އައްޑޫ ސިޓީ ހިތަދޫގައި ކޮވިޑް-19ގެ ހާލަތު ގޯސްވެ އެރަށް އެއް ހަފްތާގެ މުއްދަތަށް ލޮންޑައުންކޮށްފިއެވެ.
އައްޑޫ އެމަޖަންސީ އޮޕަރޭޝަން ސެންޓަރުން ބޭއްވި ނޫސްވެރިންގެ ބައްދަލުވުމެއްގައި އެރަށް ލޮކްޑައުންކޮށްފައިވާކަން އިއުލާންކުރި އިރު، އެރަށުގައި ވެސް އަޅާފައި ވަނީ ހަމަ މާލޭގައި އަޅާފައިވާ ފިޔަވަޅުތަކެވެ. އެގޮތުން މުޅި ރަށުގައި ހުއްދައަކާ ނުލައި ބޭރަށް ނިކުތުން މަނާވެފައިވާއިރު، ކޮންމެ ގޭބީސީއަކަށް ވެސް ބޭރަށް ނިކުތުމަށް ދެ ފާހެއް ދޫކުރެއެވެ. އެ ދެ ފާސް ދޫކުރަނީ ދެ ގަޑިއަކަށް ބަހާލައިގެން ކޮންމެހެން ޒަރޫރީ ބޭނުންތަކަށް އެކަންޏެވެ.
މީގެ އިތުރަށް ދަނޑުވެރިންނާއި މަސްވެރިންނަށް ވަކި ފާހެއް ދޭން ނިންމާފައިވާއިރު ވަޒީފާގެ ގޮތުން ބޭރަށް ދާން ޖެހޭ މީހުން ވަޒީފާއަށް ދާން ޖެހޭ ގަޑިތަކުގައި ފުލުހުންގެ ޕޯޓަލް މެދުވެރިކޮށް ފާސް ނެގޭނެ އިންތިޒާމު ވެސް ވަނީ ހަމަޖައްސާފައެވެ. މީގެ އިތުރަށް ކެފޭ ރެސްޓޯރަންޓުތަކުން ޑެލިވަރީ ނޫން އެހެން ޚިދުމަތެއް ނުދެވޭ ގޮތަށް ހަދާފައިވާއިރު ފަތިހު 4ން ހެނދުނު 8ށް ކަސްރަތުކުރުމުގެ ފުރުސަތު ލިބޭނެ ކަމަށް ވެސް ބުނެފައިވެއެވެ. މިގޮތަށް ކަސްރަތަށް ހުއްދަދީފައިވަނީ އެކަނި ކަސްރަތުކުރުމަށް ނުކުމެވޭގޮތަށެވެ.
އައްޑޫ ސިޓީ ހިތަދޫ ލޮކްޑައުންކޮށްފައިވާއިރު، މުޅި ސިޓީން ފެނިފައިވާ 82 އެކްޓިވް ކޭސްގެ ތެރެއިން 77 ކޭސް އަކީ ހިތަދޫން ފެނިފައިވާ ކޭސްތަކެވެ. ބާކީ ކޭސްތަަކަކީ މަރަދޫން 2 ކޭސް ފޭދޫން އެކެއް އަދި ހުޅުދޫން ފެނިފައިވާ ދެ ކޭސްއެވެ. ހިތަދޫގައި ކޯވިޑް-19 ހާލަތު ގޯސްވެފައިވަނީ އެރަށުގައި އުޅޭ ބިދޭސީންގެ މެދުގައި ކޮވިޑް-19ގެ ބޮޑު ކްލަސްޓަރއެއް އުފެދިގެންނެވެ.
އައްޑޫއިން މިހާތަނަށް ޖުމްލަ 382 ކޮވިޑް-19 ކޭސް ރިޕޯޓުކޮށްފައިވާއިރު އެ ސިޓީން މި ބަލީގައި ދެމީހަކު ވަނީ ނިޔާވެފައެވެ. އަދި މިހާރު ތިބި 82 އެކްޓިވް ކޭސްގެ ތެރެއިން އެޑްމިޓްކޮށްގެން ފަރުވާދެމުން އަންނަނީ އެންމެ މީހަކަށެވެ.
