އޭއެފްސީ ކަޕްގެ ދެކުނު އޭޝިއާ ގްރޫޕްގެ ޕްލޭއޮފް މެޗުގައި އިންޑިއާގެ ބެންގަލޫރު އެފްސީ އަތުން ބަލިވުމުން ހިތްހަމަނުޖެހޭ ކަމަށް ކުލަބު އީގަލްސްގެ ކޯޗު މުޙައްމަދު ޝާޒްލީ ބުނެފިއެވެ.
އީގަލްސްއިން އޭއެފްސީ ކަޕާ ދިމާކޮށް ވަނީ އެ ޓީމުގެ ސްކޮޑް ވަރުގަދަކޮށްފައެވެ. އެގޮތުން ރާއްޖޭގައި އުފެދުނު އެންމެ މޮޅު ފުޓުބޯޅަ ކުޅުންތެރިޔާ އަލީ އަޝްފާގު (ދަގަނޑޭ) ގެ އިތުރުން ތަޖުރިބާކާރު ހަ ކުޅުންތެރިން ވަނީ ގެނަސްފައެވެ. އެކަމަކު ބަލިވެ އުޅުމުގެ ސަބަބުން މި މެޗުގައި ދަގަނޑޭއަށް ކުޅެވޭ ގޮތް ވަނީ ނުވެފައެވެ. މި މެޗުން ބެންގަލޫރު މޮޅުވީ 1-0 ގެ ނަތީޖާއަކުންނެވެ.
މެޗަށް ފަހު އޮތް ނޫސްވެރިންގެ ބައްދަލުވުމުގައި ވާހަކަދައްކަމުން ޝާޒްލީ ބުނީ އެންމެ ފަހު މިނެޓާ ހަމައަށްވެސް ދަގަނޑޭ މެޗު ކުޅުމަށް މަސައްކަތްކުރި ކަމަށާއި، އެކަމަކު ބަލިވެ އުޅުމުގެ ސަބަބުން ދަގަނޑޭއަށް މެޗު ކުޅެވޭ ގޮތް ނުވީ ކަމަށެވެ. އަދި ދަގަނޑޭ އަކީ ބަލިވެ ހުރެވެސް މެޗު ކުޅެމުން އައި ހިތްވަރުގަދަ ކުޅުންތެރިއެއް ކަމަށް ޝާޒްލީ ބުންޏެވެ. އަދި ބުނީ ބެންގަލޫރާ ދެކޮޅަށް ކުޅެން ޖެހުމުން މި މެޗަކީ އުނދަގޫ މެޗެއްކަން އެނގުނު ކަމަށާއި، އެހެންކަމުން ހުރިހާ ކަމެއް ރޭވީ ދަގަނޑޭ ލައިގެން ކަމަށެވެ. އަދި ފަހު ވަގުތު އޭނާއަށް ނުކުޅެވުމުން އުނދަގޫތަކެއް ދިމާވި ކަމަށްވެސް ވަނީ ބުނެފައެވެ.
މެޗާ ބެހޭ ގޮތުން ވާހަކަ ދައްކަމުން ޝާޒްލީ ބުނީ މެޗުގައި ޖުމްލަކޮށް އީގަލްސްގެ ކުޅުންތެރިންގެ ފަރާތުން ފެނިގެންދިޔަ ކުޅުން ރަނގަޅު ކަމަށާއި، އެގޮތުން ލަނޑު ޖަހަން ފުރުސަތުތަކެއްވެސް ތަނަވަސްކުރި ކަމަށެވެ. އެކަމަކު ތަފާތަކަށްވީ ބެންގަލޫރުން ލަނޑު ޖެހުން ކަމަށާއި، އެ ލަނޑަށްފަހުވެސް ލަނޑު ޖެހުމުގެ ފުރުސަތުތަކެއް އީގަލްސްއަށް ލިބި ބޭކާރުވި ކަމަށްވެސް ޝާޒްލީ ބުންޏެވެ.
ބެންގަލޫރުގެ ކޯޗު މާކޯ ޕެއްޒައިއޯލީ ބުނީ މެޗުގައި މޮޅަށް ކުޅުނީ ބެންގަލޫރު ޓީމުން ކަމަށާއި، ލަނޑު ޖަހަން ފުރުސަތުތައް ތަނަވަސްކުރީވެސް އެ ޓީމުން ކަމަށެވެ. އެކަމަކު މިއީ ބެންގަލޫރުން އެންމެ މޮޅަށް ކުޅުނު މެޗު ނޫން ކަމަށް ވަނީ ބުންޏެވެ.
ޕެއްޒައިއޯލީ ބުނީ މެޗުގެ ވަކި ހިސާބަކުން އެޓީމުން މަތިން ބޯޅަތަކެއް ކުޅެފައިވާ ކަމަށާއި، އެކަމާއި ހިތްހަމަ ނުޖެހޭ ކަމަށެވެ. އަދި އެކަންކަން ރަނގަޅުކުރެވޭނީ ގިނަ މެޗުތަކެއް ކުޅެގެން ކަމަށާއި، މި މުބާރާތަކީ އެ ޓީމުން ޕްރީ-ސީޒަން މުއްދަތުގައި ކުޅޭ މުބާރާތެއް ކަމަށްވެސް ވަނީ ބުނެފައެވެ.
މި މެޗުން މޮޅުވެ މުބާރާތުގެ ގްރޫޕް ސްޓޭޖަށް ބެންގަލޫރު ދަތުރުކުރިއިރު، ގްރޫޕް ސްޓޭޖުގައި ދެން ހިމެނޭ ޓީމުތަކަކީ ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަނުގެ އިތުރުން އިންޑިއާގެ މޯހަން ބަގާން އާއި ބަންގްލަދޭޝްގެ ޗެމްޕިއަން ބަޝުންދަރާ ކިންގްސްއެވެ.
