ޑައިން އިން ގެ ހިދުމަތް ނުދެވޭތީ ރެސްޓޯރެންޓް އެސޯސިއޭޝަންގެ ކަންބޮޑުވުން

ޑައިން އިން ގެ ހިދުމަތް ނުދެވޭތީ ރެސްޓޯރެންޓް އެސޯސިއޭޝަނުން ކަންބޮޑުވުން ފާޅުކޮށްފިއެވެ.

އެ އެސޯސިއޭޝަނުން ހޯމަ ދުވަހުގެ ހަވީރު ކާނިވާ ސަރަހައްދުގައި ވަނީ ސުލްހަވެރި އިހުތިޖާޖެއްވެސް ކުރިއަށް ގެންގޮސްފައެވެ. މި އިހުތިޖާޖުގެ ތެރެއިން ރެސްޓޯރެންޓް ހިންގާ ފަރާތްތަކުން އެ މީހުންގެ ޝުއޫރުތައް ވަނީ ހިއްސާކޮށްފައެވެ. އެގޮތުން މައިގަނޑު ގޮތެއްގައި އެމީހުން ފާހަގަކޮށްފައިވަނީ ފިޔަވަޅުތައް އަޅާއިރު ސަރުކާރުގެ ފަރާތުން އެމީހުންނާއި މަޝްވަރާ ނުކުރާ މައްސަލައެވެ. އަދި ފިޔަވަޅުތައް ހަރުކަށި ކޮށް ކެފޭ ރެސްޓޯރެންޓުތަކުން ޑައިން އިން ގެ ހިދުމަތް ފޯރުކޮށްނުދެވޭތީ އެމީހުންގެ ވިޔަފާރިތަކަށް ގެއްލުންވަމުންދާ ކަމަށް ވަނީ ފާހަގަކޮށްފައެވެ.

މި ކަމާއި ގުޅިގެން އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވީ ސަރުކާރުގެ ފަރާތުން ފިޔަވަޅުތައް އަޅަމުންދަނީ ކޮވިޑުގެ ހާލަތަށް ބެލުމަށްފަހު ކަމާއި ގުޅޭ ފަރާތްތަކާއި އަދި ޑޮކްޓަރުންނާއި ވެސް މަޝްވަރާ ކުރުމަށްފަހުގައި ކަމަށެވެ. އަދި ރެސްޓޯރެންޓުތަކުން ފާޅުކުރާ ކަންބޮޑުވުންތައް ވެސް އެނގިވަޑައިގަންނަވާ ކަަމަށެވެ.

މާލެ ސަރަހައްދުގައި ކެފޭ ރެސްޓޯރެންޓް ފަދަ، ކާބޯ ތަކެތީގެ ހިދުމަތްދޭ ތަންތަނުގެ އެތެރޭގައި ތިބެގެން ކެއިން ބުއިން ހުއްޓާލާފައިވާއިރު މިހާރު ހަމައެކަނި ފޯރުކޮށްދެވެނީ ޓޭކްއަވޭ އާއި ޑެލިވަރީގެ ހިދުމަތް އެކަންޏެވެ. ކޮވިޑް-19 އިން ރައްކާތެރިވުމަށް އަޅާފައިވާ ޚާއްޞަ ފިޔަވަޅުތަކަށް ބަދަލު ގެނައުމާގުޅިގެން، 23 ޖޫން 2021ން 30 ޖޫން 2021 ގެ ނިޔަލަށް ސައިހޮޓާ، ކެންޓީން، ކެފޭ، ރެސްޓޯރަންޓް ފަދަ ކާބޯތަކެތީގެ ޚިދުމަތްދޭ ތަންތަނުން ހެނދުނު 8:00 އިން ހަވީރު 6:00 ގެ ނިޔަލަށް ދެވޭނީ ހަމައެކަނި ޓޭކްއަވޭ އަދި ޑެލިވަރީގެ ޚިދުމަތެވެ. ސައިހޮޓާ، ކެންޓީން، ކެފޭ، ރެސްޓޯރަންޓް ފަދަ ކާބޯތަކެތީގެ ޚިދުމަތްދޭ ތަންތަނުން، ހެނދުނު 6:00 އިން މެންދަމު 12:00 އަށް، މޯލްޑިވްސް ޕޮލިސް ސަރވިސް ގެ ހުއްދައާއެކު ޑެލިވަރީގެ ޚިދުމަތް ދެވިދާނެއެވެ. ސައިހޮޓާ، ކެންޓީން، ކެފޭ، ރެސްޓޯރަންޓް ފަދަ ކާބޯތަކެތީގެ ޚިދުމަތްދޭ ތަންތަނުން، ޓޭކްއަވޭގެ ޚިދުމަތް ދިނުމަށް ތަނުގައި މުވައްޒަފުން ތިބެންވާނީ، މޯލްޑިވްސް ޕޮލިސް ސަރވިސް ގެ ޕޯޓަލް މެދުވެރިކޮށް ހުއްދަ ހޯދުމަށް ފަހުއެވެ.

ކޮވިޑްގެ ނަންބަރުތައް މާލެ ސަރަހައްދުގައި އިތުރުވާން ފެށުމުގެ ސަބަބުން ސަރުކާރުން އެޅި ޚާއްސަ ފިޔަވަޅެއްގެ ގޮތުން ކެފޭ ރެސްޓޯރަންޓް، ޖިމް އަދި ސެލޫންތައް ވަނީ ބަންދުކޮށްފައެވެ. މީގެ ސަބަބުން އެ ވިޔަފާރިތަަކަށް ވަނީ ބޮޑެތި ގެއްލުންތަކާ ކުރިމަތިލާން ޖެހިފައެވެ. 

އަދި ސައިހޮޓާ، ކެންޓީން، ކެފޭ، ރެސްޓޯރަންޓް ފަދަ ކާބޯތަކެތީގެ ޚިދުމަތްދޭ ތަންތަނުން، ހެލްތް ޕްރޮޓެކްޝަން އެޖެންސީން ކަނޑައަޅާ އުޞޫލުތަކާ އެއްގޮތަށް ޢަމަލު ކުރުމަށް ވެސް ވަނީ އިލްތިމާސްކޮށްފައެވެ.