ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަދި މޯލްޑިވިއަން ޑިމޮކްރެޓިކް ޕާޓީގެ ޕާލިމެންޓްރީ ގްރޫޕްގެ ލީޑަރު އަލީ އާޒިމް، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙާ ބައްދަލުކުރައްވައިފިއެވެ.
ހޯމަ ދުވަހު މުލިއާގޭގައި ނުރަސްމީކޮށް ބޭއްވި މި ބައްދަލުކުރެއްވުން ތިން ގަޑިއިރަށް ދެމިގެންދިޔަ ކަމަށް މައުލޫމާތު ލިބެއެވެ.
މިބައްދަލު ކުރެއްވުމަށްފަހު އާޒިމް ވަނީ ރައީސް ޞާލިޙްއާ ސަލާމް ކުރައްވާ ފޮޓޯއަކާއެކު ޓްވީޓެއް ކުރައްވާފައެވެ. އެ ބައްދަލުކުރެއްވުމާ ގުޅޭ ގޮތުން އާޒިމް ވިދާޅުވީ މިއީ ސަރުކާރުގެ ލެޖިސްލޭޓިވް އެޖެންޑާއާ ބެހޭ ގޮތުން މަޝްވަރާ ކުރެއްވުމަށް ބޭއްވި ބައްދަލުވުމެއް ކަމަށެވެ. މިއީ ފައިދާ ކުރުވަނިވި ބައްދަލުވުމެއްކަން ފާހަގަކުރައްވައި އާޒިމް ވިދާޅުވީ ވަރަށް މުހިންމު މަޝްވަރާތައް ކުރެވިފައިވާ ކަމަށެވެ. އަދި ކުރިއަށް އޮތްތަނުގައި ރައްޔިތުންގެ މަޖިލީހާއި އެހެން މުއައްސަސާތައް ގުޅިގެން މަސައްކަތް ކުރެވޭނެ ކަމަށް އުންމީދު ކުރައްވާ ކަމަށެވެ.
މުހިންމު މަޝްވަރާތަކެއް ކުރައްވާފައިވާއިރު، ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވަނީ ދައުރުން ބޭރުގައި މަޖިލީހުގެ ޖަލްސާއެއް ބޭއްވުމަށް އެދިވަޑައިގެންފައެވެ. އަދި، އެކަމުގެ މަސައްކަތްތައް އެމްޑީޕީގެ ތެރޭގައި މިހާރު ވަނީ ފަށާފައެވެ.
މީގެ އިތުރުން ޖުލައި 25ވީ އާދިއްތަ ދުވަހުގެ ރޭ ބޭއްވި ގައުމީ މަޖިލީހުގެ ބައްދަލުވުމުގައި އާޒިމް ވަނީ ރައީސް ޞާލިޙާއި އެމްޑީޕީއާ އެއްވެސް ވަރަކަށް މުއާމަލާތް ނުކުރެވޭ ކަމަށް ވިދާޅުވެ، ކަންބޮޑުވުން ވެސް ފާޅު ކުރައްވާފައެވެ. ޓެރަރިސްޓުން ހައްޔަރު ކުރުމުގެ ފުރުސަތު ފުލުހުންނަށް ދިނުމަށް ކުއްލި ނުރައްކާ އިއުލާނުކުރުމަށް އެމްޑީޕީން އިގުރާރުވެފައިވާއިރު، އާޒިމް ވަނީ، މިއަދު ސަރުކާރުގެ ވެރިޔާ އަދި ރައީސުލްޖުމްހޫރިއްޔާއަކީ އެ ޕާޓީއަށް ނިސްބަތްވެ ވަޑައިގަންނަވާ ބޭފުޅަކަށްވާއިރު، މިފަދަ ކަމެއް ފާސްކުރުމުގެ ކުރިން ރައީސްގެ ބަސްފުޅެއް މިކަމުގައި ހޯދަންޖެހޭކަމަށް ދެކެވަޑައިގަންނަވާކަމަށް ވިދާޅުވެފައެވެ. މި ސަބަބަށްޓަކައި އެ ގަރާރު ފާސްކުރުމަށް އާޒިމް ވޯޓުދެއްވާފައެއް ނުވެއެވެ. އެ ގަރާރު ފާސްވެފައިވަނީ އޮންލައިންކޮށް ބޭއްވި ގައުމީ މަޖިލީހުގެ ޖަލްސާގައި ބައިވެރިވި 43 މެމްބަރުންގެ ތެރެއިން 39 މެމްބަރުންގެ އަޣްލަބިއްޔަތުންނެވެ.
އެމްޑީޕީގެ އެތެރޭގައި ހަމަނުޖެހުން ބޮޑުވެ ޕާޓީގެ ތެރޭގައި ދެފެކްޝަނެއް އުފެދިފައިވާއިރު، އެމްޑީޕީގެ ބައެއް މެމްބަރުން ގެންދަވަނީ ފާޅުކަން ބޮޑު ގޮތެއްގައި ރައީސް ޞާލިޙަށް ފާޑު ވިދާޅުވަމުންނެވެ. މީގެ އިތުރުން ސިޔާސީ މަސައްކަތްތައް ރައީސް ޞާލިޙާއެކު ނުކުރެއްވޭނެ ކަމަށް ވެސް ދާދި ފަހުން ރައީސް ނަޝީދު ވަނީ ވިދާޅުވެފައެވެ. އެމަނިކުފާނުގެ ވިސްނުންފުޅު ހުރީ ރާއްޖޭގެ ވެރިކަމުގެ ނިޒާމު ބަދަލުކޮށް ބޮޑު ވަޒީރުކަން ކުރައްވަން ކަމަށް ފާޅުގައި ގެންދަވަނީ ވިދާޅުވަމުންނެވެ. އަދި ނިޒާމު ބަދަލުކުރުމުގައި އިދިކޮޅު ކޯލިޝަނުން ބައިއަތު ހިފާނެކަމަށް ވެސް ތަކުރާރުކޮށް ގެންދަވަނީ ވިދާޅުވަމުންނެވެ.
ނަމަވެސް މިކަމުގައި މިހާތަނަށް ރަސްމީ މަޝްވަރާތަކެއް ފެށިފައެއް ނެތެވެ. ރަސްމީ މަޝްވަރާއަކަށް ދާން ހުށަހަޅުއްވައިފިނަމަ އެކަންވެސް ކުރައްވާނެ ކަން ސަރުކާރުންވަނީ ހާމަކޮށްފައެވެ.
ދެން އަންނަ ރިޔާސީ އިންތިޚާބެއްގައި އެމްޑީޕީގެ ޓިކެޓްގައި ވާދަކުރައްވާނެކަން ވެސް ރައީސް ނަޝީދު ވަނީ ހާމަކުރައްވާފައެވެ. އެހެންނަމަވެސް އެމްޑީޕީގެ އަސާސީ ގަވާއިދު ބުނާ ގޮތުން އެ ޕާޓީން ނެރެފައިވާ ކެންޑިޑޭޓަކު ރައީސުލްޖުމްހޫރިއްޔާ ކަމަށް ހޮވިއްޖެނަމަ ދެވަނަ ދައުރަކަށް ރިޔާސީ އިންތިޚާބުގައި ވާދަކުރުމަށް ޕާޓީގެ ޓިކެޓް ދޭންޖެހެއެވެ.
