ކުރީގެ ރައީސް އަބްދުﷲ ޔާމީނަކީ ވައްކަމުގެ ކުށް ސާބިތުވެފައިވާ ބޭފުޅަކަށްވާއިރު، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދޫކުރައްވައި، ރައީސް ޔާމީނާއެކު މަސައްކަތް ކުރައްވަންވީ ކީއްވެތޯ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ސުވާލު އުފައްދަވައިފިއެވެ.
ރޮޒެއިނާ އެހެން ވިދާޅުވެފައިވަނީ ރައީސް ޞާލިޙާއެކު ސިޔާސީ މަސައްކަތް ކުރައްވަން ނުވިސްނަވާ ކަމަށާއި، ރައީސް ޔާމީނާއެކު މަސައްކަތް ކުރެއްވުމަށް ތައްޔާރަށް ހުންނެވިކަން، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ހާމަ ކުރައްވާފައިވާތީއެވެ. އެކަމާ ގުޅޭގޮތުން ރޮޒެއިނާ ކުރެއްވި ޓްވީޓެއްގައި ވިދާޅުވީ، އެމްޑީޕީގެ ވެރިކަމާ ދެކޮޅަށް ރައީސް ޔާމީނާއެކު މަސައްކަތް ނުކުރައްވާނެ ކަމަށެވެ. އަދި އެމްޑީޕީއަށް ވަދެވަޑައިގަތީވެސް ރައީސް ޔާމީނުގެ ވެރިކަން ދާނެގޮތް އެނގިވަޑައިގެން އެކަމާ ދެކޮޅަށް މަސައްކަތް ކުރާނެ ޕްލެޓުފޯމެއްގައި ހުންނެވުމަށް ކަމަށް ރޮޒެއިނާ ވިދާޅުވިއެވެ.
ރައީސް ޢަބްދުﷲ ޔާމީން ވެރިކަން ކުރެއްވީ ހީކުރެއްވި ވަރަށް ވުރެވެސް އަނިޔާވެރިކޮށްކަން ފާހަގަ ކުރައްވައި ރޮޒެއިނާ އިތުރަށް ވިދާޅުވީ، މިވަގުތުވެސް ރައީސް ޔާމީން ހުންނެވީ ވައްކަމުގެ ކުށް ސާބިތުވެ ޖަލު ހުކުމެއްގައި ކަމަށެވެ. އަދި މިއަދު ރައީސް ޞާލިޙާ ދެކޮޅަށް ރައީސް ޔާމީނާ ބައިވެރިވާންވީ ކީއްވެތޯއާއި، އަދި ރައީސް ޔާމީން އިންސާފު ހޯއްދަވައިދެއްވީ ކާކަށްތޯވެސް ރޮޒެއިނާ ވަނީ ސުވާލު އުފައްދާފައެވެ.
އޭގެ އިތުރުން، ރައީސް ޞާލިޙު ގޯސް ނޫންކަން ފާހަގަ ކުރައްވައި ރޮޒެއިނާ ވަނީ އެމަނިކުފާނު އަނިޔާވެރި ނޫން ކަމަށާއި، ވައްކަން ނުކުރައްވާކަމަށް ވިދާޅުވެފައެވެ. އަދި ކޮވިޑުގެ މި ހާލަތުގައިވެސް މަޝްރޫއުތައް ހިންގަވަމުން ގެންދަވާ ކަމަށާއި، ހަރުކަށި ފިކުރާ އެއްކޮޅަށް ރައީސް ޞާލިޙު ކުރެއްވި ކަމެއް އެބައޮތްތޯއާއި، އަދި ހަގީގަތުގައި މައްސަލައަކީ ކޮބައިތޯ އެކަމަނާ ވަނީ ސުވާލު އުފައްދަވާފައެވެ.
ދާދި ފަހުން ރައީސް ނަޝީދު ވަނީ، އެމްޑީޕީގެ މެމްބަރުން ނުރުހުނުކަމަށް ވިޔަސް، ސިޔާސީ މަސައްކަތުގައި ރައީސް ޔާމީނުގެ އެހީއަށް އެދިވަޑައިގަންނަވާނެކަން ހާމަ ކުރައްވާފައެވެ. އެމްޑީޕީގެ ޤައުމީ މަޖިލީހުގެ ވަޓްސްއަޕް ގްރޫޕުން ދައުރުވަމުންދާ މެސެޖުތަކެއްގައި ވެސް އެފަދަ ގޮތަކަށް ޚިޔާލު ފާޅު ކުރައްވާފައިވާއިރު، ރައީސް ޞާލިޙާއެކު ސިޔާސީ މަސައްކަތް ކުރެއްވުމުގެ ވިސްނުންފުޅު ރައީސް ނަޝީދު މިހާރު ނުގެންގުޅުއްވާކަމަށް ވެސް އެމަނިކުފާނު ވަނީ ވިދާޅުވެފައެވެ.
މި މެސެޖުތަކުގައި ރައީސަށް އަމާޒު ކުރައްވައި ބަހުގެ ހޫނު ހަމަލާތަކެއް ދެއްވާފައިވާއިރު، މިހާރު ވިސްނުންފުޅު ހުރީ ރައީސް ޢަބްދުﷲ ޔާމީނާއެކު މަސައްކަތް ކުރެއްވުމަށްކަން ދައުރުވަމުންދާ މެސެޖުތަކުން ހާމަވެއެވެ.
