ދިވެހި ޕްރިމިއާ ލީގުގެ އައު ފޯމެޓުގެ މަސައްކަތަށް މުޙައްމަދު އާދަމް

ދިވެހި ޕްރިމިއާ ލީގު މުޅި ރާއްޖެއަށް ފުޅާކޮށްލަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ކުރަމުން އަންނަ މަސައްކަތުގައި ކޮންސަލްޓަންޓަކަށް ފުޓްބޯޅަ ކޯޗު މުޙައްމަދު އާދަމް ހަމަޖައްސައިފިއެވެ.

ދިވެހި ޕްރިމިއާ ލީގު މުޅި ރާއްޖެ އަށް ފުޅާކުރުމުގެ ވިސްނުން ގެންގުޅެމުން އަންނަ ކަމަށް އެފްއޭއެމުގެ ރައީސް ބައްސާމް އަދީލް ޖަލީލް އެންމެ ފުރަތަމަ ވިދާޅުވީ 2017 ވަނަ އަހަރުއެވެ. އޭގެ ފަހުން މިދިޔަ އަހަރު އެފްއޭއެމުން ވަނީ ކޮމިޓީއެއް އެކުލަވާލައި 2023-2024 ވަނަ އަހަރުގެ ދިވެހި ޕްރިމިއާ ލީގު މުޅި ރާއްޖެއަށް ފުޅާކޮށްލައިގެން، ހޯމް އެންޑް އަވޭ އުސޫލުން ކުރިއަށް ގެންދިއުމުގެ މަސައްކަތް ފަށާފައެވެ.

މުޅި ރާއްޖެއަށް ލީގު ފުޅާކުރުމުގެ ޕްލޭން އެކުލަވާލުމުގައި އެންމެ އިސްކޮށް ހަރަކާތްތެރިވަނީ އެފްއޭއެމުގެ ސީނިއާ ނައިބު ރައީސް އަލީ އުމަރާއި، ގައުމީ ފުޓްބޯޅަ ޓީމުގެ އެސިސްޓަންޓް ކޯޗު އަލީ ސުޒޭނެވެ. ހޮނިހިރު ދުވަހު ކުރެއްވި ޓްވީޓެއްގައި ބައްސާމް ވަނީ އެ މަސައްކަތުގައި ކޮންސަލްޓަންޓެއްގެ ގޮތުގައި މަސައްކަތް ކުރަން މުޙައްމަދު އާދަމް ހަމަޖައްސާފައިވާކަން އިއުލާން ކުރައްވާފައެވެ.

އެފްއޭއެމާ މުޙައްމަދު އާދަމް ގުޅުނުއިރު، އޭނާ އެންމެ ފަހުން މަސައްކަތް ކޮށްފައިވަނީ ޔުނައިޓެޑް ވިކްޓަރީ (ޔޫވީ) ގެ ކޯޗެއްގެ ގޮތުގައެވެ. އެ ޓީމުގެ ކޯޗުގެ މަގާމުން މުޙައްމަދު އާދަމް އިސްތިއުފާދީފައިވަނީ މި އަހަރުގެ ޖެނުއަރީ މަހުގެ ތެރޭގައެވެ. މީގެ ކުރިން އެފްއޭއެމުގެ ނޯމަލައިޒޭޝަން ކޮމިޓީގެ ދުވަސްވަރު، މުޙައްމަދު އާދަމް އެ އިދާރާގެ ޖެނެރަލް ސެކެޓްރީގެ މަގާމު އަދާކުރެއްވިއިރު، އޭނާ ވަނީ އެފްއޭއެމުގެ މާކެޓިން ޑިޕާޓްމަންޓުގެ އިސް މަގާމެއްވެސް ފުރުއްވާފައެވެ.

މިދިޔަ މެއި މަހު ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަވަމުން ބައްސާމް ވިދާޅުވީ ރާއްޖޭގެ ރަނގަޅު ފުޓްބޯޅަ ލީގެއް ފެށިގެންދާނީ ދިވެހި ޕްރިމިއާ ލީގު މުޅި ރާއްޖެއަށް ފުޅާކޮށްލެވުމުން ކަމަށެވެ. އަދި މިހާރު އެކުލަވާލާފައިވާ ޕްލޭނުގައިވާ ގޮތުން ފުރަތަމަ ދެ ތިން އަހަރު އެ ލީގުގައި ވާދަކުރާނީ 12 ވަރަކަށް ޓީމު ކަމަށާއި، އޭގެ ތެރޭގައި އަތޮޅު ތެރޭގެ ޓީމުތައްވެސް ފުދޭވަރަކަށް ހިމެނިގެންދާނެ ކަމަށް ވިދާޅުވިއެވެ. އަދި ލީގު އެގޮތަށް ފެށުމަށްފަހު ފަހެއް ނުވަތަ ހަ އަހަރުގެ ތެރޭގައި މުޅި ލީގުގައި ހުސް އަތޮޅުތެރޭގެ ޓީމުތައް ތިބުމަކީވެސް އެކަށީގެންވާ ކަމެއް ކަމަށް ބައްސާމް ވަނީ ވިދާޅުވެފައެވެ.

ދިވެހި ޕްރިމިއާ ލީގު މުޅި ރާއްޖެއަށް ފުޅާކޮށްލަން މަސައްކަތް ކުރަމުން އަންނައިރު، ހޯމް އެންޑް އަވޭ އުސޫލަށް ލީގު ބަދަލުކުރުމުގެ މަސައްކަތަށް ލިބޭ އެންމެ ބޮޑު ފަސޭހައަކީ ކޮރެއާ ކުންފުންޏެއް ކަމަށްވާ ސްކައިވިންޑް ގްލޯބަލްއާއެކު 2019 ވަނަ އަހަރު ވެވުނު އެއްބަސްވުމުގެ ތެރެއިން ރާއްޖޭގައި އަޅާ 20 ޓާފް ދަނޑާއި ސަރުކާރުގެ ފަރާތުން މި ފަސް އަހަރު ތެރޭގައި މުޅި ރާއްޖޭގައި އަޅަން ނިންމާފައިވާ 100 ޓާފް ދަނޑުތަކެވެ. ސަރުކާރުން މިހާތަނަށް 10 ރަށެއްގެ ފުޓްބޯޅަ ދަނޑުތަކުގައި ޓާފް އަޅާފައިވާއިރު، އެފްއޭއެމުން ދާދި ފަހުން ވަނީ ރާއްޖޭގެ 16 ރަށެއްގައި ޓާފް ދަނޑު އެޅުމަށް އިއުލާން ކޮށްފައެވެ.