ނަތަންޔާހޫގެ އަނިޔާވެރި ވެރިކަން ނިމުމަކަށް

އިސްރާއީލުގެ ޔަހޫދީ ދައުލަތް ހިންގަމުން އައި ނަތަންޔާހޫގެ 12 އަހަރުވީ ވެރިކަން ނިމުމަކަށް އަތުވެއްޖެއެވެ.

އިދިކޮޅު ކޯލިޝަނުން އެކުލަވާލި ސަރުކާރަށް، ކްނެސެޓްގެ އަޣްލަބިއްޔަތު ލިބުނީ ހަނި ފުރުސަތަކުންނެވެ. އިދިކޮޅުން އެކުލަވާލި ސަރުކާރަށް ތާއީދު ނޯންނަ ކަމަށް 59 ވޯޓު ލިބުނު އިރު، ތާއީދު އޮންނަ ކަމަށް ލިބުނީ 60 ވޯޓެވެ. މިއާއެކު 2023 ސެޕްޓެމްބަރުގެ ނިޔަލަށް ބޮޑުވަޒީރުކަމާ ހަވާލުވެވަޑައިގަންނަވާނީ، ކޯލިޝަންގައި ހިމެނޭ ހަރުކަށި ފިކުރުގެ ކަނާތު ފިޔައިގެ ޕާޓީއެއްކަމުގައިވާ ޔަމިނާ ޕާޓީގެ ނަފްތާލީ ބެނެޓް އެވެ.

އަލަށް އުފެއްދި ކޯލިޝަންގައި ހިމެނޭ އެންމެ ބޮޑު ޕާޓީ އަކީ ޔައިރް ލަޕިދްގެ ޔެޝް އަތިދް ޕާޓީއެވެ. މި ޕާޓީއާއެކު ދެން ކޯލިޝަން ހަދާފައިވަނީ އިދިކޮޅުގައި ހިމެނޭ 8 ޕާޓީއެކެވެ. ގުޅިފައިވާ ސަރުކާރެއް އެކުލާވާލުމަށް މި ޕާޓީތަކުން މިހާރުވަނީ އެއްބަސްވުމުގައި ސޮއިކޮށްފައެވެ. އަލަށް އެކުލަވާ ސަރުކާރުގައި ބޮޑުވަޒީރުގެ މަގާމު އޮންނާނީ ދައުރުވާ ގޮތަށެވެ. ބެނެޓަށްފަހު ބޮޑުވަޒީރުކަމާ ހަވާލުވެ ވަޑައިގަންނަވާނީ އިއްތިހާދުގެ އެންމެ ބޮޑު ޕާޓީ ޔެޝް އަޓިޑް ޕާޓީގެ ލީޑަރު ޔައިރ ލަޕިޑްއެވެ.

އުމުރުން 71 އަހަރުފުޅުގެ ނަތަންޔާހޫ ވެރިކަން ކުރައްވާތާ މިހާރު 12 އަހަރު ވެފައިވާއިރު، މިދިޔަ މާޗް މަހު އޮތް ގާނޫނު ހަދާ މަޖިލީހުގެ އިންތިޚާބުގައި އޭނާގެ ޕާޓީއަށް މެޖޯރިޓީ ވޯޓުލިބިފައެއް ނުވެއެވެ. އެއީ ފާއިތުވި ދެ އަހަރު ތެރޭގައި އޭނާގެ ޕާޓީއަށް މެޖޯރިޓީ ނުލިބުނު ހަތަރު ވަނަ އިންތިޚާބެވެ.

މާޗް މަހުގެ އިންތިޚާބުގެ ނަތީޖާއަށް ފަހު ކޯލިޝަން ސަރުކާރެއް ހެދުމުގެ ފުރުސަތު ނަތަންޔާހޫއަށް ލިބުނު ނަމަވެސް އެއްވެސް ޕާޓީއަކުން އޭނާއާއެކު ކޯލިޝަން ސަރުކާރެއް ހަދަން އެއްބަހެއް ނުވިއެވެ.

އެއާއެކު ކުރިން ފިނޭންސް މިނިސްޓަރުކަން ކުރެއްވި ޔައިރް ލަޕިދްއަށް ކޯލިޝަން ސަރުކާރު ހެދުމުގެ ފުރުސަތު ލިބުނީއެވެ.