އައްޑޫ ސިޓީގެ މޮނިޓަރިންގ އުވާލައި އައު އުސޫލުތަކެއް

އައްޑޫ ސިޓީގެ މޮނިޓަރިންގ އުވާލައި އައު އުސޫލުތަކެއް ކަނޑައަޅައިފިއެވެ.

އައްޑޫ ސިޓީ ކައުންސިލުން ބުނެފައި ވަނީ މޮނީޓަރިން އުވާލި ނަމަވެސް އެޗްޕީއޭގެ ހުރިހާ ގައިޑްލައިންތަކަކާ އެއްގޮތަށް އަމަލުކުރަން ޖެހޭނެ ކަމަށެވެ. އެގޮތުން ހޮޓާތަކާއި ކެފޭ، ރެސްޓޯރެންޓްފަދަ ކާބޯތަކެތީގެ ޚިދުމަތްދޭ އެހެނިހެން ތަންތަނުން، އެޗްޕީއޭގެ ގައިޑްލައިނާ އެއްގޮތަށް އަމަލުކުރަން ޖެހޭނެއެވެ. އަދި ބޭރަށް ނުކުންނައިރު މާސްކު އެޅުންވެސް އުސޫލުތަކުގެ ތެރޭގައިވަނީ ހިމަނާފައެވެ.

ޖިމްތަކާއި ބޯކޮށާ ތަންތަނާއި ސެލޫން ފަދަ ތަންތަނުގައިވެސް އަމަލުކުރަންވާނީ އެޗްޕީއޭގެ ގައިޑްލައިނާ އެއްގޮތަށެވެ. މޮނިޓަރިންގެ ހާލަތު އުވާލި ނަމަވެސް އެއްވެސް ކުޅިވަރު މުބާރާތެއް ނުބޭއްވޭނެއެވެ. އަދި ކުޅިވަރުގެ އެއްވެސް ހަރަކާތްތައް ހިންގޭނީ ގައިޑްލައިންތަކާ އެއްގޮތަށެވެ. ދެމަސް ދުވަހަށް ފަހު އައްޑޫ ސިޓީ މޮނިޓަރިންގ އުވާލާފައިވަނީ ހޯމަ ދުވަހުއެވެ.

އަންގާރަ ދުވަހު ނެރުނު ތަފާސް ހިސާބުތަކަށް ބަލާއިރު އެސިޓީން އެއްވެސް މީހަކަށް ބަލި ޖެހިފައެއް ނުވެއެވެ. އައްޑޫގެ އަވަށްތަކުގެ ތެރެއިން އެންމެ ގިނަ އަދަދަކަށް ކޮވިޑްގެ އެކްޓިވް ކޭސް މިހާރު އުޅެނީ މަރަދޫގައެވެ. އެގޮތުން މަރަދޫގައި ކޮވިޑްގެ 31 އެކްޓިވް ކޭސް، ހިތަދޫގައި 22 އެކްޓިވް ކޭސް، އަދި މަރަދޫފޭދޫގައި 4 އެކްޓިވް ކޭސް އުޅޭ ކަމަށް ތަފާސްހިސާބުތަކުން ދައްކައެވެ. އެއާއެކު އައްޑޫގައި ކޮވިޑްގެ 57 އެކްޓިވް ކޭސް މިހާރު އެބަ އުޅެއެވެ.

އަދި ކޮވިޑަށް ޕޮޒިޓިވްވި މީހުންގެ ތެރެއިން 490 މީހުން ރަނގަޅުވެފައިވާއިރު، ކޮވިޑް ފެސިލިޓީގައި މިވަގުތު އަންނަނީ އެކަކަށް ފަރުވާ ދެމުންނެވެ. މި ބަލީގައި ދެ މީހަކު ވަނީ އައްޑޫ އިން ނިޔާވެފައެވެ.