އޭއެފްސީ ކަޕުގެ ޕްލޭއޮފުގައި ވާދަކުރާ އިންޑިއާގެ ބެންގަލޫރު އެފްސީ ޓީމަކީ މި ވަގުތު ގްރޫޕް ސްޓޭޖުގައި ހިމެނޭ ޓީމުތަކަށްވުރެ ވަރުގަދަ ޓީމެއް ކަމަށް ކުލަބު އީގަލްސްގެ ކޯޗު މުޙައްމަދު ޝާޒްލީ ބުނެފިއެވެ.

ޕްލޭއޮފް މެޗާ ކުރިމަތިލާއިރު ބެންގަލޫރުން ވަނީ މުބާރާތުގެ ގްރޫޕް ސްޓޭޖަށް ވަނުމުގެ އަމާޒުގައި ގިނަ ކުޅުންތެރިންތަކެއްގެ ސޮއި ހޯދާފައެވެ. އެގޮތުން މިހާތަނަށް އެ ޓީމަށް ސޮއިކޮށްފައިވާ ކުޅުންތެރިންނަކީ ކޮންގޯގެ ގައުމީ ޓީމުގެ ފޯވާޑް ޕްރިންސް އިބަރާ އާއި، ކުރިން ޗެންނާއީ އާއި މޯހަން ބަގާންއަށް ކުޅުނު މިޑްފީލްޑަރު ޖަޔޭޝް ރާނޭ އާއި، ބްރެޒިލް ލީގުން ގެނައި ޑިފެންޑަރު އެލަން ކޮސްޓާ އާއި، މިދިޔަ ސީޒަނުގެ އެންމެ ގިނަ ލަނޑު ޖެހި ޒުވާން ފޯވާޑް ބިދްޔާޝަގަރު ސިންހް އާއި، އީސްޓް ބެންގޯލުގެ ޑިފެންޑަރު ސަތާކް ގޯލުއީ އާއި، ފޯވާޑް ހަމަންފްރީތު ސިންހް އާއި، ރިއަލް ކަޝްމީރު ޓީމުން ގެނައި ދާނިޝް ފާރޫގް އަދި ކެރަލާ ބްލާސްޓާސްގެ މިޑްފީލްޑަރު ރޯހިތު ކުމާރެވެ.

އޭއެފްސީ ކަޕުގެ ޕްލޭއޮފް މެޗު ކުޅޭނީ މި މަހުގެ 15 ވަނަ ދުވަހުއެވެ. މީގެ ކުރިން މި މެޗު މެއި މަހުގެ 11 ވަނަ ދުވަހު ކުޅެން ތާވަލުކުރިއިރު، މެޗު ފަސްކުރަން ޖެހުނީ މެޗަށް މާލެއައި ބެންގަލޫރު ޓީމު ކޮވިޑް-19 ގެ އުސޫލުތަކާ ޚިލާފުވުމުންނެވެ.

"ރާއްޖެ.އެމްވީ" އަށް ދިން ހާއްސަ އިންޓަވިއުއެއްގައި އީގަލްސްގެ ކޯޗު ޝާޒްލީ ބުނީ މި މެޗަށް ނުކުންނައިރު، ބެންގަލޫރަކީ ކިހާ ފެންވަރެއްގެ ޓީމެއްކަން އެނގޭ ކަމަށެވެ. އަދި ބެންގަލޫރު އެފްސީ އަކީ މިވަގުތު އޭއެފްސީ ކަޕުގެ ގްރޫޕް ސްޓޭޖުގައި ހިމެނޭ ޓީމުތަކަށްވުރެ ވަރުގަދަ ޓީމެއް ކަމަށްވެސް ވަނީ ބުނެފައެވެ.

ޝާޒްލީ ބުނީ ޕްލޭއޮފް މެޗު ރާއްޖޭގައި ކުޅެން ލިބުމަކީ ލިބުނު އުފަލެއް ކަމަށާއި، އޭގެ ބަދަލުގައި ބެންގަލޫރުގައި މި މެޗު ކުޅެން ޖެހުނުނަމަ ދަތިތަކަކާ ކުރިމަތިވާނެ ކަމަށެވެ. އަދި ހޯމް ސްޓޭޑިއަމުގެ ފައިދާ ނަގަން މަސައްކަތް ކުރާނެ ކަމަށްވެސް ޝާޒްލީ ވަނީ ބުނެފައެވެ.

 އޭއެފްސީ ކަޕުގެ ޕްލޭއޮފަށް އީގަލްސް ދަތުރުކުރީ، ޕްރިލިމިނަރީ ފުރަތަމަ ބުރުގައި މިދިޔަ އޭޕްރީލް މަހު މާލޭގައި ބޫޓާންގެ ތިމްޕޫ ސިޓީއާ ދެކޮޅަށް ކުޅުނު މެޗު ކާމިޔާބުކޮށްގެންނެވެ. ޕްރިލިމިނަރީ ދެވަނަ ބުރުގައި އީގަލްސް ވާދަކުރަން ހަމަޖެހިފައި އޮތީ، ބަންގްލަދޭޝްގެ ޑާކާ އަބަހާނީއާއެވެ. އެކަމަކު ކޮވިޑް-19 ސަބަބުން އެ ޓީމަށް ދަތުރުކުރުމުގެ ހުއްދަ ނުލިބި އަދި އަމިއްލަ ގައުމުގައި މެޗު ކުޅުމުގެ ހުއްދަވެސް ނުލިބުމުން އޭއެފްސީ ނިންމީ އަބަހާނީ މުބާރާތުން ވަކިވެފައިވާ ކަމަށެވެ.

ޕްލޭއޮފް މެޗަށް އީގަލްސްއިންވެސް ޓީމު ވަރުގަދަކޮށްފައިވާއިރު، އެ ޓީމުން ވަނީ ރާއްޖޭގައި އުފެދުނު އެންމެ މޮޅު ފުޓުބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އާއި، ގައުމީ ފުޓްބޯޅަ ޓީމުގެ ކެޕްޓަން އަކްރަމް އަބްދުލް ޣަނީ (އަކޫ) އާއި، އިތުބާރު ފޯވާޑް އަލީ ފާސިރު (ސެންޓޭ) އާއި، ހުނަރުވެރި މިޑްފީލްޑަރުން ކަމަށްވާ މުޙައްމަދު އާރިފް (ބަކާ) އާއި އިސްމާއީލް އީސަ (މެސީ) އާއި އަޙްމަދު ހަސަން (އައްމަޑޭ) ގެ އިތުރުން ގޯލްކީޕަރު މުޙައްމަދު ފައިސަލް ގެނެސްފައެވެ.

މި މަހުގެ 15 ވަނަ ދުވަހު އޭއެފްސީ ކަޕުގެ ޕްލޭއޮފް މެޗު ކުޅޭއިރު، އެ މެޗަށްފަހު ގްރޫޕް ސްޓޭޖުގެ މެޗުތައް ކުރިއަށްދާނީ މި މަހުގެ 18، 21 އަދި 24 ވަނަ ދުވަހުއެވެ. އޭއެފްސީ ކަޕުގެ ގްރޫޕް ސްޓޭޖުގައި މި ވަގުތު އޮތީ މާޒިޔާގެ އިތުރުން އިންޑިއާގެ މޯހަން ބަގާން އާއި ބަންގްލަދޭޝްގެ ބަޝުންދަރާ ކިންގްސްއެވެ. ގްރޫޕް ސްޓޭޖުގެ ފަހު ޖާގަ ލިބޭނީ އީގަލްސް އާއި ބެންގަލޫރު ކުޅޭ ޕްލޭއޮފް މެޗުން މޮޅުވާ ޓީމަކަށެވެ.