ކުޑަކުއްޖަކު ލައްވާ ހަށިވިއްކުވި މައްސަލައިގެ ތުހުމަތުގައި ލަންކާއިން ދިވެއްސަކު ހައްޔަރުކޮށްފި

15 އަހަރުގެ ކުޑަ އަންހެން ކުއްޖަކު ލައްވާ ހަށިވިއްކުވި މައްސަލައެއްގައި ލަންކާއިން ދިވެއްސަކާއެކު އިތުރު ބަޔަކު ހައްޔަރުކޮށްފިއެވެ.

ލަންކާގެ ނޫހެއް ކަމަށްވާ ނިއުސް ވަޔަރ ގައި ބުނެފައިވަނީ 15 އަހަރުގެ ކުޑަ އަންހެން ކުއްޖަކު ލައްވާ ހަށިވިއްކުވި މައްސަލައިގައި ހައްޔަރުކޮށްފައިވަނީ 4 މީހުން ކަމަށާއި، މީގެ ތެރޭގައި ދިވެއްސަކު ވެސް ހިމެނޭ ކަމަށެވެ. މިހާތަނަށް ލިބިފައިވާ މައުލޫމާތުތަކަށް ބަލާއިރު، ހައްޔަރު ކޮށްފައިވަނީ މީގެ ކުރިން ސަރުކާރުތަކުގެ އިސްމަގާމުތަކުގައި އުޅުއްވި ބޭފުޅެކެވެ.

ލަންކާގެ ފުލުހުންގެ ތަރުޖަމާނު އެސްޑީއައިޖީ އަޖިތް ރޯހާނާއާއި ހަވާލާދީ ލަންކާގެ ނޫހުގައި ބުނެފައިވަނީ އޮންލައިންކޮށް ހަށިވިއްކުމުގެ ވަގުފާރި ކުރަމުންދިޔަ ނެޓްވޯކެއްގެ މައުލޫމާތު ލިބުމާ ގުޅިގެން ހިންގި ތަހުގީގެއްގެ ތެރެއިން ކަމަށެވެ. މި މީހުން އަތުލައިގެންފައިވަނީ ދިވެހިންގެ މެދުގައި މަޝްހޫރު އެއް ހޮޓަލް ކަމުގައިވާ މައުންޓް ލެވީނިއާގައި މިދިޔަ ޖޫން މަހުގެ ތެރޭގައެވެ.

ތަރުޖަމާނު ވިދާޅުވެފައިވަނީ ފައިސާއަށް ކުޑަކުއްޖާ ވިއްކުމުގެ މުއާމަލާތް ކުރަމުން ދިޔަ މައި ވެބްސައިޓުގެ އިތުރުން، އިތުރު 4 ވެބްސައިޓެއް ވެސް މިކަމުގައި ބޭނުންކޮށްފައިވާ ކަމަށެވެ.

ހައްޔަރު ކުރެވުނު 4 މީހުންގެ ތެރެއިން ދެ މީހަކު ހައްޔަރުކޮށްފައިވަނީ ވެބްސައިޓް ހިންގާކަމުގެ ތުހުމަތުގައި އާދިއްތަ ދުވަހުއެވެ. އަދި ދިވެހި ފިރިހެން މީހާ ހައްޔަރު ކޮށްފައިވަނީ ކަސްޓަމަރެއްގެ ހައިސިއްޔަތުން އެ ނެޓްވޯކަށް އެހީތެރިވެދޭކަމުގެ ތުހުމަތުގައެވެ.

ހައްޔަރު ކުރެވުނު ހަތަރުވަނަ މީހާއަކީ މައުންޓްލެވޭނިއާގެ މެނޭޖަރެވެ. އޭނާ ހައްޔަރުކުރީ މި އަމަލުގައި ކަސްޓަމަރުންގެ ގޮތުގައި ބައިވެރިވާ ފަރާތްތަކަށް ކޮޓަރި ހަމަޖައްސައިދޭތީއެވެ.

ތަރުޖަމާނު ރޯހާނާ ވިދާޅުވީ މި މައްސަލައާ ގުޅިގެން މިހާތަނަށް 32 މީހަކު ހައްޔަރުކޮށްފައިވާ އިރު، ދިވެހި ފިރިހެން މީހާގެ އިތުރުން އެ ކުޑަކުއްޖާގެ މަންމައާއި، އޮޓޯ ދުއްވާ މީހަކާއި، ކާރު ދުއްވާ މީހެއްގެ އިތުރުން ގަހަނާ ވިއްކާ މީހަކާއި ފާދިރީއެއް ވަނީ ހައްޔަރުކޮށްފައެވެ. މީގެ އިތުރުން ބޯޓެއްގެ ކެޕްޓަނާއި، އެ ބޯޓުގެ ފަޅުވެރިންނާއި، މިހިންޓާލޭ ޕްރަދޭޝިއާ ސާބާގެ ޑެޕިއުޓީ ޗެއަރމަން ވެސް ވަނީ ހައްޔަރުކޮށްފައެވެ.

މީގެ އިތުރުން 3 މީހަކު ހައްޔަރުކޮށްފައިވަނީ ވެބްސައިޓުގައި އިސްތިހާރު ޖެހި މައްސަލައިގައެވެ. މީގެ އިތުރުން ކުޑަކުއްޖާއެކު ބަދު އަހުލާގީ އަމަލު ހިންގާ ރޭޕް ކުރި މައްސަލައިގައި އިތުރު 12 މީހަކު ދެނެގަނެވިފައިވާކަމަށް ލަންކާ ފުލުހުން ބުނެއެވެ.

މި މައްސަލައިގައި އެންމެ އިސްކޮށް އުޅުނު މީހާ މިދިޔަ މަހުގެ 7 ވަނަ ދުވަހު ލަންކާ ފުލުހުން ވަނީ ހައްޔަރުކޮށްފައެވެ. މި މައްސަލައިގައި ހިމެނޭ 15 އަހަރުގެ އަންހެން ކުއްޖާ 3 މަސް ވަންދެން އެކި މީހުންނަށް ދީގެން ނަޖާއިޒް ފައިދާ ނަގާފައިވާ ކަމަށް ފުލުހުން ވަނީ ބުނެފައެވެ.