ރ. ފުއްގިރި މައްސަލަ: ޝަރީއަތުގެ ކުރިން ހުށަހަޅާ ހުށަހެޅުންތައް ހުށަހެޅުމަށް ދައުލަތާއި ދިފާއަށް 10 ދުވަސް

ރ. ފުއްގިރި މައްސަލާގައި ކުރީގެ ރައީސް ޢަބްދުﷲ ޔާމީން އަބްދުލްގައްޔޫމްގެ މައްޗަށް އުފުލާފައިވާ ރިޝްވަތު ހިފުމާއި، ކަޅުފައިސާ ދޮވުމުގެ ދައުވާގެ ޝަރީއަތުގެ ކުރިން ހުށަހަޅާ ހުށަހެޅުންތައް ހުށަހެޅުމަށް ދައުލަތާއި ދިފާޢަށް 10 ދުވަހުގެ މުއްދަތު ދީފިއެވެ.

އާދީއްތަ ދުވަހު ކުރިއަށްގެންދިޔަ މި މައްސަލައިގެ އިބްތިދާޢީ އަޑުއެހުމުގައި އޮތީ ދައުލަތާއި ދިފާއުން ހެކި ހުށަހެޅުމެވެ.

Advertisement

މި އަޑު އެހުމުގައި ދައުލަތުން 86 ހެއްކެއް ހުށަހެޅިއެވެ. މީގެތެރޭގައި ސިޓީތަކާއި، ޗެކްތަކާއި، ފައިސާ ޖަމާކޮށްފައިވާ ކަމުގެ ރަސީދު ވެސް ހިމެނެއެވެ. ދެ ދައުވާއަށް ވެސް ހުރީ އެއް ހެކިތަކެއް ކަމަށް ދައުލަތުން ފާހަގަކުރިއެވެ.

ދިފާއުންވެސް ހުށަހެޅީ ދެ ދައުވާއަށް އެއް ހެކިތަކެކެވެ. ދިފާއުން ވެސް ވަނީ ހެކީގެ ގޮތުގައި ކުރީގެ ބަޔާންތަކާއި ފައިސާގެ ރަސީދުތައް ވެސް ހުށަހަޅާފައެވެ.

އާދީއްތަ ދުވަހުގެ އަޑު އެހުން ފެށުމުގެ ކުރިން ދިފާއުންވަނީ، މި ދައުވާ ޖިނާއީ އަމަލެއްގެ މައްޗަށް ބިނާކޮށްފައި އޮތީ، ޖިނާއީ އަމަލެއް ސާބިތުވާތީ ނޫން ކަމަށް ބުނެފައެވެ. އަދި މި މައްސަލާގައި ދިފާއުން އެދުނު ލިޔުންތައް ނުލިބޭކަމަށް ވެސް ބުންޏެވެ. މިކަމާ ގުޅިގެން ދައުލަތުން ބުނީ، ދިފާއުން އެދިފައިވާ ލިޔުންތަކަކީ، ޖެނުއަރީ މަހުގެ 7 ވަނަ ދުވަހު ބޭއްވި އަޑުއެހުމުގައި ގޮތެއް ނިމިފައިވާ ލިޔުންތަކެއް ކަމަށެވެ. އެގޮތުން އެއީ، ހިއްސާ ނުކުރެވޭނެ ލިޔުންތަކެއްކަމާއި، އޭގެ ސަބަބުތައް ވެސް ބަޔާންކޮށްފައިވާނެކަން ދައުލަތުން ފާހަގަކުރިއެވެ. ދައުލަތުން ބުނީ ދިފާއުން މަސައްކަތްކުރަނީ ޝަރިއަތް ކުރިއަށް ގެންދިޔުން މަޑު ޖެއްސުމަށް ކަމަށެވެ.

މިކަމާ ގުޅިގެން މައްސަލަ ބައްލަވާ އިސް ގާޒީ އަހުމަދު ޝަކީލް ވިދާޅުވީ، ހެކި ހޯދުމަށް ހުށަހަޅާން ވަކި އުސޫލެއް އޮންނައިރު ދިފާއުން އެދިފައިވަނީ އެ އުސޫލުގެ ތެރެއިން ނޫން ކަމަށެވެ. އެހެން ކަމުން އެ ހެކިތައް ދިފާއާ ހިއްސާ ކުރުމުގެ އަމުރެއް ނެރެދިނުމުގެ ތަނެއް ނެތް ކަމަށެވެ. އަދި އޮންނަ އިޖުރާއަތްތަކުގެ ތެރެއިން ހެކި ހޯދުމަށް ހުށަހަޅާ ފޯމް ހުށަހެޅުމުން ދެން އެކަން ކުރިއަށްދާނެކަން ގާޒީ ފާހަގަކުރެއްވިއެވެ.

ދައުލަތާއި ދިފާއުން ވެސް ހެކި ހުށަހެޅުމަށްފަހު އިތުރު ކަމެއް ހުށަހަޅަން ނެތުމުން އަޑުއެހުން ނިންމާލާފައިވަނީ، ދިފާއުން އެދުނު ގޮތަށް ދައުލަތުން ހުށަހަޅާފައިވާ ލިޔެކިޔުންތައް ހޯދުމަށް އޮންނަ އިޖުރާއަތުގެ ތެރެއިން ފޯމް ހުށަހަޅައިގެން ހެކި ހޯދުމަށް 3 ދުވަސް ވެސް ދިނުމަށްފަހުއެވެ.

އަޑު އެހުން ނިންމާލަމުން ގާޒީ ވިދާޅުވީ، ދެ މައްސަލައިގެ ވެސް ޝަރީއަތުގެ އަޑުއެހުމެއް ދެން އޮންނާނީ މި މަހުގެ 22 ވަނަ ދުވަހު ކަމަށެވެ.