އީގަލްސް ބަލިކޮށް ބެންގަލޫރު ގްރޫޕް ސްޓޭޖަށް

އޭއެފްސީ ކަޕުގެ ޕްލޭއޮފް މެޗުގައި ރާއްޖޭގެ ކުލަބު އީގަލްސް ބަލިކޮށް ދެކުނު އޭޝިއާއަށް ޚާއްސަ ގްރޫޕް ޑީގެ ޖާގައެއް އިންޑިއާގެ ބެންގަލޫރު އެފްސީން ހޯދައިފިއެވެ.

އާދީއްތަ ދުވަހުގެރޭ ގައުމީ ފުޓްބޯޅަ ދަނޑުގައި ކުޅުނު މެޗުން ބެންގަލޫރު މޮޅުވީ 1-0 ގެ ނަތީޖާއަކުންނެވެ.

މި މެޗުގައި އީގަލްސްއިން ކުޅުނީ އިތުބާރު ފޯވާޑް އަދި ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގް (ދަގަނޑޭ) ނުހިމަނައެވެ. މައުލޫމާތު ލިބޭ ގޮތުން މި މެޗުގައި ދަގަނޑޭ ނުކުޅުނީ އޭނާގެ ސިއްހީ ހާލަތު ހުރި ގޮތުންނެވެ.

މެޗު ފަށައިގެން ބެންގަލޫރުން މެޗުގެ ކޮންޓްރޯލް ނަގައި އީގަލްސްގެ ހާފަށް ބާރުބޮޑުކުރިއިރު، މެޗުގެ 10 ވަނަ މިނެޓުގައި އެ ޓީމުގެ ޔޮރުންޑޫ މުސާވަރު ކިންގް ވަނީ ނުރައްކާރި ހަމަލާއެއް ފޮނުވާލާފައެވެ. އެކަމަކު އެ ހަމަލާ އީގަލްސްގެ ގޯލްކީޕަރު މުޙައްމަދު ފައިސަލް ވަނީ ހުށިޔާރު ކަމާއެކު ދިފާއުކޮށްފައެވެ. އޭގެ ފަހުން މެޗުގެ 13 ވަނަ މިނެޓުގައި އީގަލްސްގެ އިސްމާޢީލް އީޝަ (މެސީ) އަށް ވަނީ ލަނޑު ޖަހަން ހުސް ފުރުސަތެއް ލިބި ބޭކާރުވެފައެވެ. އަދި މެޗުގެ 25 ވަނަ މިނެޓުގައި ބެންގަލޫރުގެ ސްލެޓަން އޮގެސްޓޯ ނުރައްކާތެރި ހަމަލާއެއް ފޮނުވާލި ނަމަވެސް، އެ ހަމަލާވެސް ފައިސަލް ވަނީ ހުށިޔާރު ކަމާއެކު ދިފާއުކޮށްފައެވެ.

މި މެޗުގައި ބެންގަލޫރުން ލީޑު ނެގީ 26 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ޖަޔޭޝް ދިމިކް ރަނޭއެވެ. އޭގެ ފަހުން މެޗުގެ 35 ވަނަ މިނެޓުގައި އީގަލްސްގެ މެސީ ގޯލު ރޮނގު މައްޗަށް ރަނގަޅު ބޯޅައެއް ހުރަސްކޮށްދިން ނަމަވެސް، އެ ޓީމުގެ މިޑްފިލްޑަރު އަސްހަދު އަލީ (އަޑުބަރޭ) އަށް އެ ބޯޅަ ފޮނުވާލެވޭ ގޮތެއް ނުވިއެވެ.

މި މެޗުގެ ދެވަނަ ހާފު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ 66 ވަނަ މިނެޓުގައި އީގަލްސްގެ އަލީ ފާސިރު (ސެންޓޭ) އަށް ވަނީ ލަނޑު ޖަހަން ހުސް ފުރުސަތެއް ލިބި ބޭކާރުވެފައެވެ. އެގޮތުން އޭރިއާ ތެރެއިން ބެންގަލޫރުގެ ދެ ކުޅުންތެރިން ކައިރިން ނައްޓާލުމަށްފަހު ސެންޓޭ ފޮނުވާލި ބޯޅަ ދިޔައީ އަރިމަތީ ދަނޑި ކައިރިން ބޭރަށެވެ.

ދެވަނަ ހާފުގެ ފަހު 20 މިނެޓުގެ ތެރޭގައި ބެންގަލޫރުން އީގަލްސްގެ އޭރިއާގެ ތެރެއަށް ގިނަ ހުރަސްތަކެއް ނެގިއިރު، މި ހުރަސްތައް އީގަލްސްގެ ޑިފެންޑަރުން ވަނީ ދިފާއުކޮށްފައެވެ. މި ހާފުގައި ބެންގަލޫރު ޓީމަށް ލިބުނު އެންމެ ހުސް ފުރުސަތު ލިބުނީ މެޗުގެ 83 ވަނަ މިނެޓުގައި ލިއޯން އޮގަސްޓައިންއަށެވެ. އެކަމަކު އޭނާ ހުހަށްހުރެ ފޮނުވާލި ހަމަލާ ދިޔައީ މަތީ ދަނޑި މަތިން ބޭރަށެވެ.

މި މޮޅާއެކު ބެންގަލޫރުން މުބާރާތުގެ ގްރޫޕް ސްޓޭޖުގެ ޖާގައެއް ކަށަވަރުކުރިއިރު، ގްރޫޕް ސްޓޭޖުގައި ދެން ހިމެނޭ ޓީމުތަކަކީ ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަނުގެ އިތުރުން އިންޑިއާގެ މޯހަން ބަގާން އާއި ބަންގްލަދޭޝްގެ ޗެމްޕިއަން ބަޝުންދަރާ ކިންގްސްއެވެ. ގްރޫޕް ސްޓޭޖުގެ މެޗުތައް ކުރިއަށްދާނީ މި މަހުގެ 18، 21 އަދި 24 ވަނަ ދުވަހު މާލޭގައެވެ.