މިފްކޯގެ އައު ސްޓޯރޭޖް ރީފަރ ކެރިއަރ އެންމެ އެދެވޭ ގޮތެއްގައި ދެ އަހަރު ދުވަހު ދުއްވިއްޖެނަމަ އޭގެ އަގު ލިބޭނެ ކަމަށް މިފްކޯގެ ސީއީއޯ އިސްމާޢީލް ފައުޒީ ވިދާޅުވެއްޖެއެވެ.
ރާއްޖެޓީވީގެ 'ފަލަސުރުޚީ' ޕްރޮގްރާމްގައި ވާހަކަދައްކަވަމުން ފައުޒީ ވިދާޅުވީ މިއީ މުޅިން އައު ބޯޓެއް ނޫން ނަމަވެސް މި ބޯޓު އިޚްތިޔާރު ކުރީ ވަރަށް ގިނަ ސަބަބުތަކަށްޓަކައި ކަމަށެވެ. އެގޮތުން މަސް ލޯޑުކުރާއިރު ފަސޭހަތަކެއް ލިބިގެން ދާނެތީ ކަމަށާއި، އަދި މިހާރު މަސްވެރިންގެ ހުރި ގިނަ ކަންބޮޑުވުންތަކަށް ހައްލު ލިބޭނެ ކަމަށް ދެކެވަޑައިންނަވާތީ ކަމަށެވެ.
މިފްކޯގެ އައު ސްޓޯރޭޖް ރީފަރ ކެރިއަރއަކީ މަސްވެރިން ބާނާ މަސް ހިފައިގެން އެއްތަނުން އަނެއްތަނަށް ދަތުރުކުރެވޭ ގޮތަށް, މަސް ފިނިކޮށް ބެހެއްޓުމުގެ ކެޕޭސިޓީ އިތުރު ކުރުމަށް މިފްކޯއިން ގެނައި ބޯޓެކެވެ. 2500 ޓަނުގެ މި ބޯޓުގައި، ފިނިކޮށްފައި ހުންނަ މަސް ހިފައިގެން ރާއްޖޭގެ އެކި ސަރަހައްދަށާއި އަދި ރާއްޖެއިން ބޭރަށްވެސް ދަތުރު ކުރާނެ ކަމަށް މިފްކޯއިން މައުލޫމާތު ދެއެވެ.
ފައުޒީ ވިދާޅުވީ މި ސްޓޯރޭޖް ކެރިއަރ އަކީ ސްޓޯރޭޖަށް ދިމާވި މައްސަލަ ހައްލު ކުރުމަށް ގަތް ބޯޓެއް ކަމަށާއި، ކުންފުނީގެ އަމިއްލަ ބޮޑު ސްޓޯރޭޖެއް އޮތުމުން އެކަމުގެ ފައިދާ ވާނެ ކަމަށެވެ. މިއާއެކު މޫސުމީ މަސްވެރިކަމުގެ ދުވަސްވަރު ކިއޫގައި ތިބެގެން މަސް ކިރުމަށް ހައްލު ލިބިގެންދާނެ ކަމަށެވެ.
ތައިލެންޑުން ގަތް މި ބޯޓު މާލެ ގެނެސްފައިވާއިރު، ފައުޒީ ވިދާޅުވެފައިވަނީ މިފްކޯގެ ކެޕޭސިޓީ އިތުރު ކުރުމުގެ މަސައްކަތް މިހާރުވެސް ކުރަމުން އަންނަ ކަމަށާއި، އިންޑިއާގެ އެހީގައި ފެލިވަރުގައިވެސް 4000 ޓަނުގެ މަސް ރައްކާކުރެވޭނެ ތަނެއް ހެދުމުގެ މަސައްކަތް ކުރިއަށްދާ ކަމަށެވެ. އަދި އުތުުރުގައިވެސް ކެޕޭސިޓީ އިތުރު ކުރުމުގެ މަސައްކަތް ކުރަމުން އަންނަކަން ފައުޒީ ވަނީ ވިދާޅުފައެވެ.
