އެމްޑަބްލިޔުއެސްސީން އަތޮޅުތެރޭގައި ކުރިއަށްގެންދާ މަޝްރޫއުތަކުން ވަޒީފާގެ ފުރުސަތުތައް ފަހިވޭ
11 ޖުލައި 2021 | އާދީއްތަ 08:3334 ރަށެއްގައި ފެނާއި ނަރުދަމާގެ މަސައްކަތްތައް ކުރިއަށްދޭ
އެމްޑަބްލިއުއެސްސީގެ މެނޭޖިން ޑިރެކްޓަރު ހަސަން ޝާހު،
މާލެ ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިޔުއެސްސީ) އިން އަތޮޅުތެރޭގައި ކުރިއަށް ގެންދާ ތަރައްގީގެ މަޝްރޫއުތަކުން އެރަށެއްގައި ވަޒީފާގެ ފުރުސަތުތައް ފަހިވެގެންދާނެ ކަމަށް އެކުންފުނީގެ މެނޭޖިން ޑިރެކްޓަރު ހަސަން ޝާހު ވިދާޅުވެއްޖެއެވެ.
ފަލަސުރުހީ ޕްރޮގްރާމްގައި ވާހަކަދައްކަވަމުން ޝާހު ވިދާޅުވީ އެމްޑަބްލިޔުއެސްސީގެ ފަރާތުން ގާތްގަނޑަކަށް 34 ރަށެއްގައި ފެނާއި ނަރުދަމާގެ ޚިދުމަތް ފޯރުކޮށްދިނުމުގެ މަޝްރޫއުތަކުގެ އަމަލީ މަސައްކަތްތައް ކުރިއަށްދާ ކަމަށެވެ. މި މަޝްރޫއުތައް ކުރިއަށްދާ ހުރިހާ ރަށަކީ އެމްޑަބްލިޔުއެސްސީން އޮޕަރޭޓް ކުރަމުންދާ ރަށްތައް ނޫންކަން ފާހަގަކުރައްވައި ޝާހު ވިދާޅުވީ ކޮންމެވެސް ހާލަތެއް މެދުވެރިވެގެން މަސައްކަތްތައް ކުރިއަށް ނުދާ ރަށްރަށާއި، މަސައްކަތުގެ ސްޕީޑްލަސްވުމުގެ އިތުރުން އެހެނިހެން މައްސަލަތައް ދިމާވެ މަސައްކަތްތައް ކުރަމުންދިޔަ ކޮންޓެކްޓަރުންގެ އަތުން މަސައްކަތް ނެގުމަށްފަހު އެމްޑަބްލިޔުއެސްސީއާ ހަވާލުކޮށްފައިވާ މަޝްރޫއުތައް ހިމެނޭ ކަމަށެވެ.
ޝާހު ވިދާޅުވީ މަސައްކަތްތައް ކުރިއަށް ގެންދާއިރު، އެންމެ ބޮޑު އިސްކަމެއް ދެނީ އެރަށެއްގައި ކުރިއަށް ގެންދާ މަޝްރޫއުގައި އެރަށަކުން މުއައްޒަފުން ނެގުމަށް ކަމަށެވެ. އެގޮތުން މަޝްރޫއުތައް ކުރިއަށްދާ ރަށްރަށުން 8 ނުވަތަ 7 މުއައްޒަފުން ނަގާކަން ޝާހު ފާހަގަކުރެއްވިއެވެ.
މީގެ އިތުރުން ޝާހު ވިދާޅުވީ ސަބް-ކޮންޓްރެކްޓަރުންގެ ގޮތުގައި މަސައްކަތްތައް ހަވާލުކުރާއިރު، އެމަސައްކަތެއް ދިވެހި ކުންފުނިތަކަށް ދޫކޮށްލުމަށް އިސްކަންދޭ ކަމަށެވެ. އަދި ވިދާޅުވީ އެމްޑަބްލިޔުއެސްސީގެ މަސައްކަތްތައް ކުރިއަށް ގެންދަނީ ދަނީ ކޮންޕޯނަންޓްތަކަށް ބަހާލައިގެން ކަމަށެވެ. އެހެންކަމުން ވަޒީފާގެ ފުރުސަތުތައް އިތުރުވެގެންދާކަން ޝާހު ފާހަގަކުރެއްވިއެވެ.
ޝާހު އިތުރަށް ވިދާޅުވީ މި ސަރުކާރުގެ ސިޔާސަތުތައް ތަންފީޒު ކުރުމަކީ އެމްޑަބްލިޔުއެސްސީން ޚާއްސަ އިސްކަމެއް ދީގެން ކުރިޔަށް ގެންދާ ކަމެއް ކަމަށެވެ. އެގޮތުން ރަށްރަށުގައި ފެނާއި ނަރުދަމާގެ މަސައްކަތް ކުރުމަށް އެމްޑަބްލިޔުއެސްސީ ޚާއްސަ އިސްކަމެއް ދެއްވާ ކަމަށް ޝާހު ވިދާޅުވިއެވެ. އަދި ދިވެހިންނަށް ވަޒީފާގެ ފުރުސަތު ފަހިކޮށްދިނުމަކީ މިސަރުކާރުގެ އެއް ސިޔާސަތެވެ.
