ކީރިތި ރަސޫލާ މަދީނާއަށް ކުރެއްވި ހިޖުރައިން ލިބިދީފައިވާ ފިލާވަޅުތަކުގެ ބޭނުން ހިފަންޖެހޭ: ޚުތުބާ
މި ފެށޭ ހަފުތާއަކީ، ހިޖުރީ އައު އަހަރެއް ފެށޭ ހަފްތާ
އިސްލާމީ މަރުކަޒުގައި ހުކުރު ނަމާދުކުރުމަށް ޖަމާއަތް ހަދައިގެން
ކީރިތި ރަސޫލާمُحَمَّدُ صَلَّى اللهُ عَلَيْهِ وَسَلَّمَމައްކާއިން މަދީނާއަށް ކުރެއްވި ހިޖުރައިން ލިބިދީފައިވާ ފިލާވަޅުތަކާމެދު ވިސްނައި، އެ ފިލާވަޅުތަކުގެ ބޭނުން ހިފުމަށް ހުކުރު ޚުތުބާގައި ގޮވާލައިފިއެވެ.
"ނަބަވީ ހިޖުރައިގެ ދަރުސްތަކުގެ ތެރެއިން" މި މައުޟޫއަށް ރާއްޖޭގެ އެކި ކަންކޮޅުތަކަށް އިއްވި ހުކުރު ޚުތުބާގައި ބުނީ މި ފެށޭ ހަފުތާއަކީ، ހިޖުރީ އާ އަހަރެއް ފެށޭ ހަފްތާކަމަށް ވާތީ، ކީރިތި ރަސޫލާ މައްކާއިން މަދީނާއަށް ކުރެއްވި ހިޖުރައާ މެދު ފުންކޮށް ވިސްނާލުމަކީ މިއަދު ކުރަންޖެހޭ ކަމެއް ކަމަށެވެ.
ޚުތުބާގައި ބުނީ ހިޖުރައިގެ މާނައަކީ، ތިމާގެ އަމިއްލަ ވަޒަން ދޫކޮށް އެހެން ރަށަކަށް ދިއުމަށްވުރެ މާފުޅާ މާނައެއް އޮތް ކަމެއް ކަމަށެވެ. އެގޮތުން ހިޖުރައިގެ އެންމެ މަތިވެރި މާނައަކީ ނުބައިކަންތައް ދޫކޮށް ހެޔޮކަމުގެ މަގަށް ރުޖޫއަވުން ކަމަށް ޚުތުބާގައި ބުނެފައިވެއެވެ.
ކީރިތި ރަސޫލާمُحَمَّدُ صَلَّى اللهُ عَلَيْهِ وَسَلَّمَމަދީނާއަށް ކުރެއްވި ހިޖުރައިގައި އެތަކެއް އިބްރަތްތަކަކާއި ދަރުސްތަކެއްވާކަން ފާހަގަކޮށް ޚުތުބާގައި ބުނީ ހިޖުރައިން ލިބޭ އަގުހުރި އެއްފިލާވަޅަކީ ދީނަށްޓަކައި ގުރްބާން ވުމުގެ މަތިވެރި ފިލާވަޅު ކަމަށެވެ. އެގޮތުން ކީރިތި ރަސޫލާمُحَمَّدُ صَلَّى اللهُ عَلَيْهِ وَسَلَّمَއެކަލޭގެފާނު އުފަންވެ ވަޑައިގެން ބޮޑުފުޅުވި ރަށާއި ގާތްތިމާގެ މީހުންނާއި އާއިލާގެ ބޭފުޅުން ދޫކުރައްވައި، މަދީނާއަށް ހިޖުރަ ކުރެއްވުމުގެ ދަތުރުފުޅު ފެއްޓެވީ މިދެންނެވި ކަންކަން އިސްލާމް ދީނުގެ ދިފާއުގައި ގުރްބާން ކުރައްވާފައިކަން ޚުތުބާގައި ފާހަގަކޮށްފައިވެއެވެ.
ހިޖުރައިން ލިބޭ ފިލާވަޅުތަކަށް އިޝާރާތްކޮށް ޚުތުބާގައި ބުނީ ކަމެއް ކާމިޔާބުވުމުގެ އެންމެ މުހިންމު ބަޔަކީ ކަމެއް ފެށުމުގެ ކުރިން އެކަމެއް ފުރިހަމައަށް ރޭވުމާއި ކަންކަންކުރާނެ ފަރާތްތައް ކަނޑައަޅައި ފުރިހަމައަށް ހަމަޖައްސާފައިވުން ކަމަށެވެ. އެގޮތުން ބަހާލެވިފައިވާ މަސައްކަތުގެ ތެރެއިން އަބޫބަކުރުގެފާނު ހަތަރުމަސް ކުރިން ދަތުރުގެ ސަވާރީ ތައްޔާރު ކުރައްވަން ފެއްޓެވި ފެއްޓެވުމަށް ޚުތުބާގައި އަލިއަޅުވާލާފައިވެއެވެ. އަދި އުނދަގޫ ވަގުތުގައި ވެސް އީމާންކަމުގެ އަހުލުވެރިން ސާބިތު ކަމާއެކު ތިބޭނެކަމުގެ ފިލާވަޅު ވެސް ކީރިތި ރަސޫލާمُحَمَّدُ صَلَّى اللهُ عَلَيْهِ وَسَلَّمَމައްކާއިން މަދީނާއަށް ކުރެއްވި ހިޖުރައިން ލިބޭ ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ މިފަދަ ކަންކަމަށް މިއަދުގެ ޖީލުތައް ވިސްނައި އިބްރަތް ހާސިލްކުރަން ޖެހޭ ކަމަށެވެ. އަދި އެގޮތަށް އަމަލުކޮށް ސާބިތުކަން މަތީގައި ތިބުމަށް ޚުތުބާގައި ވަނީ ގޮވާލާފައެވެ.
