ސްޓެލްކޯއަށް ދޫކޮށްފައިވާ ބިމެއް ހުސްކުރި މައްސަލަ ފުލުސް އޮފީހަށް!
7 އޯގަސްޓު 2021 | ހޮނިހިރު 11:23މިބިމަށް ގާތްގަނޑަކަށް ފަސްލައްކައެއް ހާ ރުފިޔާ ޚަރަދުކޮށްފައިވޭ
ސްޓެލްކޯއަށް ދޫކޮށްފައިވާ ބިން
އިންޑަސްޓްރިއަލް ވިލެޖުން، ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)އަށް ދޫކޮށްފައިވާ ބިމެއް މާލެ ސިޓީ ކައުންސިލުން ހުސްކުރި މައްސަލަ މޯލްޑިވްސް ޕޮލިސް ސަރވިސްއަށް ހުށަހަޅައިފިއެވެ.
މިމައްސަލައާ ގުޅިގެން ފުލުހުންގެ ތަހުގީގު ޓީމެއް ވަނީ އެސަރަހައްދަށް ގޮސް ތަހުގީގަށް ބޭނުންވާ މައުލޫމާތު އެއްކޮށްފައެވެ.
މިމައްސަލައާ ގުޅިގެން ސްޓެލްކޯގެ އޮފިޝަލަކު ވިދާޅުވީ އިންޑަސްޓްރިއަލް ވިލެޖުން އެކުންފުންޏަށް ދޫކޮށްފައިވާ 21000 އަކަފޫޓުގެ ބިމަކީ ބެކަޕް ޕަވަރ ޕްލާންޓް އެޅުމަށް ދޫކޮށްފައިވާ ބިން ކަމަށެވެ. މިބިމުގައި ގިނަ ޕްލޭންތަކެއް ކުރެވިފައިވާކަން ފާހަގަކުރައްވައި އޮފިޝަލް ވިދާޅުވީ, ތިލަފުށީގައި 150 މެގަވޮޓުގެ ޕަވަރ ޕްލާންޓެއް ގާއިމްކުރެވިގެންދާއިރު، އެއިން އުފައްދާ ކަރަންޓު މާލެއާއި ހަމައަށް ގެނައުމަށް މިބިމުގައި 132 ކޭބީ ސަބްސޭޝަނެއް ހުންނަން ޖެހޭ ކަމަށެވެ.
އޮފިޝަލް ވިދާޅުވީ އެސަބްސޭޓަޝަނާއެކު ތިލަފުށީ ބްރިޖުގެ ކޭބަލް އަޅާގޮތަށް ޑިޒައިން ކުރެވިފައިވާ ކަމަށެވެ. އެގޮތުން ޖޮއިންޓް ވޭވްތަކާއި ހުރިހާ ތަކެތި ޑިޒައިން ކުރެވިފައިވާ ކަމަށެވެ. އޭގެ އިތުރުން މިބިމުގައި މާލޭގެ މާފަންނު ސަރަހައްދުގެ ގްރިޑް މެއިންޓެއިން ކުރުމަށް ރިނިއުބަލް އެނަރޖީ ބޭނުންކޮށްގެން އުފައްދާ ކަރަންޓު ނުވަތަ ބެޓެރީ ބެކަޕް ސިސްޓަމެއް ގާއިމްކުރުމަށް ޕްލޭން ކުރެވިފައިވާ ކަމަށް އޮފިޝަލް ވިދާޅުވިއެވެ.
އެހެންކަމުން މިތަނަކީ ސްޓެލްކޯއަށާއި މާލޭގެ ގްރިޑް ސްޓެބިލިޓީއަށް ވަރަށް މުހިންމު ބިމެއްގެ ގޮތުގައި އޭނާ ފާހަގަކުރެއްވިއެވެ. އަދި އިންޓަރކަނެކްޝަން ގާއިމްވެގެން އަންނައިރު އެބިމުގައި ސަބްސްޓޭޝަނެއް ބެހެއްޓެން ނެތްކަމަށްވާނަމަ ގިނަ ދަތިތަކާ ކުރިމަތިވާނެ ކަަމަށެވެ.
މާލެ ސިޓީ ކައުންސިލުން މިބިން ހުސްކޮށްފައިމިވަނީ ސްޓެލްކޯއާ އެއްވެސް މަޝްވަރާ ކުރުމެއްނެތިއެވެ. މިސަރަހައްދު ހުސްކޮށްފައިވަނީ ފެންސް ޖަހައި ބަންދުކޮށްފައިވަނިކޮށެވެ. އަދި ބިމުގައި ހުރި މަސައްކަތްތަކަށް ބޭނުންވާ ބައެއް އާލާތްތައް ނެތްކަން ވެސް ސްޓެލްކޯއިން ފާހަގަކޮށްފައިވެއެވެ. ގާތްގަނޑަކަށް ފަސްލައްކައެއް ހާ ރުފިޔާ ޚަރަދުކޮށްގެން ބިން ލެވަލްކޮށް ސާފުކޮށްފައިވާ ކަމަށް ސްޓެލްކޯއިން ބުނެއެވެ.
