މުޝީ ބްރޭންޑްގެ ސިލިކޯން ސަކްޝަން ޕްލޭޓާއި ސްނެކް ކަޕް ނުވިއްކުމަށް އަންގައިފި
1 އޯގަސްޓު 2021 | އާދީއްތަ 17:29ސިލިކޯން ސަކްޝަން ޕްލޭޓާއި ކަޕް ރާއްޖެއަށް އެތެރެވެފައިވާ ކަމުގެ މައުލޫމާތު ލިބިފައިވޭ
މުޝީ ބްރޭޑްގެ މައްސަލައެއް | ކިޑްސްބްލޫމް
މުޝީ ބްރޭންޑްގެ ސިލިކޯން ސަކްޝަން ޕްލޭޓާއި ސިލިކޯން ސްނެކް ކަޕް ނުވިއްކުމަށް މޯލްޑިވްސް ފުޑް އެންޑް ޑްރަގް އޮތޯރިޓީން (އެމްއެފްޑީއޭ)އިން އަންގައިފިއެވެ.
އެމްއެފްޑީއޭއިން ބުނީ ކާބޯތަކެއްޗަށް ނޭދެވޭ އަސަރުކުރުމުގެ ފުރުސަތު އޮވެދާނެކަމަށް ބެލެވޭތީ, ކުޑަކުދިންނަށް ކާބޯތަކެތި އެޅުމަށް ޚާއްސަކޮށް ތައްޔާރުކޮށްފައިވާ މުޝީ ބްރޭންޑްގެ ސިލިކޯން ސަކްޝަން ޕްލޭޓް އަދި ސިލިކޯން ސްނެކް ކަޕް ދިވެހިރާއްޖެއަށް އެތެރެވެފައިވާ ކަމުގެ މައުލޫމާތު ޔޫރަޕްގެ ރެޕިޑް އެލަރޓް ސިސްޓަމް ފޯރ ފުޑް އެންޑް ފީޑްއިން މިއޮތޯރިޓީއަށް އަންގާފައިވާ ކަމަށެވެ.
މި އެލަރޓާއި ގުޅިގެން މުޝީ ބްރޭންޑްގެ ސިލިކޯން ސަކްޝަން ޕްލޭޓް އަދި ސިލިކޯން ސްނެކް ކަޕުން ކާބޯތަކެތީގެ ރައްކާތެރިކަމަށް އޮތް ހިރާސްގެ މިންވަރު ބެލުމުގެ މަސައްކަތް ކުރަމުންދާ ކަމަށް އެމްއެފްޑީއޭއިން ބުނެއެވެ.
އެމްއެފްޑީއޭއިން ވަނީ ރައްކާތެރިކަމުގެ ފިޔަވަޅެއްގެ ގޮތުން އެއޮތޯރިޓީން ވަކި ގޮތެއް އަންގަންދެން މުޝީ ބްރޭންޑްގެ ސިލިކޯން ސަކްޝަން ޕްލޭޓް އަދި ސިލިކޯން ސްނެކް ކަޕް ނުވިއްކުމަށް އަންގާފައެވެ. އަދި ކާބޯތަކެތި އެޅުމަށް ބޭނުން ނުކުރުމަށް ވެސް އިލްތިމާސްކޮށްފައިވެއެވެ.
