ފުވައްމުލައް ސިޓީގެ އެތެރޭގެ މަގުތައް ތަރައްގީކުރުމުގެ 50 އިންސައްތަ މަސައްކަތް ނިމިއްޖެ
11 ޖުލައި 2021 | އާދީއްތަ 06:59ސެޓްލްމެންޓް ޓޭންކު ހަރުކުރުމުގެ މަސައްކަތުގެ 71 އިންސައްތަ މަސައްކަތް ވަނީ ނިމިފައި
ފުވައްމުލައް ސިޓީ އެތެރޭގެ މަގުތައް ހެދުމުގެ މަސައްކަތުގެ ތެރެއިން
ފުވައްމުލައް ސިޓީ އެތެރޭގެ މަގުތައް ޒަމާނީ ފެންވަރަށް ހެދުމުގެ މަޝްރޫއުގެ މަސައްކަތުގެ 50 އިންސައްތަ މަސައްކަތް ނިމިއްޖެއެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ބުނީ ފުވައްމުލައް އެތެރޭގެ މަގުތައް ހެދުމުގެ މަޝްރޫއުގެ މަސައްކަތް ބާރު ސްޕީޑްގައި ކުރިއަށްދާ ކަމަށާއި، 50 އިންސައްތަ މަސައްކަތް ނިމިފައިވާ ކަމަށެވެ. މި މަޝްރޫއުގެ ދަށުން، ސެޓްލެމެންޓް ޓޭންކު ހަރުކުރުމުގެ މަސައްކަތުގެ 71 އިންސައްތަ އަދި އިލެކްޓްރިކަލް ޖަންކްޝަން ފޮށި ހަރުކުރުމުގެ މަސައްކަތުގެ 70 އިންސައްތަ މަސައްކަތް ނިމިފައިވާ ކަމަށް އެމްޓީސީސީން ބުނެއެވެ.
ފުވައްމުލައް ސިޓީގެ އެތެރޭގެ މަގުތަކުގައި ތާރުއަޅައި، ޒަމާނީ ފެންވަރަށް ތަރައްގީކުރުމުގެ މަސައްކަތް ފަށާފައި މިވަނީ، ފުވައްމުލަކުގެ ރިންގް ރޯޑްގެ މަސައްކަތް އެމްޓީސީސީން 30 ޑިސެމްބަރ 2020ގައި ނިންމާލުމަށް ފަހުއެވެ
ފުވައްމުލަކު އެތެރޭގެ މަގުތައް ތަރައްގީކުރުމުގެ މަސައްކަތުގެ ދަށުން 16 ކިލޯމީޓަރުގެ މަގު ހެދުމުގެ މަސައްކަތް ކުރުމަށް ވަނީ ހަވާލުކޮށްފައެވެ. ފުވައްމުލައް ސިޓީގެ އެތެރޭގެ މަގުތައް ޒަމާނީފެންވަރަށް ތަރައްގީކުރުމުގެ މަސައްކަތުގެ ދަށުން ޖުމުލަ 31 މަގުގައި ތާރުއަޅުމަށް ވަނީ ނިންމާފައެވެ. ރިންގް ރޯޑް ފަދައިން އެތެރޭގެ މަގުތަކުގައި ވެސް ދުވާރު ހެދުމާއި، މަގުމަތީ ނިޝާން ހަރުކުރުމާއި ލެޑް ލައިޓް ހަރުކުރުމާއި، ސްޓޯމް ވޯޓަރ މެނޭޖްމަންޓް ސިސްޓަމް ޤާއިމުކުރުމުގެ މަސައްކަތް ކުރާނެއެވެ.
ފުވައްމުލައް ސިޓީގެ މަގުތަކަށް ދިމާވެފައިވާ މައްސަލަތައް ހައްލުކުރުމަށް ކުރީގެ ސަރުކާރުތަކުން ވެސް މަސައްކަތްތަކެއް ވަނީކޮށްފައެވެ. އެހެންނަމަވެސް މަސައްކަތް ފުރިހަމަނުކުރެވި ހުއްޓިފައި އޮތުމަށްފަހު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙްގެ ސަރުކާރުން މި މަސައްކަތް އަލުން ފަށައި، ހަލުވި ދުވެލީގައި ހިންގަމުންދާތީ މިކަމުގެ އުފާ ފުވައްމުލައް ސިޓީގެ ރައްޔިތުން ދަނީ ފާޅުކުރަމުންނެވެ.
މި މަޝްރޫއަކީ ދައުލަތުގެ ބަޖެޓުން 37.19 މިލިއަން ރުފިޔާ ޚަރަދުކޮށްގެން ހިންގާ މަޝްރޫއެއްކަމަށް އެމްޓީސީސީން މަޢުލޫމާތު ދެއެވެ.
