އެމެރިކާއިން ޓައިވާނަށް ދޭ ވެކްސިން 3 ގުނަ އިތުރުކޮށްފި
20 ޖޫން 2021 | އާދީއްތަ 17:23އެމެރިކާއިން ވަނީ ޓައިވާންގެ ވެރިރަށް ޓައިޕީއަށް 2.5 މިލިއަން ޑޯޒްގެ ވެކްސިން ފޮނުވާފައި
ޓައިވާނުގައި ވެކްސިން ދޭން ފެށުން
ޓައިވާނުގައި ހަލުވިކަމާއެކު ކޮވިޑް ފެތުރެން ފަށާފައިވާ މި ދަނޑިވަޅުގައި އެމެރިކާއިން އެގައުމަށް ދެމުން އަންނަ ވެކްސިންގެ އަދަދު 3 ގުނަ އިތުރުކޮށްފިއެވެ.
އެމެރިކާއިން ވަނީ ޓައިވާންގެ ވެރިރަށް ޓައިޕީއަށް 2.5 މިލިއަން ޑޯޒްގެ ވެކްސިން ފޮނުވާފައެވެ. އެގޮތުން އެމެރިކާއިން ފޮނުވި ވެކްސިންގެ ޑޯޒްތައް އާދީއްތަ ދުވަހުގެ ހަވީރުގެ ވަގުތެއްގައި ޓައިވާނަށް ލިބޭނަކަމަށް، އެގައުމުގެ ފޮރިން މިނިސްޓަރާއި ހަވާލާދެއްވައި، އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނު ވަނީ ވިދާޅުވެފައެވެ. އެމެރިކާއިން ޓައިވާނަށް ފޮނުވާފައިވަނީ މޮޑާނާ ވެކްސިންގެ ޑޯޒްތަކެވެ.
ކޮވިޑްގެ ކޭސްތައް އެއްވަރެއްގައި ހުރުމަށްފަހު ޓައިވާނުގައި ކޭސްތައް ކުއްލިއަކަށް އިތުރުވެގެން ގޮސްފައިވާކަމަށް އެގައުމުން ވަނީ ރިޕޯޓްކޮށްފައެވެ. އެގައުމުގައި ވެކްސިން ޖަހާފައިވަނީ ކޮންމެ 100،000 މީހުންގެ ތެރެއިން 6 މީހެކެވެ.
ޓައިވާނަކީ އެގައުމުގެ ބައެއްކަމަށް ގަބޫލުކުރަމުން އަންނަ ޗައިނާއިން ވަނީ އެގައުމުގައި އުފައްދާފައިވާ ވެކްސިން ޓައިވާނަށް ފޯރުކޮށްދިނުމަށް އެތައް ފަހަރަކު މަސައްކަތްކޮށްފައެވެ. ނަމަވެސް ޓައިވާނުން ވަނީ ޗައިނާގެ ވެކްސިންގެ ރައްކާތެރިކަމާއި މެދު ސުވާލު އުފައްދާފައެވެ. މީގެ އިތުރުން ބައިނަލްއަގުވާމީ ފަރާތްތައް މެދުވެރިވެގެން ވެކްސިން ގަތުމަށް ޓައިވާނުން ކުރަމުންދާ މަސައްކަތަށް ޗައިނާއިން ހުރަސްއަޅަމުންދާ ކަމަށް ވެސް ޓައިވާނުން ވަނީ ބުނެފައެވެ.
ޖޫން މަހުގެ 6 ވަނަ ދުވަހު އެމެރިކާއިން ވަނީ، 24 މިލިއަން މީހުންގެ އާބާދީއެއް އޮންނަ ޓައިވާނަށް، 750،000 ޑޯޒްގެ ވެކްސިން ދޭނެކަމަށް ވައުދުވެފައެވެ. ނަމަވެސް ޓައިވާންގެ ހާލަތު ދުވަހަކަށްވުރެ ދުވަހެއް ގޯސްވާން ފަށާފައިވާތީ އެމެރިކާއިން ވަނީ ވެކްސިން ފޯރުކޮށްދޭން ނިންމި އަދަދު ތިން ގުނައަށް އިތުރުކޮށްފައެވެ.
