ހުކުރު ދުވަހު 200ށްވުރެ ގިނަ ކޭސް، ރ.ކޮތައިފަރުން އެކަނި 112 ކޭސް!
ރަށްތަކުން ވެސް 105 ކޭސް ވަނީ ފެނިފައި
ރ.ކޮތައިފަރު
ފާއިތުވެދިޔަ 24 ގަޑިއިރުގެ ތެރޭގައި އިތުރު 266 މީހުން ކޮވިޑަށް ޕޮޒިޓިވްވެއްޖެއެވެ.
މި 266 ކޭސްގެ ތެރޭގައި ތަރައްގީކުރަމުން އަންނަ ރިސޯޓެއްކަމަށްވާ ރ.ކޮތައިފަރުން އެކަނި 112 ކޭސް ފެނިފައިވާ ކަމަށް ހެލްތް އިމަރޖެންސީ އޮޕަރޭޝަން ސެންޓަރުން ވަނީ ބުނެފައެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން އާންމުކޮށްފައިވާ ތަފާސްހިސާބުތަކަށް ބަލާއިރު އަތޮޅުތެރެއިން 105 ކޭސް ފެނިފައިވާއިރު، 41 ކޭސް ފެނިފައިވަނީ ގްރޭޓަރ މާލެ ސަރަހައްދުންނެވެ. އަދި ރިސޯޓޫތަކުން 08 ކޭސް ވަނީ ފެނިފައެވެ. މިއާއެކު ރާއްޖެއިން ޖުމްލަ 72،944 މީހުން ވަނީ ކޮވިޑަށް ޕޮޒިޓިވްވެފައެވެ.
މިހާތަނަށް ޖުމްލަ 68،429 މީހުން ވަނީ ބަލިން ރަނގަޅުވެފައެވެ. އެކްޓިވް ކޭސްގެ ގޮތުގައި ހިމެނެނީ 5،264 މީހުންނެވެ. މީގެ ތެރެއިން 31 މީހަކު އެޑްމިޓް ކޮށްގެން ދަނީ ފަރުވާ ދެމުންނެވެ. މި ބަލީގައި މިހާތަނަށް 208 މީހަކު ވަނީ ނިޔާވެފައެވެ.
ރާއްޖޭގައި ކޮވިޑްގެ ހާލަތު އެންމެ ގޯސްވާން ފަށާފައިވަނީ މިދިޔަ މެއިމަހުގެ ތެރޭގައެވެ. އެއާއެކު ސަރުކާރުން އެޅި ހަރުކަށި ފިޔަވަޅުތަކަށްފަހު ޕޮޒިޓިވްވާ މީހުންގެ އަދަދު މިހާރު ވަނީ މަދުވާން ފަށާފައެވެ. ޕޮޒިޓިވް ކޭސްތައް މަދުވާން ފެށުމާއެކު، ސަރުކާރުން ވަނީ ބައެއް ފިޔަވަޅުތަކަށް ލުއިދޭން ފަށާފައެވެ.
