ރޭގަނޑު ހޭލައި ތިބެފައި، ފަތިހުގެ ވަގުތުގައި ނިދާ މީހުންނަށް، ދެ ޣަނީމާއެއް ގެއްލިގެންދާނެ ކަމަށް ހުކުރު ޚުތުބާގައި ބުނެފިއެވެ.

''ރިޒުގު ހޯދުމަށް މަސައްކަތް ކުރުން'' މި މައުޟޫއަށް ރާއްޖޭގެ އެކި ކަންކޮޅުތަކަށް އިއްވި ހުކުރު ޚުތުބާގައި ބުނީ ފުރަތަމަ ޣަނީމާއަކީ، ފަތިސް ނަމާދު ކަމަށާއި، ދެވަނަ ޣަނީމާއަކީ، ދުވާލު ފެށޭ ވަގުތުގެ ބަރަކާތް ކަމަށެވެ. ރޭގަނޑު ހޭލައި ތިބެފައި، ފަތިހުގެ ވަގުތުގައި ނިދާ މީހުންނަށް، ދެ ޣަނީމާއެއް ގެއްލިގެންދާނެކަން ފާހަގަކޮށް ޚުތުބާގައި ބުނީ އެކަމުގެ ސަބަބުން އޭނާގެ ރިޒްގުން ބަރަކާތްކެނޑިގެން ދާނެ ކަމަށާއި، މާތް ﷲ އޭނާގެ މައްޗަށް ވާޖިބު ކޮށްފައިވާ ހައްގު އަދާ ނުކުރާމީހާއަށް، އެ ދުވަސް އަބާއްޖަވެރި ދުވަހަކަށް ވާނެ ކަމަށެވެ.

ޚުތުބާގައި ބުނީ ކީރިތި ރަސޫލާ ވަނީ މިވަގުތުގައި އެކަލޭގެފާނުގެ އުއްމަތަށް ބަރަކާތް ލެއްވުން އެދި ވަޑައިގެން ދުއާ ކުރައްވާފައި ކަމަށެވެ. ނަމަވެސް މި ވަގުތުގެ ބަރަކާތުން އިންސާނާ މަޙުރޫމު ކުރެވޭތޯ، ޝައިޠާނާ ގަދައަޅައި މަސައްކަތް ކުރާނެ ކަމަށާއި، އޭނާއަށް ރޭގަނޑު ހޭލައި ހުރެ، މަޖާކުރުން ޒީނަތްތެރިކޮށްދީ، ފަތިހު ތެދުވިޔަ ނުދިނުމަށް، އެ ޝައިޠާނާ މަސައްކަތް ކުރާނެ ކަމަށް ޚުތުބާގައި ބުނެފައިވެއެވެ. މި ފަދަ މީހާގެ ގާތަށް ނިދި އަންނާނީ ފަތިސް ނަމާދުގެ ވަގުތު ކައިރިވުމުން ކަމަށާއި، މި މީހާއަށް ފަތިސް ނަމާދު ވެސް އަދި ދުވާލުގެ ފެށުން ވެސް ގެއްލުނީ ކަމަށް ޚުތުބާގައި ބުނެފައިވެއެވެ.

މިއީ ވަރަށް ދެރަ ކަމަކަށް ވުމާއެކު ދުވާލުގެ ފެށުމުގައި ލިބޭ ދެ ޣަނީމާ ހޯދުމަށް މަސައްކަތްކުރާ ހީވާގި މުރާލި ބަޔަކަށްވުމަށް ޚުތުބާގައި ވަނީ ގޮވާލާފައެވެ.

ޚުތުބާގައި ބުނީ ރިޒްގު ހޯދުމަށް މަސައްކަތް ކުރުމަކީ، މާތްﷲ އެކަލާނގެ ހެއްދެވި މަޚްލޫޤުންގެ ކިބާގައި ލައްވާފައިވާ ފިތުރީ ކަމެއް ކަމަށާއި، ކޮންމެ ދުވަހަކު ހެނދުނު، ކޮންމެ މީހަކު ވެސް އެކަމަށް އަވަސްވެގަންނަތަން ފެންނަ ކަމަށެވެ. އެ މީހަކަށް އެނގިފައިވާ މަސައްކަތެއް ކޮށްގެން ނުވަތަ އެ މީހަކަށް ލިބިފައިވާ މުދަލެއް ހޭދަކޮށްގެން ކޮންމެ މީހަކު ވެސް އެ މީހަކަށް މިންވަރު ކުރައްވާފައިވާ ރިޒްގު ލިބޭތޯ މަސައްކަތް ކުރާ ކަމަށް ޚުތުބާގައި ބުނެފައިވެއެވެ.

މީގެ އިތުރުން ޚުތުބާގައި ބުނީ ދޫނިސޫފާސޫފި ވެސް ހެނދުނު ވުމުން އެ ސޮރުމެންގެ ހާލިތަކުން އުދުހިގެން ދަނީ، އެ ސޮރުމެންގެ މައްޗަށް މާތް ﷲ އެ ދުވަހަށް ކަނޑައަޅުއްވާފައިވާ ރިޒްގު ހޯދުމަށް ކަމަށެވެ. އެހެންކަމުން ކާމިޔާބު މީހަކީ، މަސައްކަތުން އޭނާގެ ހަޔާތް އާރާސްތު ކުރާ މީހާ ކަމަށާއި، އޭނާގެ ނިތްކުރިން އޮހޮރޭ ދަލުން އޭނާގެ އުއްމީދުތަކުގެ އޮށްތަކަށް ފެންދީ ހައްދާ މީހާ ކަމަށް ޚުތުބާގައި ބުނެފައިވެއެވެ. އަދި ރިޒުގު ހޯދުމުގައި މާތް ﷲ އަށް ވަކީލު ކުރަންޖެހޭ ކަމަށާއި، މާތް ﷲގެ ތައުފީގާއި، ބަރަކާތް ލިބުން އެދި، މާތް ﷲ އަށް ދަންނަވައި، އެކަމަށް ކުރިމަތިލުމަށް ޚުތުބާގައި އެދިފައިވެއެވެ.

ޚުތުބާގައި ބުނީ ރިޒުގުގައި ބަރަކާތްލައްވާ ކަންތައްތަކުގެ ތެރޭގައި ރަހިމުގެ ގުޅުން ދެމެހެއްޓުމާއި، ގާތްތިމާގެ މީހުންނަށް ހެޔޮ ފޯރުވުން ހިމެނޭ ކަމަށެވެ. އަދި ފަގީރުންނާއި މުހުތާދުވެރިންނަށް ހޭދަކުރުން ހިމެނޭ ކަމަށް ޚުތުބާގައި ބުނެފައިވެއެވެ. އަދި ޚުތުބާގައި ބުނީ ދަތިހާލު ޖެހިފައިވާ މީހަކަށް ލުއި ފަސޭހަކޮށްދިން މީހާއަށް މާތްﷲ ލުއި ފަސޭހަކޮށްދެއްވާނެ ކަމަށާއި، ކަންބޮޑުވެފައިވާ މީހެއްގެ ކަންބޮޑުވުން ފިލުވައިދިން މީހާގެ ކަންބޮޑުވުންތައް ﷲ ފިއްލަވައި ދެއްވާނެ ކަމަށެވެ.