ކޮރަޕްޝަނަށް މަގުފަހިވާ މަސައްކަތެއް ކޮށްފައިވާ މައްސަލައިގައި ނިމާލް އޭސީސީއަށް ހާޒިރުކުރަނީ
30 ޖޫން 2021 | ބުދަ 02:35ނިމާލް އޭސީސިއަށް ހާޒިރުކުރަނީ ބ. އޭދަފުށީ އިންޖީނުގެއަށް މުވައްޒަފުން އިތުރު ކުރުމަށްޓަކައި އެއްވެސް އިއުލާނެއް ނުކޮށް ކޮރަޕްޝަނަށް މަގުފަހިވާގޮތަށް މުވައްޒަފުން ނަގަމުންދާ މައްސަލައާ ގުޅިގެން
ފެނަކަ ކޯޕަރޭޝަންގެ ކުރީގެ މެނޭޖިންގ ޑިރެކްޓަރ ނިމާލް
ކުރީގެ ރައީސް އަބްދުﷲ ޔާމީންގެ ވެރިކަމުގައި ފެނަކަ ކޯޕަރޭޝަންގެ މެނޭޖިންގ ޑިރެކްޓަރުކަމުގައި ހުންނެވި މުހައްމަދު ނިމާލް، ކޮރަޕްޝަނަށް މަގުފަހިވާގޮތަށް ކޮށްފައިވާ މަސައްކަތަކާ ގުޅޭ ގޮތުން އެންޓި ކޮރަޕްޝަން ކޮމިޝަން (އޭސީސީ) އަށް ހާޒިރުވުމަށް އަންގައިފިއެވެ.
ކ. އަތޮޅު ކައުންސިލްގެ ރައީސްގެ މަގާމުގައި ހުންނެވި ނިމާލް އޭސީސިއަށް ހާޒިރުވާން އަންގާފައިވަނީ ބުދަ ދުވަހުގެ 11:30 ގައެވެ. އޭސީސީން ނިމާލް އަށް ހާޒިރުވާން އަންގާ ފޮނުވި ޗިޓްގައި ބުނެފައިވަނީ ބ. އޭދަފުށީ އިންޖީނުގެއަށް މުވައްޒަފުން އިތުރު ކުރުމަށްޓަކައި އެއްވެސް އިއުލާނެއް ނުކޮށް ކޮރަޕްޝަނަށް މަގުފަހިވާގޮތަށް މުވައްޒަފުން ނަގަމުންދާ މައްސަލައާ ގުޅިގެން މައުލޫމާތު ސާފުކުރުމުގެ ގޮތުން ބަޔާނެއް ނެގުމާއި ސޮއިކުރުމަށް ބޭނުންވާ ކަމަށެވެ.
މިކަމާ ގުޅިގެން އިދިކޮޅު ކޯލިޝަނުން ބުނެފައިވަނީ ކ. އަތޮޅު ކައުންސިލްގެ ރައީސް އަދި އެލްޖީއޭގެ ބޯޑު މެންބަރު ނިމާލު އޭސީސީއަށް ހާޒިރުވުމަށް އަންގާފައިވާ ކަމަކީ ވާދަވެރި ސިޔާސީ ޕާޓީގެ ގޮތުގައި މިވަގުތު އޮތް ކޯލިޝަނަށް ބިރުދައްކައި، ސިޔާސީ ނުފޫޒު ބޭނުންކޮށްގެން ޕީޕިއެމް ޕީއެންސީގެ މަސައްކަތް ހުއްޓުވަން ކުރަމުންދާ މަސައްކަތެއް ކަމަށެވެ. އަދި އެ ކޯލިޝަންގެ ފަރާތުން މަގާމުތަކަށް ހޮވިވަޑައިގެންފައިވާ ބޭފުޅުންގެ މަސައްކަތަށް ހުރަސް އެޅުމަށް ސަރުކާރުން ހިންގާ އަމަލެއް ކަމުގައި ދެކެވަޑައިގަންނަވާ ކަމަށެވެ.
ނިމާލް ހިންގިކަމަށް ތުހުމަތު ކުރެވޭ ކޮރަޕްޝަނާ ގުޅުން ހުރި މައްސަލައެއް އޭސީސީން ބަލަމުން އަންނަ އިރު، ފެނަކަ ކޯޕަރޭޝަނަށް ގަވާއިދާ ޚިލާފަށް ޑޮލަރު ގަތް މައްސަލާގައި ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު މުހައްމަދު ނިމާލާއި އެތަނުގެ އިސްވެރިންތަކަކަށް ދައުވާކުރަން އޭސީސީ އިން ޕްރޮސެކިއުޓާ ޖެނެރަލްގެ އޮފީހަށް 2017 އަހަރު ފޮނުވާފައިވެއެވެ.
އެއީ ފެނަކަ އަށް އެއް މިލިއަން ޑޮލަރު ގަތުމަށް ޝަރޫ ލޯންޗް ސާވިސް އަށް 17 މިލިއަން ރުފިޔާ ދޫކޮށް، ޑޮލަރު ނުލިބުނު މައްސަލައިގައެވެ. ނަމަވެސް ފަހުން އޭސީސީން ވަނީ ނިމާލްގެ މައްޗަށް ދައުވާ ނުކުރަން ނިންމާ، އެ މައްސަލައިގައި ޝަރޫ ލޯންޗުން މަކަރާއި ހީލަތް ހަދާފައިވާ ކަމަށް ބުނެފައެވެ.
