ދެ ބިލެއްގެ ކޮމިޓީ މަސައްކަތް ވަނީ ނިންމާލާފައި
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ރައްޔިތުންގެ މަޖިލީހުގެ ފުރަތަމަ ދައުރަށް ސަރުކާރުގެ ފަރާތުން ހުށަހަޅާނެކަމަށް ހާމަކޮށްފައިވާ 5 ބިލާއެކު ޖުމްލަ 19 ބިލެއް މިދައުރުގައި ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅުމަށް ގަސްތުކޮށްފައިވާކަމަށް އެޓަރނީ ޖެނެރަލްގެ އޮފީހުން ބުނެފިއެވެ.
މިދައުރަށް ހުށަހެޅުމަށް ސަރުކާރުން ގަސްތުކޮށްފައިވާ ބައެއް ބިލްތައް މިހާރު ވަނީ މަޖިލީހަށް ހުށަހަޅާފައެވެ. މަޖިލީހަށް ހުށަހަޅާފައިވާ ބައެއް ބިލްތައް މިހާރު ހުރީ ކޮމިޓީ ސްޓޭޖްގައެވެ. އަދި ބައެއް ބިލްތަކުގެ މަސައްކަތް ކޮމިޓީން ވަނީ ނިންމާލާފައެވެ.
މިދެބިލަކީ ރައްޔިތުންގެ މަޖިލީހުގެ ރައީސާއި، އުއްތަމަ ފަޑިޔާރު ދިރިއުޅޭނެ ތަނެއް ދައުލަތުން ހަމަޖެއްސުމަށް ހުށަހަޅާފައިވާ ދެ ބިލެވެ. މިދެ ބިލް ދިރާސާކޮށްފައިވަނީ ސަލާމަތީ ޚިދުމަތްތަކާއި ބެހޭ ކޮމިޓީންނެވެ. މިދެބިލް ދިރާސާކުރި ސަބްކޮމިޓީން ވަނީ މިދެބިލް ދިރާސާކުރުމުގެ މަސައްކަތް މިހާރު ނިންމާލާފައެވެ.
މީގެއިތުރުން ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނާއި އެ ގާނޫނުގެ މަގްސަދުތަކާ ތަޢާރުޟުވާ ގާނޫނުތަކަށް އިސްލާހު ގެނައުމާގުޅޭ ބިލްތައް ހުށަހަޅަމުންގެންދާނެ ކަމަށް އޭޖީ އޮފީހުން ވަނީ ބުނެފައެވެ.
ސަރުކާރުގެ ފަސް އަހަރުގެ ލެޖިސްލޭޓިވް އެޖެންޑާގައި 201 ބިލެއް ހިމެނެއެވެ. އޭގެތެރެއިން 76 ބިލެއް މިއަހަރުގެ މަރޗް މަހުގެ ނިޔަލަށް ވަނީ ހުށަހަޅާފައެވެ.
މިހާރު ހިނގަމުންމިދާ ދެވަނަ ދައުރު ކުރިޔަށްދާނީ ޖޫން މަހުގެ ނިޔަލަށެވެ.
