ރައީސް މައުމޫނާއި ނަސްރީނާގެ ކައިވެނީގެ ސިއްރު!

ކައިވެންޏަކީ ވަރަށް މަތިވެރި މާތް ގުޅުމެކެވެ. ޒަވާޖީ ހަޔާތެއް ދެ މީހުން އެކުގައި ފަށަނީ ވަރަށް އުންމީދާއެކު، އެކުގައި އުމުރަށް އުޅޭނެ ކަމުގެ ވައުދުތައް ވެގެންނެވެ. 

މީހުން ބުނެ އުޅެއެވެ. ދިރިއުޅުމެއް ހަގީގަތުގައި ފެށެނީ ކައިވެންޏަށް ފަހުގައެވެ. އެއީ މުޅިއަކުން ދޮގު ވާހަކައެއް ނޫނެވެ. ކައިވެންޏަށް ފަހު ދިރިއުޅުމުގައި އެކިއެކި ކަންކަމާ ކުރިމަތިލާން މީހާއަށް ދަސްވެއެވެ. ގިނަ ފަހަރަށް ދެމަފަރިން އެކުގައި ކައިވެންޏެއް ދެމެހެއްޓުމަކީ އުނދަގޫ ކަމަކަށް ވާއިރު ދިމާވާ މައްސަލަތައް ހައްލުކޮށްގެން އެކުގައި ނޫޅެވިއްޖެނަމަ ދުރުވާން ޖެހެއެވެ. ވަރި ދެމީހުން ދުރުކޮށްލައެވެ. 

ރާއްޖޭގެ ނިސްބަތުން ބަލާއިރު ކައިވެނީގެ އަދަދަށްވުރެ ވަރި ވަނީ އިތުރުވެފައެވެ. އެހެންނަމަވެސް މިއަދާ ހަމައަށް ވެސް ފުރަތަމަ ކައިވެނި މަތީގައި މުޅި އުމުރަށް ދެމިތިބޭ މީހުން ވެސް މަދެއް ނޫނެވެ.

މިފަދަ އެއް މިސާލަކީ ކުރީގެ ރައީސް މައުމޫން އަބްދުލް ގައްޔޫމާއި ނަސްރީނާ އިބްރާހީމެވެ. އެ ދެކަނބަލުންގެ ކައިވެންޏަށް މި އަހަރު 52 އަހަރު ފުރުން ވަނީ ފާހަގަ ކުރައްވާފައެވެ.

މައުމޫނާއި ނަސްރީނާ ކައިވެނި ބައްލަވައިގަތީ، 1969 ވަނަ އަހަރު، ޖުލައި 20 ވަނަ ދުވަހުއެވެ. މައުމޫންގެ ދެކަނބަލުން އެންމެ ފުރަތަމަ ބައްދަލުވެ ވަޑައިގެންނެވީ 1965 ވަނަ އަހަރު މިސްރުގެ ވެރިރަށް ގާހިރާ އިންނެވެ. ކައިވެނި ބައްލަވައިގަތް އިރު، ނަސްރީނާގެ އުމުރުފުޅަކީ 19 އެވެ. މައުމޫންގެ އުމުރުފުޅަކީ 31 އަހަރެވެ.

ނަސްރީނާގެ އުމުރުފުޅުން އެންމެ 20 އަހަރުގައި، އެންމެ ފުރަތަމަ ލިބިވަޑައިގަތީ އެއްމާބަނޑު ދެ އަންހެން ކުދިން ކަމަށްވާ ޔުމްނާ މައުމޫނާއި ދުންޔާ މައުމޫނެވެ. އަދި އެއަށްފަހު، އެކަމަނާގެ އުމުރުފުޅުން 21 އަހަރުގައި ފުރަތަމަ ފިރިހެން ދަރިފުޅު ކަމަށްވާ ފާރިސް މައުމޫން ލިބިވަޑައިގެންނެވިއެވެ. ދެވަނަ ފިރިހެން ދަރިފުޅު، އަދި އެންމެ ހަގު ދަރިފުޅު ކަމަށްވާ ޣައްސާން މައުމޫން ލިބިވަޑައިގެންނެވީ ނަސްރީނާގެ އުމުރުފުޅުން 30 އަހަރުގައެވެ. އެންމެ ހަގު ދަރިފުޅު ލިބިވަޑައިގަތީ ރައީސް މައުމޫން ރާއްޖޭގެ ރައީސްކަމަށް ވަޑައިގެންނެވި ފަހުންނެވެ.

ރައީސް މައުމޫންގެ އަރިހުން ނުވަތަ ނަސްރީނާގެ އަރިހުން އެންމެން ވެސް ކުރަން ބޭނުންވާ ސުވާލެއް އޮވެއެވެ. އެއީ އެހާ ގިނަ ދުވަހު ކައިވެނި ދެމެހެއްޓުމުގެ ސިއްރަކީ ކޮބައިތޯއެވެ. ރައީސް މައުމޫން ވަނީ ދާދިފަހުން މި ސުވާލުގެ ޖަވާބު ވެސް ދެއްވާފައެވެ. މައުމޫން ވިދާޅުވީ އެހާ ގިނަ ދުވަހު ކައިވެނި ދެމެހެއްޓުމުގެ ސިއްރަކީ އެކަކު އަނެކަކަށް ލޯބިވުމާއި އިހްތިރާމުކުރުމާއި ވަފާތެރިވުން ކަމަށެވެ. އަދި އެ ދެމަފަރިން ވެސް އެގޮތުގައި އަބަދުވެސް ތިއްބަވާނެ ކަމަށް ވަނީ ވިދާޅުވެފައެވެ.

އަނބިކަނބަލުން ސިފަކުރައްވަމުން މައުމޫން ވިދާޅުވީ ނަސްރީނާއަކީ އަބަދުވެސް މީހުންނަށް ހިތްހެޔޮ އެހެން މީހުންނަށް އަޅާލާ މީހެއް ކަމަށެވެ. މީގެ ކުރިން ވެސް ރައީސް މައުމޫން ވަނީ ނަސްރީނާއަށް ތައުރީފުކުރައްވާ ވާހަކަފުޅު ދައްކަވާފައެވެ. އެގޮތުން މައުމޫން ވިދާޅުވީ ނަސްރީނާއަކީ އެމަނިކުފާނުގެ އެންމެ ގާތް އެކުވެރިޔާ ކަމަށެވެ. އެކަމަނާ އަށް ލިބިވަޑައިގެންފައި ވަނީ ގަދަފަދަ ބާރެއް ކަމަށާއި ހިތްވަރުގަދަކަން އާދަޔާ ޚިލާފު ކަމަށެވެ. ރައީސް މައުމޫން ވިދާޅުވީ، ނަސްރީނާ ހުންނެވީ ބަލި ނުކުރެވޭނެ ފަދަ ހިތްވަރުފުޅެއްގައި ކަމަށާއި އެ ކަމަނާގެ ވަފާތެރިކަމަށް ނިމުމެއް ނެތް ކަމަށެވެ.

ރައީސް މައުމޫން ވިދާޅުވީ ހަޔާތުގެ އެއްވެސް ހިސާބެއްގައި ނަސްރީނާ ވަރި ނުކުރައްވާ ކަމަށެވެ. އެ ދެކަނބަލުން ފުރަތަމަ ކައިވެނި ބައްލަވައިގަތް ގޮތަށް މިއަދާ ހަމައަށް ވެސް ދެމި ތިއްބެވީ އެ ކައިވެނީގެ މަތީގައި ކަމަށެވެ.

މިހާރުގެ ޖީލު މި ދެކަނބަލުންގެ އަރިހުން ދަސްކުރަންވީ ކަމަކީ މިއީއެވެ. ދިރިއުޅުމުގައި ކޮންމެ ފަދަ ކަމެއް ދިމާވިޔަސް އެކަކު އަނެކަކަށް ލޯބިވެ، އިހްތިރާމުކޮށް ވަފާތެރިވުމެވެ. ކޮންމެ ދެމަފިރިއަކު ވެސް މިގޮތަށް ކަންތައް ކުރާ ކަމުގައިވާނަމަ އިރާދަފުޅާއި މިންވަރުފުޅުން އެ ކައިވެންޏެއް ކުރިއަށް ގޮސް އެކީގައި ގިނަ އަހަރު އުޅެވޭނެއެވެ. ދިރިއުޅުން ފޮނިވާނެއެވެ.