ވިޔަފާރިވެރިންގެ ޖަމްއިއްޔާގެ އައު ބޯޑުގެ 40 އިންސައްތައަކީ އަންހެން މެމްބަރުން
30 ޖޫން 2021 | ބުދަ 11:58ބޯޑު މެމްބަރުންގެ ދައުރަކީ އެއް އަހަރު
ވިޔަފާރިވެރިންގެ ޖަމްއިއްޔާގެ އައު ރައީސް މުދުރިކަތު މޫސާއާއި ނައިބު ރައީސާ އާޝިއާ އަޒީމާ
ވިޔަފާރިވެރިންގެ ޖަމްއިއްޔާގެ އައު ބޯޑު އެކުލަވާލައިފިއެވެ.
ސާޅީސް އިންސައްތަ އަންހެން މެމްބަރުންނާއެކު އެކުލަވާލި މިބޯޑުން މަސައްކަތް ކުރާނީ ސަރުކާރާ ގުޅިގެން ކަމަށް ވަނީ ބުނެފައެވެ. އެ ޖަމިއްޔާގެ ރައީސްއަކަށް ހޮވާފައިވަނީ ރައްޔިތުންގެ މަޖިލީހުގެ ކުރީގެ ނާއިބު ރައީސް މޫސާ މަނިކު (ރީކޯ)ގެ ދަރިކަލުން މުދުރިކަތު މޫސާއެވެ. އަދި ނައިބް ރައީސްއަކަށް ހޮވާފައިވަނީ އާޝިއާ އަޒީމާއެވެ.
ރައީސް މުދުރިކަތު ވިދާޅުވީ، ކޯވިޑާ ގުޅިގެން ވިޔަފާރިތަކަށް ވަމުންދާ ގެއްލުންތައް ކުޑަކޮށް، މިހާލަތުން އަރައިގަތުމަށް ސަރުކާރާއި ގުޅިގެން މަސައްކަތްކުރުމަށް ތައްޔާރަށް ތިބިކަމަށެވެ. އަދި މިހާރު ކުރިމަތިވެފައިވާ ދަތި ހާލަތުގައި ސަރުކާރާއި ގުޅިގެން މަސައްކަތްކުރުމަށް ބޭނުންވާ ކަމަށާއި، ވިޔަފާރިތަކަށް 'ކޮވިޑް ރިކަވަރީ ޕްލޭން'އެއް އެކުލަވާލުމުގެ މަސައްކަތް ކުރުމަށް އެޖަމިއްޔާއިން ބޭނުންވާ ކަމަށެވެ.
ވަރަށް އަވަހަށް ޖަމިއްޔާގެ ހިންގާނެ ގޮތުގެ ޕްލޭނެއް އެކުލަވާލައި، ވިޔަފާރިވެރިންނާއި ބައްދަލުކޮށް، ވިޔަފާރިވެރިންގެ މަޝްވަރާގެ މަތިން އެކްޝަން ޕްލޭނެއް އެކުލަވާލައްވާނެ ކަމަށްވެސް މުދުރިކަތު ވިދާޅުވިއެވެ.
އަލަށް އެކުލަވާލި ބޯޑުގައި އަންހެން މެމްބަރުން އިތުރު ކުރުމުގެ މަގްސަދަކީ ވިޔަފާރީގެ މައިދާނުގައި އަންހެނުންގެ ބައިވެރިވުން އިތުރު ކުރުން ކަމަށް ޖަމިއްޔާގެ ރައީސް ވިދާޅުވިއެވެ.
11 މެމްބަރުން ހިމެނޭ މި ބޯރޑްގެ ދައުރަކީ އެއް އަހަރެވެ. މިދިޔަ ދައުރުގައި ޖަމިއްޔާގެ ރައީސްއަކަށް ހުންނެވީ އިސްމާއީލް ނޫރައްދީންއެވެ.
