ރައީސުލްޖުމްހޫރިއްޔާ އިބްރާހިމް މުހައްމަދު ސާލިހާއި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަކީ ރާއްޖޭގެ ސިޔާސީ މައިދާނުގެ "ދެގޮތެއް ނުވާ އެކުވެރިން" ގޮތުގައި އެންމެންވެސް ސިފަކުރާ ދެބޭފުޅުންނެވެ.
މި ދެބޭފުޅުންގެ މެދުގައި ޚިޔާލުތަފާތުވުން އުފެދި، ގުޅުން ހީނަރުވެފައިވާކަމަށް ވާހަކަ ފެތުރިފައިވާ ދަނޑިވަޅުތަކުގައިވެސް ދެބޭފުޅުންވެސް ވަނީ އެ ގުޅުމުގެ ވަރުގަދަކަން ބަޔާން ކުރައްވައި، އެއީ ދެގޮތެއް ނުވާނެ އެކުވެރިން ކަމުގައި ވިދާޅުވެފައެވެ. ރައީސް ނަޝީދުވެސް ވަނީ އެމަނިކުފާނާއި ރައީސް ސާލިހުގެ ގުޅުމާ ގުޅޭގޮތުން، ދެ އިނގިލީގެ މިސާލުން މިސާލު ޖައްސަވައި، އެއީ ދުރުނުކުރެވޭނެ ދެ ބޭފުޅުން ކަމަށާއި، އަބަދުވެސް ތިއްބަވާނީ އެކުގައި ކަމަށް ވިދާޅުވެފައެވެ.
ސިޔާސީ މަސްރަހުގައިވެސް މި ދެބޭފުޅުންގެ ޒަމާނީ އެކުވެރިކަން ފެންނަނީ ނުހަނު ބަދަހިކޮށެވެ. މަޖިލީހުގެ ރައީސަކު ހޮވުމަށް ގައުމީ މަޖިލީހުގައި ބޭއްވި ބައްދަލުވުމުގެ ތެރެއިންވެސް ރައީސް ނަޝީދު ފަހުގެ ލަފާފުޅަކަށް އެދިވަޑައިގެން ކުރެއްވި ޚާއްސަ ފޯނު ކޯލަކީވެސް ރައީސް ސާލިހަށް ކުރެއްވި ފޯން ކޯލެއްކަމަށް ބުނެވެއެވެ. ސިޔާސީ ނިންމުންތައް ނިންމެވުމާއި، ސިޔާސީ މައިދާނުގައިވެސް އަބަދުވެސް ފެނިގެން ދިޔައީ އެހާވެސް ގާތް، ވަރުގަދަ އެކުވެރިންގެ ގޮތުގައެވެ.
ރައީސް ސާލިހު ރިޔާސީ އިންތިޚާބު ކާމިޔާބު ކުރެއްވުމުންވެސް ރައީސް ނަޝީދު ވަނީ ދިވެހި ރައްޔިތުން އެއް އަޑަކުން ނޫނެކޭ ބުނީ އަނިޔާވެރިކަމާއި ވައްކަމަށް ކަމަށް ވިދާޅުވެފައެވެ. ރައްޔިތުން ވޯޓު ދެއްވީ ޖާހިލުކަމާއި ދެކޮޅަށް ކަމަށް ވިދާޅުވެފައެވެ. ރައީސް ސާލިހަށް ތައުރީފު ކުރައްވައި، އެމަނިކުފާނުގެ ސިޔާސީ ގާބިލުކަމާ ގުޅޭގޮތުންވެސް އެންމެ ބޮޑަށް ތައުރީފު ކުރައްވައި ވާހަކަ ދައްކަވާ ބޭފުޅަކަށް ރައީސް ނަޝީދު ވެވަޑައިގަންނަވާނެއެވެ.
ތެދެކެވެ. ރައީސް ނަޝީދު ވިދާޅުވާ ފަދައިން ރައީސް ސާލިހަކީ ކުޅަދާނަ ސިޔާސީ ލީޑަރެއްކަމަށް ގިނަ ބަޔަކު ގަބޫލު ކުރެއެވެ. މަޖިލީހުގައި ކާމިޔާބު ރިހިޔޫބީލެއް ނިންމަވާލެއްވީ ކޮރަޕްޝަނެއްގެ، ވައްކަމެއްގެ ތުހުމަތެއް ނެތި، ބައެއްގެ ނަފްރަތެއް ނެތިއެވެ. މަޖިލީހުގައި 25 އަހަރު ހޭދަ ކުރެއްވީ އެމްޑީޕީގެ ޕީޖީ ލީޑަރުކަމުގައި ކުރިމަތިވެވަޑައިގެން ސިޔާސީ ބޮޑެތި ފިއްތުންތަކުން އަރައިގަތުމަށް އެމަނިކުފާނުވެސް ކުޅަދާނަ ޚިޔާލާއި މަޝްވަރާ ބޭނުން ކުރައްވައިގެންނެވެ.
ދެން އޮތީ މިސަރުކާރު އައުމަށްފަހު ވެރިކަން ހިންގަމުންދާ ގޮތުގެ ވާހަކައެވެ. ރާއްޖޭގެ ތާރީޚުގައިވެސް ކޯލިޝަން ސަރުކާރުތައް ފެނިގެން ދިޔައީ ވެރިކަން ފެށި ދުވަސްކޮޅެއް ނުވަނީސް ރޫޅިގެންދާ އެއްޗެއްގެ ގޮތުގައެވެ. ނަމަވެސް މަޑުމައިތިރިކަމާއި ހިކުމަތްތެރިކަމާއެކު ކޯލިޝަނެއް ދެމެހެއްޓެވި ވެރިއަކަށް ރައީސް ސާލިހު ގައިމުވެސް ވާނެތާއެވެ.
ޚުދު ރައީސް ނަޝީދުވެސް ވަނީ ރައީސް ސާލިހަކީ އެއްވެސް އިރެއްގައި ހިޔަންޏެއް ނޫން ކަމަށާއި، ރައީސް ސާލިހަކީ އަބަދުވެސް "މުގުލެއް" ކަމަށް ތަކުރާރުކޮށް ސިޔާސީ ޕޯޑިއަމްތަކުގައި ވިދާޅުވެފައެވެ.
އޭގެ އެއް ހެއްކަކީ ކުރިމަތިވި އެކި ގޮންޖެހުންތަކާއެކު، ކޯލިޝަން ސަރުކާރުގެ ޕާޓްނަރުންގެ ސްލޮޓުތަކުގައި ތިއްބެވި ބޭބޭފުޅުން މަގާމުން ވަކި ކުރެއްވި ދަނޑިވަޅުތަކުގައިވެސް ހިތްހަމަނުޖެހުން ފާޅު ކުރެއްވުމުގެ ބަދަލުގައި ކޯލިޝަނުގެ އިސް ވެރިންވެސް ވަނީ އެމަނިކުފާނުގެ ސިޔާސީ ނިންމެވުންތަކަށް ތައުރީފި ކުރެއްވުމެވެ.
އެކަން އެހެން އެވީ، ރައީސް ސާލިހުގެ ކިބައިގައި ގައިމު ސިޔާސީ އުރަތްޕެއް ހުރީމާތާއެވެ. ގައިމުވެސް ވެރިކަމުގެ ދައުރެއް ނިންމަވާ އެލައްވަނީ އިދިކޮޅަށްވެސް މާބޮޑު ރައްދެއް ނުދެއްވައި، ނުހަނު މަޑުމައިތިރިކަމާއެކުގައެވެ. ސިޔާސީ އިދިކޮޅު ވެރިންތައް ޖަލަށްލައި ހައްދަވާ ތަނެއް މިއަދަކު ނުފެނެއެވެ. ފެންނަނީ ހުރިހާ ދިމާއަކުން އަންނަ ފިއްތުންތަކާއެކުވެސް ކަންކަމާ ކުރިމަތިލައްވާ މަންޒަރެވެ.
އޭގެ އިތުރުން، ރައީސް ސާލިހަކީ މަޖިލީހުގައި އެތައް އަހަރެއް ހޭދަކުރައްވާފައިވާ ބޭފުޅަކަށްވާއިރު، ރައީސް ނަޝީދު ވެރިކަން ކުރެއްވި އިރުވެސް އެންމެ ބޮޑު އެހީތެރިކަމެއް ލިބިވަޑައިގަތީ ރައީސް ސާލިހުގެ ފަރާތުން ކަމަށާއި، އެމްޑީޕީ ހިންގުމުގައިވެސް އެމަނިކުފާނުގެ އެއްބާރުލެއްވުން ވަރަށް ބޮޑަށް ލިބުނު ވާހަކައަކީ ރައީސް ނަޝީދު އަބަދުވެސް ދައްކަވާ ވާހަކައެކެވެ.
ކޮންމެއަކަސް ރާއްޖޭގެ ސިޔާސީ މަސްރަހަށް އަންނަމުންދާ ލޮޅުންތަކާއި ބަދަލުތަކާއެކު، އެންމެ ފަހުން ރައީސް ސާލިހަކީ ސިޔާސީ ގޮތުން ގުޅިގެން އުޅެވޭނެ ބޭފުޅެއް ނޫންކަމަށް މިއަދު ރައީސް ނަޝީދު މިވަނީ ވިދާޅުވެފައެވެ. މިއަދު އެންމެންވެސް ހަމަ ހިތަށް އަރަނީ ރައީސް ސާލިހު ކަމުދަނީ "އިބޫ ދޮންބެ" އެއް ގޮތަށް އެކަނިބާއެވެ. ކުރިން އެވަރެއް ނެތިފައި މިހާރު އެއްވަރެއްވެސް ނުވަނީ ބާވައެވެ.
