ކުދިން އާއިލާތަކާ ހަވާލުކުރާނީ 4 މަރުހަލާއެއް ފުރިހަމަކުރުމަށް ފަހު
އާއިލާއާ ހަވާލުކުރުމަށްޓަކައި ކުއްޖާ ތައްޔާރުކުރުމާއި، ޕްލޭން ތައްޔާރުކުރުމާއި، އާއިލާ ތައްޔާރުކުރުމަށް ބޭނުންވާ ކަންކަން ފާހަގަކުރާނެ
ޖުމްހޫރީ މައިދާނުގައި ކުޑަކުދިން ބެެލެނެވެރިންނާއި އެކު ކޮތަރު ބަލަން އައިސް އުފާވެރި ވަގުތުކޮޅެއް ހޭދަކޮށްލަނީ
ދައުލަތުގެ ބެލުމުގެ ދަށުގައި ތިބޭ ކުދިން އާއިލާތަކާ ހަވާލުކުރުމުގެ ކުރިން އެކުދިން އެނބުރި ދިއުމަށް ތައްޔާރުވެފައިވާ މިންވަރު، އެކި މަރުހަލާތަކަކަށް ބަހާލައިގެން ބަލާނެ ކަމަށް ޖެންޑަރ މިނިސްޓްރީން ބުނެފިއެވެ.
ޖެންޑަރ މިނިސްޓްރީން އާންމުކޮށްފައިވާ "ދައުލަތުގެ ބެލުމުގެ ދަށަށް ގެންނަ ކުޑަކުދިން، އަލުން އެކުދިންގެ އާއިލާއާ ހަވާލުކުރުމާބެހޭ ގަވައިދު" ގައި ވާގޮތުން ދައުލަތުގެ ބެލުމުގެ ދަށުގައި ތިބޭ ކުދިން އަނބުރާ އާއިލާތަކަށް ފޮނުވުމުގެ ކުރިން މައިގަނޑު ހަތަރު މަރުހަލާއެއް ކަޑައްތު ކުރާނެއެވެ.
އެންމެ ފުރަތަމަ މަރުހަލާއަކީ ކުއްޖާގެ އާއިލާ ހޯދުމާއި، އެސެސްމެންޓު ހެދުމާއި، ކުއްޖާގެ މަސްލަހަތަށް އެންމެ ރަނގަޅު ގޮތް ނިންމުމެވެ.
މި މަރުހަލާގައި ކުއްޖާ ތައްޔާރުވެފައިވާ މިންވަރު ދެނެގަތުމަށްޓަކައި ޗައިލްޑް އެސެސްމެންޓު ހެދުމާއި، ކުއްޖާގެ އާއިލާ ހޯދުމާއި، ކުއްޖާގެ އާއިލާގެ އެސެސްމެންޓު ހެދުމާއި، ކުއްޖާގެ މަސްލަހަތަށް އެންމެ ރަނގަޅު ގޮތް ދެނެގަތުމުގެ ރިޕޯޓު ތައްޔާރުކޮށް، ރިޕޯޓު މެދުވެރިކޮށް އިޖްތިމާއީ ޚިދުމަތްތެރިޔާއަށް ފެންނަ ކަންކަން ކޮމިޓީއަށް ހުށަހެޅުމުގެ އިތުރުން ކުއްޖާގެ މަސްލަހަތަށް އެންމެ ރަނގަޅު ގޮތް ދެނެގަނެ، ކުއްޖާ އަލުން އެ ކުއްޖާގެ އާއިލާއާ ހަވާލުކުރުމާމެދު ކޮމިޓީން ގޮތެއް ނިންމާނެ ކަމަށް ޖެންޑަރ މިނިސްޓްރީން ވަނީ ބުނެފައެވެ.
ކުއްޖާ އަނބުރާ އާއިލާއާ ހަވާލުކުރުމުގެ ދެވަނަ މަރުހަލާގައި އާއިލާއާ ހަވާލުކުރުމަށްޓަކައި ކުއްޖާ ތައްޔާރުކުރުމާއި، ކުއްޖާ އާއިލާއާ ހަވާލުކުރުމުގެ ޕްލޭން ތައްޔާރުކުރުމާއި، ކުއްޖާ ގެންދިއުމަށް އާއިލާ ތައްޔާރުކުރުމަށް ބޭނުންވާ ކަންކަން ފާހަގަކުރާނެ ކަމަށް މިނިސްޓްރީން ބުނެފައިވެއެވެ.
ތިންވަނަ މަރުހަލާގައި ކުއްޖާ އާއިލާއާ ހަވާލުކުރުމަށް އާއިލާއާއެކު އެއްބަސްވުމަކަށް ދާނެ ކަމަށާއި، ކުއްޖާއާއެކު ގުޅުން ބަދަހި ކުރުވުމާއި، ކުއްޖާ އާއިލާއާ ހަވާލުކުރުމުގެ ކުރިން ފުރިހަމަކުރަންޖެހޭ ކަންކަން ފުރިހަމަކުރުމަށްފަހު އާއިލާއާ ކުއްޖާ ހަވާލުކުރާނެ ކަމަށް މިނިސްޓްރީން ބުނެފައިވެއެވެ.
އެއަށްފަހު ހަތަރުވަނަ މަރުހަލާގައި ކުއްޖާ މޮނިޓަރ ކުރުމާއި، ކުއްޖާއަށާއި އާއިލާއަށް ދޭންޖެހޭ އިތުރު އެހީތެރިކަން ދެނެގަނެ، އެ އެހީތެރިކަން ފޯރުކޮށްދިނުން ހިމެނެއެވެ.
ޖެންޑަރ މިނިސްޓްރީން ބުނީ ކުއްޖާއާއި އާއިލާއާ ދެމެދު ގުޅުން ހީނަރުވާ ހިސާބުން މިކަމާ ގުޅޭގޮތުން އަމަލުކުރުމަށް އެކުލަވާލާފައިވާ ކޮންޓިންޖެންސީ ޕްލޭނާ އެއްގޮތަށް އަމަލުކުރާނެ ކަމަށާއި، އެއަށްފަހު ވެސް ގުޅުން އިތުރަށް ގޯސްވާނަމަ ކޮމިޓީން އެކަމާމެދު ގޮތެއް ނިންމާނެ ކަމަށް މިނިސްޓްރީން ބުނެފައިވެއެވެ. މިފަދަ ހާލަތްތަކުގައި ކުއްޖާ އަނބުރާ ދައުލަތަށް ނެގޭނެ ކަމަށް ވެސް ޖެންޑަރ މިނިސްޓްރީން ބުނެފައިވެއެވެ.
