ވިޔަރެއާލް ބަލިކޮށް ޗެލްސީން ސުޕަ ކަޕް ކާމިޔާބުކޮށްފި

ޔޫރޮޕާ ލީގުގެ ޗެމްޕިއަން ވިޔަރެއާލް ބަލިކޮށް ޗެމްޕިއަންސް ލީގުގެ ޗެމްޕިއަންކަން ހޯދި ޗެލްސީން ޔުއެފާ ސުޕަ ކަޕް ކާމިޔާބުކޮށްފިއެވެ.

ޔޫރަޕުގެ ސީޒަން ހުޅުވާ މެޗު ޗެލްސީން ކާމިޔާބުކުރީ ޕެނަލްޓީގައި 6-5 ގެ ނަތީޖާއަކުންނެވެ. މިއީ ޗެލްސީން ސުޕަ ކަޕް ކާމިޔާބުކުރި ދެވަނަ ފަހަރެވެ. އެ ޓީމުން އެންމެ ފުރަތަމަ ސުޕަ ކަޕް ކާމިޔާބުކުރީ 1998 ވަނަ އަހަރު ރެއާލް މެޑްރިޑާ ދެކޮޅަށް ކުޅެގެންނެވެ. އޭގެ ފަހުން ސުޕަ ކަޕުގައި ކުޅުނު ތިން ފަހަރުވެސް ޗެލްސީ ވަނީ ބަލިވެފައެވެ.

ނޯދަން އަޔަލެންޑުގެ ވެރިރަށް ބެލްފާސްޓުގެ ވިންޑްސޯ ޕާކުގައި ކުޅުނު މެޗު ބަލަން 13،000 ސަޕޯޓަރުން ވަނީ ދަނޑަށް ވައްދާފައެވެ. ބުދަ ދުވަހުގެރޭ ކުޅުނު މެޗުގައި ދެ ޓީމުގެ ފަރާތުން ފޯރިގަދަ ކުޅުމެއް ފެނިގެންދިޔައިރު، މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ޗެލްސީންނެވެ. މެޗުގެ 27 ވަނަ މިނެޓުގައި ކައި ހަވާޓްޒް ތަނަވަސްކޮށްދިން ފުރުސަތަކުން މި ލަނޑު ޗެލްސީއަށް ކާމިޔާބުކޮށްދިނީ ހަކީމް ޒިޔެކެވެ. އެކަމަކު ފުރަތަމަ ހާފު ނިމެން ގާތް ވެފައި ވަނިކޮށް ކޮނޑަށް ލިބުނު އަނިޔާއެއްގެ ސަބަބުން ޒިޔެކް ވަނީ ބަދަލުކޮށްފައެވެ.

ޗެލްސީން ލީޑު ނެގި ފަހުން ވިޔަރެއާލުން އެ ޓީމުގެ އެޓޭކުތައް ވަރުގަދަކުރިއިރު، ފުރަތަމަ ހާފުގެ އިތުރު ވަގުތުގައި އަލްބާޓޯ މޮރޭނޯ ފޮނުވާލި ނުރައްކާތެރި ހަމަލާއެއް ވަނީ ގޯލުގެ ހުރަސް ދަނޑިއަށް އަމާޒުވެފައެވެ. އަދި ދެވަނަ ހާފުގެ ކުރީކޮޅު ވިޔަރެއާލުގެ ޖެރާޑް މޮރޭނޯއަށް ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާވެސް އަމާޒުވީ ގޯލުގެ ދަނޑިއަށެވެ. ނަމަވެސް މެޗުގެ 73 ވަނަ މިނެޓުގައި ބޫލޭ ޑިއާ ދިން ޕާހަކުން މޮރޭނޯ ވަނީ ލަނޑެއް ޖަހައި، ވިޔަރެއާލަށް ނަތީޖާ އެއްވަރުކޮށްދީފައެވެ.

މި މެޗުގެ ފުރިހަމަ ވަގުތު ހަމަވިއިރު ދެ ޓީމު 1-1 ގެ ނަތީޖާއަކުން އެއްވަރުވެފައި އޮތުމުން އިތުރު ވަގުތުގެ ދެ ހާފު ކުޅުނުއިރު، މި ދެ ހާފުގައިވެސް ލަނޑެއް ފެނިފައެއް ނުވެއެވެ. އެހެންކަމުން ނަތީޖާ ނެރުމަށް ޕެނަލްޓީ ޖެހިއިރު، ޕެނަލްޓީ ޝޫޓްއައުޓާ ދިމާކޮށް ޗެލްސީން ވަނީ ސްޕެއިނުގެ ގޯލްކީޕަރު ކެޕާ އަރިއްޒަބަލާގާ ކުޅެން އަރުވާފައެވެ. އަދި ޕެނަލްޓީ ޝޫޓްއައުޓުގައި ކެޕާ ވަނީ ވިޔަރެއާލުގެ ދެ ޕެނަލްޓީއެއް ހުއްޓުވައި، ޗެލްސީއަށް ސުޕަ ކަޕް ކާމިޔާބުކޮށްދީފައެވެ.

ވިޔަރެއާލް ބަލިކޮށް ޗެލްސީން ސުޕަ ކަޕް ކާމިޔާބުކުރިއިރު، މިއީ މި އަހަރުގެ ޖެނުއަރީ މަހު ޗެލްސީގެ ކޯޗުގެ މަގާމާ ތޯމަސް ޓުޗެލް ހަވާލުވިފަހުން އެ ޓީމުން ހޯދި ދެވަނަ ކާމިޔާބީއެވެ. ޓުޗެލް ވަނީ ޗެލްސީއާ ހަވާލުވިތާ ފުރަތަމަ ހަ މަސް ދުވަހުގެ ތެރޭގައި އެ ޓީމަށް ޗެމްޕިއަންސް ލީގު ކާމިޔާބުކޮށްދީފައެވެ.