ލ ގަމު ކޮވިޑް ފެސިލިޓީން ފަރުވާ ހޯދަމުން ދިޔަ މީހަކު ނިޔާވެއްޖެއެވެ.

ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނީ، ނިޔާވެފައިވަނީ އުމުރުން 82 އަހަރުގެ ދިވެހި ފިރިހެނެއް ކަމަށެވެ. އޭނާ ނިޔާވެފައިވަނީ ލ ގަމު ކޮވިޑް މެނޭޖްމަންޓް ފެސިލިޓީގައި ފަރުވާ ހޯދަމުން ދަނިކޮށް ކަމަށާއި، ނިޔާވީ ހުކުރު ދުވަހުގެ ރޭގަނޑު 07:06 ގައި ކަމަށް އެޗްޕީއޭއިން ބުނެފައިވެއެވެ.

އެއާއެކު ރާއްޖެއިން މިހާތަނަށް ކޮވިޑް ޖެހިގެން ނިޔާވި މީހުންގެ ޖުމުލަ އަދަދު މިވަނީ 203ށް އަރާފައެވެ.

ހުކުރު ދުވަހު މި ބަލީގައި އުމުރުން 68 އަހަރުގެ ދިވެހި އަންހެނެއްވެސް ނިޔާވެފައިވެއެވެ. އެޗްޕީއޭއިން މައުލޫމާު ދޭ ގޮތުގައި އެމީހާ ނިޔާވީ ހުޅުމާލެ މެޑިކަލް ފެސިލިޓީގައި ފަރުވާދެމުން ދަނިކޮށް ބުރާސްފަތި ދުވަހުގެރޭ ދަންވަރު 2:05ގައެވެ.

ރާއްޖޭގައި ހަލުވި ކަމާއެކު ކޮވިޑް ފެތުރެމުން އަންނައިރު މި ބަލީގައި ނިޔާވާ މީހުންގެ އަދަދު ވެސް އަންނަނީ އިތުރު ވަމުންނެވެ. އެގޮތުން އެޗްޕީއޭގެ ތަފާސްހިސާބުތައް ދައްކާގޮތުން ކޮވިޑްގައި އެންމެ ގިނަ އަދަދަކަށް މީހުން ނިޔާވީ މި ދިޔަ މެއި މަހުއެވެ. އެއީ 88 މީހުންނެވެ.