ލާމަރުކަޒީ ގާނޫނާ ތަޢާރުޟުވާ 6 ގާނޫނެއް އިސްލާހުކުރުމަށް އޭޖީން ރައީސް އޮފީހަށް ފޮނުވައިފި
2020 ވަނަ އަހަރުގެ ޑިސެމްބަރ މަހުގެ 23 ވަނަ ދުވަހުން ފެށިގެން 6 މަސް ދުވަހުގެ ތެރޭގައި ގާނޫނުތަކަށް އިސްލާހު ގެނައުމަށްޓަކައި ހުށަހަޅަންވާނެ
ރައީސުލްޖުމްހޫރިއްޔާގެ އޮފީސް
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނާ ތަޢާރުޟުވާ 6 ގާނޫނެއް އިސްލާހުކުރުމުގެ ބިލް ރައްޔިތުންގެ މަޖިލީހަށް ހުށަހެޅުމަށްޓަކައި އެޓަރނީ ޖެނެރަލް އޮފީހުން ރައީސް އޮފީހަށް ފޮނުވައިފިއެވެ.
މިކަމާއި ގުޅިގެން އޭޖީ އޮފީހުން ބުނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 150 ވަނަ މާއްދާގައި، އެ ގާނޫނާއި އެގާނޫނުގެ މަގުސަދުތަކާ ތަޢާރުޟުވާ ގާނޫނުތައް ފާހަގަކޮށް، އެގާނޫނަށް 9 ވަނަ އިސްލާހު ގެނައުމުގެ ގާނޫނަށް އަމަލުކުރަން ފެށި ތާރީޚުކަމުގައިވާ 2020 ވަނަ އަހަރުގެ ޑިސެމްބަރ މަހުގެ 23 ވަނަ ދުވަހުން ފެށިގެން 6 މަސް ދުވަހުގެ ތެރޭގައި އެފަދަ ގާނޫނުތަކަށް އިސްލާހު ގެނައުމަށްޓަކައި، އޭޖީ ރައްޔިތުންގެ މަޖިލީހަށް ހުށަހަޅަންވާނެ ކަމަށް ބަޔާންކޮށްފައިވާކަމަށެވެ. އެގޮތުގެ މަތިން ގާނޫނާއި އެ ގާނޫނުގެ މަގްސަދުތަކާ ތަޢާރުޟުވާ ގާނޫނުތަކަށް އިސްލާހު ގެނައުމަށްޓަކައި 6 ބިލެއް ރައްޔިތުންގެ މަޖިލީހަށް ހުށަހެޅުމަށް ހަމަޖެހިފައިވާކަމަށް އޭޖީ އޮފީހުން ބުނެއެވެ.
މިސަރުކާރު އައުމަށްފަހު ލާމަރުކަޒީ ގާނޫނަށް ވަނީ ބޮޑެތި އިސްލާހުތަކެއް މިހާރު ހިނގަމުންދާ 19 ވަނަ ރައްޔިތުންގެ މަޖިލީހުގައި ގެނެސްފައެވެ. ކައުންސިލްތަކަށް ބޮޑެތި ބާރުތަކެއްދީފައިވާއިރު މިއިސްލާހުތަކާއެކު އިންތިޚާބު ކުރެވުނު ފުރަތަމަ ކައުންސިލްތައް މިހާރު ވަނީ އިންތިޚާބުކުރެވި ހުވާކޮށްފައެވެ. ގާނޫނަށް އަލަށް ގެނައި އިސްލާހާއެކު ތަޢާރުޟުވާ ގާނޫނުތަކަށް އިސްލާހު ގެނައުމުގެ ބިލްތައް މިދިޔަ ދައުރުގެ ޖަލްސާއަށް ވެސް ވަނީ ހުށަހަޅާފައެވެ.
އިސްލާހު ގެނައުމަށް އޭޖީ އޮފީހުން މިހާރު ރައީސް އޮފީހަށް ފޮނުވާފައިވާ މިބިލްތަކަކީ ސަރުކާރުން ރައްޔިތުންގެ މަޖިލީހުގެ މިހާރު ހިނގަމުން މިދާ ދެ ވަނަ ދައުރަށް ހުށަހަޅާނެކަމަށް ހާމަކޮށްފައިވާ ބިލްތަކުގެ ތެރޭގައި ހިމެނޭ ބިލްތަކެކެވެ. މިދައުރަށް 19 ބިލެއް ހުށަހަޅާނެކަމަށް އޭޖީ އޮފީހުން ވަނީ ބުނެފައެވެ. މިދައުރަށް ހުށަހެޅުމަށް ހަމަޖެހިފައިވާ ބިލްތަކުގެ ތެރެއިން 7 ބިލެއް މިހާރު ވަނީ މަޖިލީހަށް ހުށަހަޅާފައެވެ.
