އިސްރާއީލްގެ އައު ބޮޑުވަޒީރު ހުވާ ކުރައްވައިފި

އިސްރާއީލްގެ އާ ބޮޑުވަޒީރު ނަފްތާލީ ބެނެޓް، ބޮޑުވަޒީރު ކަމުގެ ހުވާ ކުރައްވައިފިއެވެ.

ކޯލިޝަން ސަރުކާރަށް ގާނޫނު ހަދާ މަޖިލީހުގެ ރުހުން ލިބުމާއެކު ބޮޑު ވަޒީރު ހުވާ ކުރުމުގެ ރަސްމިއްޔާތުވެސް ވަނީ ކުރިއަށް ގެންގޮސްފައެވެ. އާ ސަރުކާރަށް ރުހުން ހޯދުމަށް ބޭއްވި ޖަލްސާގައި ކްނެސެޓްގެ ތާއީދު އާ ސަރުކާރަށް ލިބުނީ ހަނި ފުރުސަތަކުންނެވެ. އާސަރުކާރަށް ތާއީދުކޮށް 60 ވޯޓު ލިބުނު އިރު ތާއީދު ނުކުރާ ކަމަށް 59 ވޯޓު ލިބުނެވެ. އިސްރާއީލުގެ ގާނޫނު ހަދާ މަޖިލީސް، ކްނެސެޓްގައި ތިބެނީ 120 މެމްބަރުންނެވެ. ވަކި ގޮތަކަށް ވޯޓު ނުދެއްވާ އެއް މެމްބަރަކު އިންނެވިއެވެ.

މިއާއެކު އައު ސަރުކާރަށް ތާއީދު ލިބި ބެންޖަމިން ނަތަންޔާހޫގެ 12 އަހަރުވީ ވެރިކަން ނިމުމަކަށް އައީއެވެ.

އުމުރުން 49 އަހަރުގެ ބެނެޓަކީ އިސްރާއީލްގެ ދެވަނައަށް އެއްމެ ޒުވާން ބޮޑުވަޒީރެވެ. ބޮޑުވަޒީރުކަމާ ހަވާލުވިއިރު ނަތަންޔާހޫގެ އުމުރަކީ 46 އަހަރެވެ. އެހެންކަމުން ނަތަންޔާހޫ އަކީ އިސްރާއީލްގެ ބޮޑުވަޒީރުކަން އެއްމެ ހަގު އުމުރުގައި ކުރި ފުރަތަމަ މީހާއެެވެ.

ކޯލިޝަން އެއްބަސްވުން އެކުލަވާލާފައިވާ ގޮތުން ބެނެޓް ބޮޑުވަޒީރުކަމުގެ މަގާމުގައި ހުންނާނީ، 2023ވަނަ އަހަރުގެ އޮގަސްޓް މަހުގެ 27ވަނަ ދުވަހާ ހަމައަށެވެ. އެއަށްފަހު ބޮޑުވަޒީރުކަމާ ހަވާލުވާނީ، ޔެސް އަތީދް ޕާޓީގެ ޗެއަރމަން އަދި ކޮލިޝަން ސަރުކާރު އެކުލަވާލުމަށް އިސްކޮށް އުޅުނު ޔައިރް ލަޕިދެވެ. އެހެންކަމުން ލަޕިދް ވެސް ވަނީ ބޮޑުވަޒީރު ކަމުގެ ހުވާ ކޮށްފައެެވެ. އެއަށްފަހު އައު މިނިސްޓަރުން ވެސް ވަނީ ހުވާ ކޮށްފައެވެ. އައު ސަރުކާރުން އެކުލަވާލި ކެބިނެޓްގައި 9 އަންހެން ވަޒީރުން ހިމެނެއެވެ. މިއީ މިހާތަނަށް އެއްމެ ގިނަ އަންހެން ވަޒީރުން ހިމެނޭ ގޮތަށް އެކުލަވާލި ކެބިނެޓެވެ.

އާސަރުކާރަށް ރުހުން ހޯދުމުގެ ވޯޓުގެ ކުރިން މަޖިލީހުގެ އައު ރައީސަކު ހޮވުމަށްވެސް ވަނީ ވަނީ ވޯޓު ނަގާފައެެވެ. މަޖިލީހުގެ އައު ރައީސްކަންވެސް ލިބުނީ ޔެޝް އަތީދް ޕާޓީއަށެވެ. މަޖިލީހުގެ އައު ރައީސަކަށް އިންތިޚާބުވީ، ޔެސް އަތީދް ޕާޓީގެ މިކީ ލެވީ އެވެ. މިކީއަށް ރައީސްކަން ލިބުނީ 67 މެމްބަރުންގެ ތާއީދާއެކުގައެވެ. މަޖިލީހުގެ 13 ޕާޓީގެ މެމްބަރުން ތިބި އިރު މީގެ ތެރެއިން 8 ޕާޓީ އަކީ ކޯލިޝަންގައި ހިމެނޭ ޕާޓީތަކެވެ.