަލާފައިވާ މައްސަލައަކާ ގުޅިގެން ޝަރުތު ފުރިހަމަ ނުވާނީ އެމައްސަލައަކީ އެމް.އެމް.ޕީ.އާރ.ސީގެ ޚިޔާނާތާ ގުޅިގެން އެ ކޮމިޝަނުން ތައްޔާރުކޮށްފައިވާ ރިޕޯޓެއްގައި ފިޔަވަޅު އަޅައިދިނުމަށް އެދި އެއްވެސް މުއައްސަސާތަކަށް ނަން ފޮނުވާފައިވާ 92 ނަމަށް ކަމަށެވެ.

އެމް.އެމް.ޕީ.އާރ.ސީގެ ޚިޔާނާތާއި ގުޅިގެން އޭސީސީން ތައްޔާރުކޮށްފައިވާ އެއްވެސް ރިޕޯޓެއްގައި ފިޔަވަޅު އަޅައިދިނުމަށް އެދި އެއްވެސް މުއައްސަސާތަކަށް ފޮނުވާފައިވާކަމެއް އެނގިވަޑައިނުގަންނަވާ ކަމަށްވެސް އަކްރަމް ވިދާޅުވެފައިވެއެވެ. އަދި އެފަދަ އެންގުމެއް އެއްވެސް އިދާރާއަކަށް އެންގިކަމެއް އެސީސީންވެސް ހާމަކޮށްފައެއް ނުވާކަމަށް އަކްރަމްގެ ފަރާތުން ޗެއަރޕާސަނަށް ފޮނުވިސިޓީގައި ވިދާޅުވެފައިވެއެވެ.

އޭސީސީން 2018ގައި ނެރުނު ލިސްޓެއްގައި ނަން ހިމެނިފައިވާތީ، އެކަމާ ގުޅޭގޮތުން އެކޮމިޝަނަށް ފޮނުވި ސިޓީގެ ޖަވާބުގައި, އަކްރަމްގެ މައްޗަށް ތުހުމަތު ކުރެވޭ ކޮރަޕްޝަންގެ އެއްވެސް މައްސަލައެއް އެކޮމިޝަނުން ބަލަމުން ނުދާކަމަށް ބުނެފައިވާކަމަށްވެސް ސިޓީގައި ބަޔާން ކޮށްފައިވެއެވެ.

އެމް.އެމް.ޕީ.އާރ.ސީގެ ޚިޔާނާތާ ގުޅިގެން ނުވަތަ އެނޫންވެސް ކޮރަޕްޝަންގެ އެއްވެސް މައްސަލައެއްގެ ތުޙުމަތުގައި މިހާތަނަށް ސުވާލުކޮށްފައި ނުވާ ކަމަށާއި، އެކޮމިޝަނުން ބަލައި ތަޙްޤީޤުކުރާ މައްސަލައެއްގައި ތުހުމަތުކުރެވޭ ފަރާތަށް އޭނާގެ ދިފާޢުގައި ވާހަކަ ދެއްކުމުގެ ފުރުސަތު ނުވަތަ އޭނާގެ ދިފާޢުގައި ޤާނޫނީ ވަކީލެއް ތަމްސީލްކުރުމުގެ ފުރުޞަތު ދޭންވާނެކަމަށް ބަޔާންކޮށްފައިވާ ހިނދު، އެފަދަ ފުރުސަތެއް އެ ކޮމިޝަނުން ދީފައި ނުވާނަމަ، އެ މައްސަލައާ ގުޅޭގޮތުން އެކޮމިޝަނުން ނިންމާފައިވާ ނިންމުމަކީ ސައްހަ ނިންމުމެއް ކަމަށް ނުބެލެވޭ ކަމަށް އަކްރަމް ވިދާޅުވިއެވެ.

އަކްރަމް ވިދާޅުވީ، ޤާނޫނުގައި ކަނޑައެޅިގެން ބަޔާންކޮށްފައިވާ އިޖުރާއަތްތަކާ ޚިލާފަށް މައްސަލަ ބަލައި ފިޔަވަޅުއެޅުމަށް އެ ކޮމިޝަނުން ދަޢުލަތުގެ އެއްވެސް އިދާރާއަކަށް އަންގާނެކަމަށް ޤަބޫލެއް ނުކުރެވޭ ކަމަށާއި، އެފަދަ އެންގުމެއް އެ ކޮމިޝަނުން އަންގާފައިވާނަ އެ އެއެންގުމަކީ ޤާނޫނުގައި ބަޔާންކޮށްފައިވާ އިޖުރާތްތައް ފުރިހަމަ ނުކޮށް އަންގާފައިވާ އެންގުމަކަށްވާނެތީ އެ އެއެންގުމެއް ވާނީ ބާތިލް އެންގުމަކަށް ކަމަށެވެ.

އޭސީސީން މައްސަލަ ބަލައި ނިންމުމަށްފަހު މައްސަލައާބެހޭ ރިޕޯޓެއް އެމައްސަލަ ހުށަހެޅިފަރާތުން އެދިއްޖެ ހިނދެއްގައި އެފަރާތަށް ދިނުމަށާއި، އެމައްސަލައިގައި ޒިންމާ އުފުލަންޖެހޭ ފަރާތްކަމަށް ކޮމިޝަނަށް ފާހަގަކުރެވޭ ފަރާތަށް އެރިޕޯޓްގެ ކޮޕީއެއް ކޮމިޝަނުން ދޭންވާނެ ކަމަށް ކޮމިޝަންގެ ގާނޫނުގައި، ބަޔާންކޮށްފައިވާއިރު، އޭސީސީން ބެލި އެއްވެސް މައްސަލަކާ ގުޅިގެން އެފަދަ ރިޕޯޓެއް އެކޮމިޝަނުން އަކްރަމަށް އަރުވާފައި ނުވުމުން އެނގިގެންދަނީ އެކޮމިޝަނުން މިހާތަނަށް ބެލި އެއްވެސް މައްސަލައިގައި އަކްރަމް ޒިންމާ އުފުލަން ޖެހިވަޑައިގަންނަވާކަމެއް ފާހަގަކުރެވިފައި ނުވާކަންކަމުގައި, ސިޓީގައި ބަޔާން ކޮށްފައިވެއެވެ. އަދި ޒިންމާ އުފުލަންޖެހޭ ކަމެއް ނުވަތަ ފިޔަވަޅު އަޅަންޖެހޭ ކަމެއް ފާހަގަކުރެވިފައިވާނަމަ އެކަން މިހާތަނަށް އޭސީސީގެ ގާނޫނުގެ 25ވަނަ މާއްދާގެ (ށ) ދަށުން އަންގާނެކަމާއި އަދި އެ މާއްދާގައި ބުނާ ފަދަ ރިޕޯޓެއް މިހާތަނަށް ހިއްސާ ކޮށްފައި ނުވާ ކަމަށްވެސް އަކްރަމް ވަނީ ވިދާޅުވެފައެވެ.

ޕާޓީގެ އިންތިޚާބުގައި ވާދަކުރައްވާ ފަރާތްތަކުގެ ޝަރުތުތައް އިންތިޚށބާ ދިމާކޮށް ބަދަލުކުރުމަކީ ޑިމޮކްރެޓިކް މުޖުތަމަޢުތަކުގައި އަމަލުކުރަމުންދާ އުސޫލެއް ނޫން ކަމަށާއި، ޕާޓީގެ އަސާސީ ގަވައިދުގައި ނުހިމެނޭ ޝަރުތުތަކެއް ޕާޓީގެ ހިންގާ ކޮމެޓީގެ ބައްދަލުވުމަކުން ނިންމާ ނިންމުމަކުން އިތުރު ނުކުރެވޭނެ ކަމަށްވެސް އަކްރަމް ވިދާޅުވިއެވެ. އެފަދަ ބަދަލެއް ގެންނަން ޖެހޭނީ އަސާސީ ގަވައިދަށް ކަމަށާއި، އަސާސީ ގަވާއިދަށް ބަދަލު ގެނެވޭނީ ވަކި އިޖުރާއަތްތަކެއްގެ މަތިން ކަމަށްވާއިރު ޕާޓީގެ އެތެރޭގެ އިންތިޚާބުގައި ވާދަކުރައްވާ ފަރާތްތަކުގެ ޝަރުތުތައް ކަނޑައަޅާފައި މިވަނީ އެ އިޖުރާތްތަކާ އެއްގޮތަށް ނޫން ކަމަށްވެސް އަކްރަމްވަނީ ފާހަގަ ކުރައްވާފައެވެ.

އެހެންކަމުން ދާއިރާ ތަކުގެ އިންތިޚާބަށް ޝަރުތު ފުރިހަމަނުވާކަމަށް ނިންމާފައިވާ ނިންމުމަކީ ޕާޓިން ކަނޑައަޅާފައިވާ އުޞޫލުތަކާ ޚިލާފަށް ނިންމާފައިވާ ނިންމުމެ ކަމަށް އަކްރަމް ވިދާޅުވިއެވެ. އެމްއެމްޕީއާރުސީގެ ޚިޔާނާތާ ގުޅިގެން ތުހުމަތެއްކޮށް އެއްވެސް ތަޙުޤީޤެއް މިހާތަނަށް ހިންގާފައި ނުވާއިރު، އަދި އެއްވެސް ފިޔަވަޅެއް އެޅުމަށް މިހާތަނަށް އޭސީސީން އެއްވެސް މުއައްސަސާއަކަށް ފޮނުވާފައިނުވާއިރު, ވާދަ ނުކުރެވޭނެ ކަމަށް ނިންމި ނިންމުމަކީ ސައްހަ ނިންމުމެއް ނޫންކަމަށް އަކްރަމް ވިދާޅުވިއެވެ.