ހުޅުމާލޭގައި އެއްޗެއް ގޮވުން: އެސަރަހައްދު ހުޅުވާލައިފި
23 ޖުލައި 2021 | ހުކުރު 07:19ގޮވީ ކޮންއެއްޗެއް ކަމެއް އަދި ގޮވީ ކޮންތާކުންކަން މިހާތަނަށް ކަށަވަރުވެފައެއް ނުވޭ
ބާރުގަދަ އަޑަކާއެކު އެއްޗެއް ގޮވި ސަރަހައްދު،
ހުޅުމާލޭގައި ބާރު އަޑަކާއެކު އެއްޗެއް ގޮވި ސަރަހައްދު އާއްމުނަށް ހުޅުވާލައިފިއެވެ.
ބުރާސްފަތި ދުވަހުގެ ރޭ ގާތްގަނޑަކަށް 12:15 ހާއިރު ހުޅުމާލޭ ބޯގަންވިލާ މަގުގައި ކުޅިވަރުކުޅުމަށް އޮންނަ ހުސްބިމު ސަރަހައްދުން ބާރު އަޑަކާއެކު އެއްޗެއް ގޮވި ކަމަށް ފުލުހުން ބުނެފައިވެއެވެ. މި ހާދިސާއާ ގުޅިގެން އެ ސަރަހައްދަށް އާއްމުންނަށް ނުވަދެވޭނެ ގޮތަށް ވަނީ ބަންދުކޮށްފައެވެ. ނަމަވެސް މިހާރު އެ ސަރަހައްދު ހުސްކޮށް ނުރައްކަލެއް އޮތްތޯ ފުލުހުންނާއި ސިފައިން ގުޅިގެން ބަލާ ފާސްކުރުމަށްފަހު މިހާރު ވަނީ އާއްމުންނަށް އެސަރަހައްދު ހުޅުވާލާފައެވެ.
ގޮވީ ކޮންއެއްޗެއް ކަމެއް އަދި ގޮވީ ކޮންތާކުންކަން މިހާތަނަށް ކަށަވަރުވެފައެއް ނުވެއެވެ. އަދި މި ހާދިސާ ގުޅޭ އިތުރު ތަފްސީލު ފުލުހުން އާއްމުކޮށްފައެއް ނުވެއެވެ.
ރާއްޖެ އެމްވީއަށް މައުލޫމާތުދިން އާއްމުންގެ މީހަކު ބުނީ އެއްޗެއް ގޮވި އަޑު ވަރަށް ބާރަށް އިވުނު ކަމަށާއި، އެވަގުތު އަލިފާން ވެސް ފެނުނު ކަމަށެވެ. އެމީހާ ބުނީ އަޑުން ހީވަނީ ގޮވާފައިވަނީ ގޭސްފުޅިއެއް ކަހަލަ އެއްޗެއްކަމަށް ލަފާކުރެވޭ ކަމަށެވެ. އެމީހާ ބުނީ އެވަގުތު ގިނަ އަދަދެއްގެ ބަޔަކު އެތަނަށް އެއްވިކަމަށެވެ. އަދި ހުޅުމާލޭ ބޯގަންވިލާ މަގުގައި ކުޅިވަރުކުޅުމަށް އޮންނަ ހުސްބިމުގައި އެ ވަގުތު ކުޅިވަރު ކުޅެމުންދިޔަ ބަޔަކު ބުނިގޮތުން ޒާތަކަށް އޮތް އެއްޗެއް އެ ސަރަހައްދުން ފެނިފައިވެއެވެ.
