އައްޑޫ ސިޓީގައި އަޅާފައިވާ ބައެއް ފިޔަވަޅުތަކަށް ލުއިދީފި
ހިތަދޫގައި އަޅާފައިވާ ފިޔަވަޅުތަކުގެ ތެރެއިން ބައެއް ފިޔަވަޅުތަކަށް ލުއި ދިނުމަށް ވެސް ނިންމާފައިވޭ
ލުއިދީފައިވަނީ އައްޑޫ ސިޓީ ކައުންސިލްގެ އިދާރާއިން އަޅާފައިވާ ފިޔަވަޅުތަކުގެ ތެރެއިން ބައެއް ފިޔަވަޅުތަކަށް
ކޮވިޑް-19އާއި ގުޅިގެން އައްޑޫ ސިޓީގައި އަޅާފައިވާ ބައެއް ފިޔަވަޅުތަކަށް ލުއިދީފައިވާ ކަމަށް އައްޑޫ ސިޓީ ކައުންސިލުން ބުނެފިއެވެ.
ސިޓީ ކައުންސިލުން ބުނީ ލުއިދީފައިވަނީ އަޅާފައިވާ ފިޔަވަޅުތަކުގެ ތެރެއިން ބައެއް ފިޔަވަޅުތަކަށް ކަމަށެވެ. އެގޮތުން އައްޑޫ ސިޓީގެ ހިތަދޫ ފިޔަވައި އެހެން އަވަށްތައް (މަރަދޫ، މަރަދޫފޭދޫ، ފޭދޫ)ގައި މިހާރު އަޅާފައިވާ ފިޔަވަޅުތަކުގެ ތެރެއިން ބައެއް ފިޔަވަޅުތަކަށް ލުއިދިނުމަށް ނިންމަވާފައިވާ ކަމަށެވެ.
އެގޮތުން ދީފައިވާ ލުއިތަކަކީ:
1. ހޮޓާތަކާއި، ކެފޭތަކާއި ރެސްޓޯރަންޓުތަކާއި ގާޑިޔާތަކާއި ކާބޯތަކެތީގެ ޚިދުމަތްދޭ އެހެނިހެން ތަންތަނުނުން ހެނދުނު 08:00 އިން ރޭގަނޑު 10:00 އާ ހަމައަށް ޓެކްއަވޭ އާއި ޑެލިވަރީގެ ޚިދުމަތްދިނުމަށް ހުއްދަދިނުން.
2. ފިހާރަތައް ހުޅުވައިގެން ހެނދުނު 06:00 އިން ފެށިގެން ރޭގަނޑު 09:00 އަށް ޚިދުމަތްދިނުމަށް ހުއްދަދިނުން. އަދި ރޭގަނޑު 10:00 އާ ހަމައަށް ޑެލިވަރީކުރުމަށް ފިހާރަތަކަށް ހުއްދަދިނުން.
3. މިސްކިތްތަކުގައި ޖަމާއަތް ހަދައިގެން ނަމާދުކުރުމަށް ހުއްދަދިނުން.
މީގެ އިތުރުން އައްޑޫ ސިޓީ ހިތަދޫގައި އަޅާފައިވާ ފިޔަވަޅުތަކުގެ ތެރެއިން ބައެއް ފިޔަވަޅުތަކަށް ލުއި ދިނުމަށް ފެންނަކަމަށް ވެސް ނިންމާފައިވެއެވެ.
އެގޮތުން ދީފައިވާ ލުއިތަކަކީ
1. އެއްގަމު އުޅަނދުފަހަރު ދުއްވުމާއި މަގުމައްޗާއި އާންމު ތަންތަނަށް މީހުން ނުކުތުން މަނާވަގުތަކީ ރޭގަނޑު 09:00 އިން ފަތިހު 04:00 ކަމުގައި ހަމަޖައްސައި، މިވަގުތު ތަކުގައި އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށް މީހުން ނުކުތުން މަނާކުރުން.
2. މިސްކިތްތަކުގައި ނަމާދުކުރުމަށް ހުއްދަދިނުން. (ޖަމާއަތުގައި ނަމާދުކުރުން ނުހިމެނޭގޮތަށް)
3. ފިހާރަތައް ހުޅުވައިގެން ހެނދުނު 06:00 އިން ފެށިގެން ރޭގަނޑު 09:00 އަށް ޚިދުމަތްދިނުމަށް ހުއްދަދިނުން. އަދި ރޭގަނޑު 10:00 އާ ހަމައަށް ޑެލިވަރީކުރުމަށް ފިހާރަތަކަށް ހުއްދަދިނުން.
4. ހޮޓާތަކާއި ކެފޭތަކާއި ރެސްޓޯރަންޓުތަކާއި ގާޑިޔާތަކާއި ކާބޯތަކެތީގެ ޚިދުމަތްދޭ އެހެނިހެން ތަންތަނުން ހެނދުނު 08:00ން ރޭގަނޑު 10:00 އާ ހަމައަށް ޑެލިވަރީގެ ޚިދުމަތްދިނުމަށް ހުއްދަދިނުން. އަދި ކާފިއު ނޫން ވަގުތުތަކުގައި ޓޭކްއަވޭއަށް ހުއްދަދިނުން.
