ސްޓޯކް މައްޗަށް ކުރި ހޯދައި އާސެނަލް ގަދަ ހަތަރަކާއި ގާތަށް

ސްޓޯކް ސިޓީގެ މައްޗަށް 1-4 ގެ ނަތީޖާއަކުން ކުރި ހޯދައި ޕްރިމިއަ ލީގުގެ ގަދަ ހަތަރަކަށް އެރުމަށް އާސެނަލް ކުރަމުން އަންނަ މަސައްކަތަށް އިތުރު ކުރިއެރުމެއް ލިބިއްޖެއެވެ.

ސްޓޯކްގެ ދަނޑުގައި ކުޅުނު މި މެޗުގައި އާސެނަލްގެ ފަރާތުން މޮޅު ކުޅުމެއް ފެނުނުއިރު އެޓީމުގެ ފުރަތަމަ ގޯލު 42 ވަނަ މިނެޓްގައި ކާމިޔާބުކޮށްދިނީ އޮލިވިއޭ ޖިރޫއެވެ.

މި ނަތީޖާގައި އޮވެ ފުރަތަމަ ހާފު ނިމުނު އިރު ދެވަނަ ހާފް ފެށިގެން 55 ވަނަ މިނެޓުގައި މެސުތް އޮޒިލް ވަނީ ލަނޑެއް ކާމިޔާބުކޮށް އެޓީމަށް ލީޑު ފުޅާކޮށްދީފައެވެ.

މި މެޗުގައި އެޓީމުގެ ތިންވަނަ ގޯލު ކާމިޔާބުކޮށްދިނީ، އެލެކްސިސް ސަންޗޭޒްއެވެ. މިއީ ލީގުގައި ސަންޗޭޒް ކާމިޔާބުކުރި 21 ވަނަ ގޯލެވެ.

އާސެނަލްގެ ފަހު ގޯލު މެޗުގެ 80 ވަނަ މިނެޓްގައި ކާމިޔާބުކޮށްދިނީ ފުރަތަމަ ގޯލު ވެސް ކާމިޔާބުކޮށްދިން ޖިރޫއެވެ.

ސްޓޯކްގެ ހަމައެކަނި ގޯލު 89 ވަނަ މިނެޓުގައި ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ޕީޓަ ކްރައުޗްއެވެ.

މި މޮޅާއެކީ އާސެނަލް މިހާރު އޮތީ 69 ޕޮއިންޓާއެކީ ލީގުގެ ފަސްވަނައިގައެވެ. ހަތަރުވަނައިގައި އޮތް ލިވަޕޫލްއާ އާސެނަލްއާ ދެމެދު މިވަގުތު އޮތީ އެންމެ ޕޮއިންޓެއްގެ ފަރަގެކެވެ. ލީގުގެ ގަދަ ހަތަރަކުން ޖާގަ ނުލިބިއްޖެނަމަ އަންނަ ސީޒަނުގެ ޗެމްޕިއަންސް ލީގުން އާސެނަލްއަށް ޖާގައެއް ނުލިބޭނެއެވެ.